Ndari 18

Yahweh agĩcoka akĩra Haruni atĩrĩ: “Wee na ariũ aku o hamwe na nyũmba ya maithe manyu nĩ inyuĩ mũrĩũragio nĩ ũndũ wa ihĩtia o rĩothe rĩngĩkwo kwerekera handũ harĩa hamũre, ningĩ wee o hamwe na ariũ aku arĩa marĩ hamwe nawe nĩ inyuĩ mũrĩũragio nĩ ũndũ wa ihĩtia o rĩothe rĩngĩkwo kwerekera ũthĩnjĩri-Yahweh wanyu

Ningĩ wagĩrĩirũo kũrehe ariũ a ithe wanyu a mũhĩrĩga wa Lawii, mũhĩrĩga wa maithe manyu, nĩguo manyitanĩre nawe na magũtungatĩre o hamwe na ariũ aku mbere ya hema ya Ũira

Magĩrĩirũo kũhingia mawĩra marĩa mehokeirũo makũrutagĩre na mawĩra ma hema yothe. O na kũrĩ ũguo, matiagĩrĩirũo gũkuhĩrĩria indo cia harĩa hamũre na kĩgongona, nĩguo matigakue, o na kana inyuĩ mũkue

Marĩnyitanagĩra nawe na makaruta mawĩra mao megiĩ hema ya gũtũnganwo na ũtungata wothe wa hema, na mũndũ ũtetĩkĩrĩtio ndagĩrĩirũo kũmũkuhĩrĩria

No mũhaka mũrutage wĩra wanyu wĩgiĩ harĩa hamũre na wĩgiĩ kĩgongona, nĩgetha gũtikagĩe marakara mangĩ megũka kũrĩ andũ a ciana cia Isiraeli

Niĩ mwene nĩ njoete ariũ a thoguo, Alawii, kuuma gatagatĩ-inĩ ga ciana cia Isiraeli matuĩke kĩheo gĩaku. Maheanĩtwo kũrĩ Yahweh nĩguo marũmbũiye ũtungata wa hema ya gũtũnganwo

Wee o hamwe na ariũ aku nĩ inyuĩ mwĩhokeirũo mawĩra manyu ma ũthĩnjĩri-Yahweh marĩa makonainie na kĩgongona na kĩrĩa gĩothe kĩrĩ thĩinĩ wa gĩtama, na nĩ inyuĩ mwagĩrĩirũo kũrutaga wĩra ũcio. Nĩ heanĩte ũtungata wa ũthĩnjĩri-Yahweh ũrĩ kĩheo kũrĩ inyuĩ, na mũndũ o wothe ũtetĩkĩrĩtio angĩkuhĩrĩria agĩrĩire kũũragwo.”

Yahweh agĩthiĩ na mbere kwaria na Haruni akĩmwĩra: “Niĩ mwene nĩ ndagũtua mũrũgamĩrĩri wa mĩhothi ĩrĩa ndutagĩrũo. Nĩ ndakũhe, wee o hamwe na ariũ aku gĩcunjĩ kĩa indo ciothe iria nyamũre ihothagwo nĩ ciana cia Isiraeli irĩ igai rĩa gũtũũra

Ici nĩcio irĩtuĩkaga cianyu kuuma harĩ magongona marĩa mamũre mũno ma gũcinwo na mwaki: igongona rĩothe marĩrutaga, hamwe na magongona mao ma mũtu na magongona mao ma mehia na magongona mao ma mahĩtia marĩa marĩndehagĩra. Kĩu nĩ kĩndũ kĩamũre mũno gĩaku na kĩa ariũ aku

Mwagĩrĩirũo gũcirĩa mũrĩ handũ hamũre mũno. Mũndũrũme o wothe no acirĩe. Irĩkoragwo irĩ kĩndũ kĩamũre harĩ inyuĩ

Ici o na cio irĩkoragwo irĩ cianyu: iheo iria marĩhothaga hamwe na magongona mothe ma gũcũgio ma ciana cia Isiraeli. Nĩ ndaciheana kũrĩ wee na kũrĩ ariũ aku na aarĩ aku arĩa marĩ hamwe nawe irĩ igai rĩa gũtũũra. Mũndũ wothe wa nyũmba yaku ũtarĩ na thahu no acirĩe.

“Nĩ ndakũhe maguta mothe marĩa mega biũ na ndibei ya mũhihano yothe ĩrĩa njega biũ na ngano yothe ĩrĩa njega biũ ya mũgethano, maciaro mao ma mbere, iria maheaga Yahweh

Maciaro ma mbere ma kĩndũ gĩothe kuuma bũrũri-inĩ wao, marĩa marĩrehagĩra Yahweh, marĩtuĩkaga maku. Mũndũ wothe wa nyũmba yaku ũtarĩ na thahu no amarĩe.

“Kĩndũ gĩothe kĩamũrĩtwo thĩinĩ wa Isiraeli kĩagĩrĩire gũtuĩka gĩaku.

“Marigithathi mothe ma ciũmbe ciothe iria irĩ muoyo, iria marĩrehagĩra Yahweh, ma mũndũ kana ma nyamũ, magĩrĩire gũtuĩka maku. O na kũrĩ ũguo, nĩ wagĩrĩirũo gũkũũra marigithathi ma andũ, o na marigithathi ma nyamũ iria irĩ thahu nĩ wagĩrĩirũo kũmakũũra

Wagĩrĩirũo gũkũũra irigithathi rĩrĩ na ũkũrũ wa mweri ũmwe gũthiĩ na igũrũ, kũgerera irĩhi rĩa ũkũũri rĩa thogora ũrĩa ũtuĩtwo wa cekeri ithano cia betha, kũringana na cekeri ĩrĩa ĩtuĩtwo ya harĩa hamũre. Nĩ gera 20

No irigithathi rĩa ndegwa kana irigithathi rĩa gatũrũme kana irigithathi rĩa mbũri ũtarĩkũũraga. Icio irĩkoragwo irĩ kĩndũ kĩamũre. Wagĩrĩirũo kũminjaminjia thakame yacio kĩgongona-inĩ, namo maguta ma cio wagĩrĩirũo kũmacinĩra kĩgongona-inĩ marute ndogo matuĩke igongona rĩa gũcinwo na mwaki rĩa mũtararĩko mwega harĩ Yahweh.

Nyama ciacio irĩtuĩkaga ciaku. O ta gĩthũri kĩa igongona rĩa gũcũgio na o na kũgũrũ kwa ũrĩo, irĩtuĩkaga ciaku

Mĩhothi yothe mĩamũre ĩrĩa ciana cia Isiraeli irĩrutagĩra Yahweh, nĩ ndakũhe hamwe na ariũ aku na aarĩ aku arĩa marĩ hamwe nawe ĩrĩ igai rĩa gũtũũra. Kĩu nĩ kĩrĩkanĩro gĩa cumbĩ gĩa gũtũũra mbere ya Yahweh nĩ ũndũ waku na rũciaro rwaku.”

Yahweh agĩthiĩ na mbere kwĩra Haruni ũũ: “Wee ndũgũkorũo na igai bũrũri-inĩ wao, na gũtirĩ gĩcunjĩ kĩa mũgũnda gĩgũtuĩka gĩaku. Niĩ nĩ niĩ gĩcunjĩ gĩaku na igai rĩaku gatagatĩ-inĩ ga ciana cia Isiraeli.

“Na rĩrĩ, rora wone atĩ nĩ heete ariũ a Lawii gĩcunjĩ gĩothe gĩa ikũmi thĩinĩ wa Isiraeli kĩrĩ igai nĩ ũndũ wa ũtungata ũrĩa marutaga, ũtungata wa hema ya gũtũnganwo

Rĩu gũtirĩ hĩndĩ ciana cia Isiraeli irĩkuhagĩrĩria hema ya gũtũnganwo, tondũ ingĩka ũguo irĩkoragwo na mehia na igakua

Alawii nĩo magĩrĩirũo gũtungata hema-inĩ ya gũtũnganwo, na nĩo marĩũragio nĩ ũndũ wa mehia mao. Ũcio nĩ watho wa gũtũũra ũrũmagĩrĩrũo njiarũa-inĩ cianyu ciothe atĩ matiagĩrĩirũo kũgĩa na igai gatagatĩ-inĩ ga ciana cia Isiraeli

Nĩ gũkorũo nĩ heete Alawii gĩcunjĩ gĩa ikũmi kĩrĩ igai, kĩrĩa kĩrĩhothagwo nĩ ciana cia Isiraeli, kĩrĩa irĩhothagĩra Yahweh. Nĩkĩo ndameera atĩrĩ, ‘Gatagatĩ-inĩ ga ciana cia Isiraeli, matiagĩrĩirũo kũgĩa na igai.’”

Yahweh agĩcoka akĩra Musa ũũ:

“Wagĩrĩirũo kwĩra Alawii atĩrĩ, ‘Nĩ mũrĩamũkagĩra gĩcunjĩ gĩa ikũmi kuuma kũrĩ ciana cia Isiraeli kĩrĩa ndĩmũheete kuuma kũrĩ o kĩrĩ igai rĩanyu, na kuuma harĩ kĩo nĩ mwagĩrĩirũo kũhotha gĩcunjĩ gĩa ikũmi gĩa gĩcunjĩ kĩu gĩa ikũmi kĩrĩ mũhothi wa Yahweh

Nakĩo kĩrĩkoragwo kĩrĩ mũhothi wanyu, gĩgakorũo gĩtariĩ o ta ngano ya kĩhuuhĩro-inĩ kana kĩrĩa gĩothe kiumaga kĩhihĩro-inĩ kĩa ndibei kana kĩhihĩro-inĩ kĩa maguta

Na njĩra ĩyo, o na inyuĩ mũkarutĩra Yahweh mũhothi kuuma harĩ icunjĩ ciothe cia ikũmi iria mũrĩamũkagĩra kuuma kũrĩ ciana cia Isiraeli, na kuuma harĩ cio mwagĩrĩirũo kũneana mũhothi wa Yahweh kũrĩ Haruni mũthĩnjĩri-Yahweh

Mũrĩrutagĩra Yahweh mũhothi wa mũthemba o wothe wa iheo iria njega biũ kuuma kũrĩ iheo ciothe iria mũheetwo irĩ kĩndũ kĩamũre.’

“Na no mũhaka ũmeere atĩrĩ, ‘Rĩrĩa mwahotha iheo iria njega biũ kuuma harĩ iheo icio-rĩ, harĩ Alawii irĩkoragwo itariĩ o ta kĩrĩa kiumaga kĩhuuhĩro-inĩ na kĩrĩa kiumaga kĩhihĩro-inĩ kĩa ndibei kana kĩhihĩro-inĩ kĩa maguta

Inyuĩ hamwe na andũ a nyũmba cianyu no mũcirĩe mũrĩ handũ o hothe, tondũ nĩ mũcara wanyu ũrĩa mũrĩheagwo nĩ ũndũ wa ũtungata wanyu hema-inĩ ya gũtũnganwo

Mũtirĩkoragwo na mehia ũhoro-inĩ ũcio angĩkorũo nĩ mũrĩhothaga iheo iria njega biũ kuuma harĩ iheo icio, na mũtiagĩrĩirũo gũthahia indo iria nyamũre cia ciana cia Isiraeli, nĩgetha mũtigakue.’”