Ndari 19

Yahweh akĩaria rĩngĩ na Musa na Haruni akĩmeera ũũ:

“Ũyũ nĩguo watho ũrĩa Yahweh athanĩte, ‘Ĩrai ciana cia Isiraeli atĩ nĩ magĩrĩirũo kũmũrehera ng’ombe ndune ĩtarĩ na kaũgũ na ĩtarĩ na wathe na ĩtarĩ yohererũo icoki

Mwagĩrĩirũo kũmĩneana kũrĩ Eliazaru mũthĩnjĩri-Yahweh, nake amĩtware nja ya kambĩ, na ĩthĩnjĩrũo hau mbere yake

Eliazaru mũthĩnjĩri-Yahweh acoke oe thakame ĩmwe yayo na kĩara gĩake na amĩminjaminjie maita mũgwanja amĩerekeirie mwena wa mbere wa hema ya gũtũnganwo

Ng’ombe ĩyo ĩcoke ĩcinwo eroreire. Rũũa rwayo na nyama ciayo na thakame yayo o hamwe na taatha wayo ciagĩrĩire gũcinwo

Na mũthĩnjĩri-Yahweh oe kamũtĩ ka mũtarakwa, mũthobi, na ndigi cia rangi mũtune aciikie mwaki-inĩ ũcio ng’ombe ĩyo ĩracinĩrũo

Mũthĩnjĩri-Yahweh acoke athambie nguo ciake na ethambe mwĩrĩ na maĩ, na thutha ũcio no acoke kambĩ-inĩ; no mũthĩnjĩri-Yahweh ũcio nĩ arĩkoragwo arĩ na thahu o nginya hwaĩ-inĩ.

“‘Ũrĩa wacina ng’ombe ĩyo agĩrĩirũo gũthambia nguo ciake na maĩ na ethambe mwĩrĩ na maĩ, na arĩkoragwo arĩ na thahu o nginya hwaĩ-inĩ.

“‘Mũndũ ũtarĩ na thahu agĩrĩirũo gũcokanĩrĩria mũhu wa ng’ombe ĩyo na aũtware nja ya kambĩ handũ hamũre, na mũhu ũcio wagĩrĩire kũigwo nĩ kĩrĩndĩ gĩa ciana cia Isiraeli ũrĩ wa kũhaarĩria maĩ marĩa marĩhũthagĩrũo kwamũra. Rĩu nĩ igongona rĩa mehia

Mũndũ ũrĩa ũrĩcokanagĩrĩria mũhu wa ng’ombe ĩyo agĩrĩirũo gũthambia nguo ciake na arĩkoragwo arĩ na thahu o nginya hwaĩ-inĩ.

Mũndũ o wothe ũrĩhutagia mũndũ mũkuũ arĩkoragwo arĩ na thahu thikũ mũgwanja

Mũndũ ũcio agĩrĩirũo gwĩtheria na maĩ macio mũthenya wa gatatũ, na mũthenya wa mũgwanja nĩ arĩthiragwo nĩ thahu. No angĩaga gwĩtheria mũthenya wa gatatũ, mũthenya wa mũgwanja arĩkoragwo arĩ o na thahu

Mũndũ o wothe angĩhutia mũndũ mũkuũ na age gwĩtheria nĩ athahĩtie gĩikaro kĩrĩa kĩamũre kĩa Yahweh, na mũndũ ũcio no mũhaka eherio thĩinĩ wa Isiraeli. Nĩ gũkorũo ndaminjaminjĩirio maĩ macio ma gũtheria, arĩthiaga na mbere gũkorũo arĩ na thahu. Arĩkoragwo arĩ o na thahu ũcio wake.

“‘Ũyũ nĩguo watho wĩgiĩ rĩrĩa mũndũ akuĩra thĩinĩ wa hema: Mũndũ wothe ũngĩingĩra hema-inĩ ĩyo na mũndũ wothe ũrĩ thĩinĩ wa hema ĩyo arĩkoragwo arĩ na thahu thikũ mũgwanja

Kĩndũ o gĩothe gĩkunũre gĩtarĩ na gĩkunĩko kĩohereirũo harĩ kĩo kĩrĩkoragwo na thahu

Mũndũ o wothe angĩkorũo werũ-inĩ na ahutie mũndũ ũũragĩtwo na rũhiũ rwa njora kana ahutie kĩimba kana ihĩndĩ rĩa mũndũ kana mbĩrĩra, arĩkoragwo arĩ na thahu thikũ mũgwanja

Nĩ ũndũ wa mũndũ ũcio ũrĩ na thahu, magĩrĩirũo kuoya mũhu wa igongona rĩu icine rĩa mehia ũrĩ mbakũri-inĩ na maũitĩrĩrie maĩ ma handũ haratherera

Nake mũndũ ũtarĩ na thahu oe mũthobi aũrikie maĩ-inĩ macio na amaminjaminjie hema-inĩ ĩyo na mbakũri-inĩ ciothe na harĩ andũ arĩa maarĩ kuo thĩinĩ na harĩ mũndũ ũcio ũhutĩtie mahĩndĩ kana akahutia mũndũ ũcio ũũragĩtwo kana kĩimba kana mbĩrĩra

Mũndũ ũcio ũtarĩ na thahu agĩrĩirũo kũminjaminjĩria mũndũ ũcio ũrĩ na thahu maĩ macio mũthenya wa gatatũ na mũthenya wa mũgwanja, na amũtherie kuumana na mehia mũthenya wa mũgwanja; nake acoke athambie nguo ciake na ethambe na maĩ, na nĩ arĩthiragwo nĩ thahu hwaĩ-inĩ.

“‘No mũndũ angĩkorũo arĩ na thahu na age gwĩtheria, mũndũ ũcio no mũhaka eherio kuuma kĩũngano-inĩ, nĩ gũkorũo nĩ athahĩtie handũ harĩa hamũre ha Yahweh. Nĩ gũkorũo ndaminjaminjĩirio maĩ macio ma gũtheria, arĩ na thahu.

“‘Ũyũ nĩguo ũgũtuĩka watho wa gũtũũra ũrũmagĩrĩrũo nĩo: Ũrĩa ũraminjaminjia maĩ macio ma gũtheria agĩrĩirũo gũthambia nguo ciake, na ũrĩa ũrahutia maĩ macio ma gũtheria arĩkoragwo arĩ na thahu o nginya hwaĩ-inĩ

Kĩndũ o gĩothe mũndũ ũcio ũrĩ na thahu angĩhutia nĩ kĩrĩgĩaga thahu, nake mũndũ ũcio ũkĩhutĩtie arĩkoragwo na thahu o nginya hwaĩ-inĩ.’”