Ndari 20

Na mweri wa mbere, kĩrĩndĩ gĩothe gĩa ciana cia Isiraeli gĩgĩkinya werũ-inĩ wa Zini, na andũ acio makĩambĩrĩria gũikara Kadeshi. Na kũu nĩkuo Miriamu aakuĩrĩire na agĩthikwo.

Na rĩrĩ, gũtiarĩ na maĩ ma kũnyuo nĩ kĩrĩndĩ, magĩgĩcokanĩrĩra hamwe magĩũkĩrĩra Musa na Haruni

Andũ acio maatetagia Musa makĩmwĩraga atĩrĩ: “Na arĩ korũo nĩ twakuire rĩrĩa ariũ a ithe witũ maakuire marĩ mbere ya Yahweh

Nĩ kĩĩ gĩatũmire mũrehe kĩũngano kĩa Yahweh werũ-inĩ ũyũ tũkuĩre gũkũ hamwe na mahiũ maitũ

Na nĩ kĩĩ gĩatũmire mũtũrute Misiri mũtũrehe kũndũ gũkũ kũũru ũũ? Gũkũ ti kũndũ gwa kũhandwo mbegũ na ngũyũ na thabibũ na makomamanga, o na gũtirĩ maĩ ma kũnyua.”

Nao Musa na Haruni makiuma hau mbere ya kĩũngano magĩthiĩ mũromo-inĩ wa hema ya gũtũnganwo na makĩĩgũithia magĩturumithia mothiũ mao thĩ, naguo riri wa Yahweh ũkĩambĩrĩria kũmoimĩrĩra.

Nake Yahweh akĩra Musa atĩrĩ:

“Oya rũthanju, na mũrĩ na Haruni mũrũ wa nyũkwa mwĩte kĩrĩndĩ gĩcokanĩrĩre hamwe, mũcoke mwarĩrie ihiga makĩĩonagĩra nĩguo rĩrute maĩ, na ũmarutĩre maĩ hau ihiga-inĩ rĩu nĩguo ũhe kĩrĩndĩ kĩu o hamwe na mahiũ mao kĩndũ gĩa kũnyua.”

Kwoguo Musa akĩoya rũthanju rũu hau mbere ya Yahweh, o ta ũrĩa aamwathĩte

Musa na Haruni magĩcoka magĩta kĩũngano gĩgĩcokanĩrĩra hau mbere ya ihiga, nake akĩmeera atĩrĩ: “Rĩu ta thikĩrĩriai inyuĩ aremi aya! Kaĩ arĩ o mũhaka tũmũrutĩre maĩ ihiga-inĩ rĩrĩ?”

Musa arĩkia kuuga ũguo, akĩoya guoko gwake na igũrũ na akĩgũtha ihiga rĩu na rũthanju maita merĩ, namo maĩ maingĩ biũ makĩambĩrĩria gũitĩka, nakĩo kĩrĩndĩ gĩkĩambĩrĩria kũnyua o hamwe na mahiũ mao.

Thutha ũcio Yahweh akĩra Musa na Haruni ũũ: “Tondũ mũtinonania wĩtĩkio harĩ niĩ na mwaga gũtũma ciana cia Isiraeli cione atĩ niĩ ndĩ mwamũre, mũtigaakinyia kĩũngano gĩkĩ bũrũri-inĩ ũrĩa ngaakĩhe.”

Macio nĩmo maĩ ma Meriba, harĩa ciana cia Isiraeli ciateteirie Yahweh, na nĩ ũndũ ũcio akĩĩyonania gatagatĩ-inĩ kao atĩ nĩ mwamũre.

Musa agĩcoka agĩtũma atũmwo kuuma Kadeshi mathiĩ kũrĩ mũthamaki wa Edomu makamwĩre atĩrĩ: “Ũũ nĩguo mũrũ wa thoguo Isiraeli ekuuga, ‘Wee nĩ ũĩ wega mathĩna marĩa mothe tuonete

Maithe maitũ maathiire Misiri, na tũgĩtũũra Misiri mĩaka mĩingĩ, nao Amisiri magĩtũhinyĩrĩria o hamwe na maithe maitũ

Mũthia-inĩ tũgĩkaĩra Yahweh, nake agĩtũigua na agĩtũma mũraika agĩtũruta Misiri, na rĩu nĩ ithuĩ aya tũrĩ gũkũ Kadeshi, itũũra rĩrĩa rĩrĩ mũhaka-inĩ wa bũrũri waku

Ndagũthaitha ũtwĩtĩkĩrie tũtuĩkanĩrie bũrũri-inĩ waku. Tũtigũtuĩkanĩria mũgũnda-inĩ o na ũmwe o na kana mũgũnda wa mĩthabibũ, na tũtikũnyua maĩ gĩthima-inĩ o na kĩmwe. Tũgũthiĩ tũgereire Barabara ya Mũthamaki tũtekũrora mwena wa ũrĩo kana wa ũmotho o nginya tũtuĩkanie bũrũri waku.’”

O na kũrĩ ũguo, Edomu akĩmwĩra atĩrĩ: “Mũtigũtuĩkanĩria bũrũri-inĩ witũ. Na mũngĩka ũguo, ngũka na rũhiũ rwa njora tũcemanie na inyuĩ.”

Nacio ciana cia Isiraeli ikĩmwĩra ũũ: “Tũkũgerera barabara ĩrĩa nene twambatĩte, na angĩkorũo ithuĩ o hamwe na mahiũ maitũ nĩ tũkũnyua maĩ maku, nĩ tũkũrĩha. Gũtirĩ ũndũ ũngĩ tũrenda o tiga gũtuĩkania tũthiĩte na magũrũ.”

No we akiuga atĩrĩ: “Ndũgũtuĩkania.” Edomu arĩkia kuuga ũguo akĩmatũnga akamũtharĩkĩre arĩ hamwe na andũ aingĩ na mbũtũ ĩrĩ hinya

Kwoguo Edomu akĩrega gwĩtĩkĩria Isiraeli atuĩkanĩrie bũrũri-inĩ wake; nĩ ũndũ ũcio Isiraeli akĩhũndũka akĩmweherera.

Ciana cia Isiraeli irĩ kĩrĩndĩ gĩothe ikiuma Kadeshi na igĩthiĩ Kĩrĩma-inĩ kĩa Horu

Nake Yahweh akĩaria na Musa na Haruni Kĩrĩma-inĩ kĩa Horu mũhaka-inĩ wa bũrũri wa Edomu, akĩmeera ũũ:

“Haruni nĩ egũturanĩrũo hamwe na andũ ao. Ndakaingĩra bũrũri-inĩ ũrĩa ngaahe ciana cia Isiraeli, tondũ inyuerĩ nĩ mwaremeire watho wakwa ũhoro-inĩ wĩgiĩ maĩ ma Meriba

Oya Haruni na mũrũwe Eliazaru ũmatware Kĩrĩma-inĩ kĩa Horu

Ũrute Haruni nguo na ũcihumbe mũrũwe Eliazaru, na kũu nĩkuo Haruni egũkuĩra.”

Nĩ ũndũ ũcio Musa agĩka o ta ũrĩa Yahweh aathanĩte, magĩkĩambata Kĩrĩma-inĩ kĩa Horu meroreirũo nĩ kĩrĩndĩ gĩothe

Musa agĩcoka akĩruta Haruni nguo na agĩcihumba mũrũwe Eliazaru. Thutha ũcio Haruni agĩkuĩra kũu kĩrĩma igũrũ. Nao Musa na Eliazaru magĩikũrũka makiuma kũu kĩrĩma-inĩ

Rĩrĩa kĩrĩndĩ gĩothe kĩoonire atĩ Haruni nĩ akua, andũ othe a nyũmba ya Isiraeli magĩcakaya nĩ ũndũ wa Haruni matukũ 30.