Ndari 28

Yahweh agĩcoka akĩra Musa ũũ:

“Atha ciana cia Isiraeli ũciĩre atĩrĩ, ‘Nĩ mwagĩrĩirũo gũtigagĩrĩra atĩ nĩ mwandutĩra igongona rĩakwa, nĩrĩo mũgate wakwa. Magongona makwa ma gũcinwo na mwaki marĩ na mũtararĩko mwega harĩ niĩ magĩrĩire kũrutwo mahinda-inĩ marĩa matuĩtwo.’

“Na ũmeere atĩrĩ, ‘Rĩrĩ nĩrĩo igongona rĩa gũcinwo na mwaki rĩrĩa mũrĩrutagĩra Yahweh: o mũthenya mũrĩrutaga tũtũrũme twĩrĩ twa mwaka ũmwe tũtarĩ na kaũgũ, tũrĩ igongona rĩa njino rĩa kũrutagwo hingo ciothe

Gatũrũme kamwe mũrĩkarutaga rũcinĩ, nako gatũrũme kau kangĩ mũgakaruta hwaĩ-inĩ gũkĩgĩa mairia,

hamwe na mũtu mũhinyu gĩcunjĩ kĩmwe harĩ ikũmi kĩa eba ũtukanĩtio na gĩcunjĩ kĩmwe harĩ inya kĩa hini kĩa maguta ma kũhihwo rĩrĩ igongona rĩa mũtu

Rĩu nĩ igongona rĩa njino rĩa kũrutagwo hingo ciothe, rĩrĩa rĩaambĩrĩirio Kĩrĩma-inĩ gĩa Sinai rĩrĩ rĩa mũtararĩko mwega, rĩrĩ igongona rĩa gũcinwo na mwaki harĩ Yahweh,

hamwe na igongona rĩarĩo rĩa ndibei gĩcunjĩ kĩmwe harĩ inya kĩa hini, harĩ o gatũrũme. Ndibei ĩyo yagĩrĩire gũitwo harĩa hamũre ĩrĩ igongona rĩa ndibei harĩ Yahweh

Nako gatũrũme kau kangĩ mũrĩkarutaga hwaĩ-inĩ gũkĩgĩa mairia. Hamwe na igongona rĩa mũtu na igongona rĩarĩo rĩa ndibei o ta iria irĩrutagwo rũcinĩ, mũrĩrĩrutaga rĩrĩ igongona rĩa gũcinwo na mwaki rĩa mũtararĩko mwega harĩ Yahweh.

“‘No rĩrĩ, mũthenya wa Thabatũ, igongona rĩagĩrĩire gũkorũo rĩrĩ tũtũrũme twĩrĩ twa mwaka ũmwe tũtarĩ na kaũgũ hamwe na icunjĩ igĩrĩ harĩ ikũmi cia gĩthimi kĩa eba cia mũtu mũhinyu ũtukanĩtio na maguta ũrĩ igongona rĩa mũtu, hamwe na igongona rĩarĩo rĩa ndibei

Rĩu nĩ igongona rĩa njino rĩa Thabatũ, hamwe na igongona rĩa njino rĩa kũrutagwo hingo ciothe na igongona rĩarĩo rĩa ndibei.

“‘Kĩambĩrĩria-inĩ kĩa o mweri mwagĩrĩirũo kũrutagĩra Yahweh igongona rĩa njino rĩa tũtegwa twĩrĩ, ndũrũme ĩmwe, na tũtũrũme mũgwanja tũtarĩ na kaũgũ o gatũrũme gakorũo karĩ ka mwaka ũmwe,

hamwe na ithimi ithatũ harĩ ikũmi cia mũtu mũhinyu ũtukanĩtio na maguta ũrĩ igongona rĩa mũtu harĩ o ndegwa na ithimi igĩrĩ harĩ ikũmi cia mũtu mũhinyu ũtukanĩtio na maguta ũrĩ igongona rĩa mũtu harĩ ndũrũme ĩyo ĩmwe,

na gĩcunjĩ kĩmwe harĩ ikũmi kĩa mũtu mũhinyu ũtukanĩtio na maguta ũrĩ igongona rĩa mũtu harĩ o gatũrũme, rĩtuĩke igongona rĩa njino, rĩrĩ na mũtararĩko mwega, rĩrĩ igongona rĩa gũcinwo na mwaki harĩ Yahweh

Na magongona ma cio ma ndibei magĩrĩire gũkorũo marĩ nuthu ya hini ya ndibei harĩ o ndegwa na gĩcunjĩ kĩmwe harĩ ithatũ kĩa hini harĩ ndũrũme ĩyo na gĩcunjĩ kĩmwe harĩ inya kĩa hini harĩ o gatũrũme. Rĩu nĩrĩo igongona rĩa njino rĩrĩa rĩrĩrutagwo o mweri mĩeri-inĩ yothe ya mwaka mũgima

Ningĩ nĩ mũrĩrutagĩra Yahweh kabũri kamwe karĩ igongona rĩa mehia, o hamwe na igongona rĩa njino rĩa kũrutagwo hingo ciothe, na igongona rĩarĩo rĩa ndibei.

“‘Mweri wa mbere, mũthenya wa 14 wa mweri ũcio, nĩ Bathaka ya Yahweh

Naguo mũthenya wa 15 wa mweri ũcio, kũrĩkoragwo na gĩathĩ. Kwa ihinda rĩa thikũ mũgwanja mwagĩrĩirũo kũrĩa mĩgate ĩtarĩ mĩkĩre ndawa ya kũimbia

Mũthenya wa mbere kũrĩkoragwo na kĩgomano kĩamũre. Mũtiagĩrĩirũo kũruta wĩra o na ũmwe mũritũ

Na nĩ mũrĩrutaga igongona rĩa gũcinwo na mwaki harĩ Yahweh rĩa tũtegwa twĩrĩ, ndũrũme ĩmwe, na tũtũrũme mũgwanja o gatũrũme gakorũo karĩ ka mwaka ũmwe. Mwagĩrĩirũo kũruta nyamũ itarĩ na kaũgũ

Mwagĩrĩirũo gũciruta hamwe na magongona ma cio ma mũtu mathondeketwo na mũtu mũhinyu ũtukanĩtio na maguta, ithimi ithatũ harĩ ikũmi harĩ o ndegwa na ithimi igĩrĩ harĩ ikũmi harĩ ndũrũme ĩyo

Mũrĩrutaga gĩcunjĩ kĩmwe harĩ ikũmi nĩ ũndũ wa o gatũrũme harĩ tũtũrũme tũu mũgwanja,

o hamwe na mbũri ĩmwe ĩrĩ igongona rĩa mehia rĩa kũhumbĩra mehia manyu

Mũrĩrutaga magongona macio hatatarĩtwo igongona rĩa njino rĩa rũcinĩ, rĩrĩa rĩrĩkoragwo rĩrĩ igongona rĩa njino rĩa kũrutagwo hingo ciothe

Ũguo nĩguo mũrĩrutaga magongona macio o mũthenya kwa ihinda rĩa thikũ mũgwanja marĩ irio, rĩrĩ igongona rĩa gũcinwo na mwaki rĩa mũtararĩko mwega harĩ Yahweh. Rĩrĩrutagwo hamwe na igongona rĩa njino rĩrĩa rĩrĩrutagwo hingo ciothe na igongona rĩarĩo rĩa ndibei

Naguo mũthenya wa mũgwanja kũrĩkoragwo na kĩgomano kĩamũre. Mũtiagĩrĩirũo kũruta wĩra o na ũmwe mũritũ.

“‘Mũthenya wa maciaro ma mbere, rĩrĩa mũrarutĩra Yahweh igongona rĩa ngano ya mũgethano, mwagĩrĩirũo gũkoragwo na kĩgomano kĩamũre gĩathĩ-inĩ kĩanyu gĩa ciumia. Mũtiagĩrĩirũo kũruta wĩra o na ũmwe mũritũ

Mũrĩrutaga igongona rĩa njino rĩa mũtararĩko mwega harĩ Yahweh rĩa tũtegwa twĩrĩ, ndũrũme ĩmwe, na tũtũrũme mũgwanja o gatũrũme gakorũo karĩ ka mwaka ũmwe,

hamwe na magongona ma cio ma mũtu mathondeketwo na mũtu mũhinyu ũtukanĩtio na maguta, ithimi ithatũ harĩ ikũmi harĩ o ndegwa, na ithimi igĩrĩ harĩ ikũmi harĩ ndũrũme ĩyo ĩmwe,

gĩcunjĩ kĩmwe harĩ ikũmi nĩ ũndũ wa o gatũrũme harĩ tũtũrũme tũu mũgwanja,

o hamwe na kabũri kamwe karĩ igongona rĩa mehia rĩa kũhumbĩra mehia manyu

Mũrĩmarutaga o hamwe na igongona rĩa njino rĩa kũrutagwo hingo ciothe na igongona rĩarĩo rĩa mũtu. Ciagĩrĩire gũkorũo irĩ nyamũ itarĩ na kaũgũ, hamwe na magongona ma cio ma ndibei.