Ndari 6

Yahweh agĩthiĩ na mbere kwaria na Musa, akĩmwĩra ũũ:

“Aria na ciana cia Isiraeli ũciĩre atĩrĩ, ‘Mũndũrũme kana mũndũ-wa-nja angĩĩhĩta mwĩhĩtwa wa mwanya wa gũtũũra arĩ Mũnaziri harĩ Yahweh,

agĩrĩirũo gwĩthema ndibei na indo ingĩ iria ingĩtũma mũndũ arĩĩo. Ndagĩrĩirũo kũnyua thiki ya ndibei kana thiki ya kĩndũ o gĩothe kĩngĩtũma mũndũ arĩĩo. Ndagĩrĩirũo kũnyua kĩndũ gĩthondeketwo na thabibũ, o na kana arĩe thabibũ, irĩ cia mũgethano kana irĩ nyũmithie

Matukũ-inĩ mothe marĩa egũkorũo arĩ Mũnaziri ndagĩrĩirũo kũrĩa kĩndũ o gĩothe kiumanĩte na mũthabibũ, kuuma thabibũ njĩthĩ o nginya makoni.

“‘Matukũ-inĩ mothe marĩa egũkorũo arĩ Mũnaziri, gũtirĩ rwenji rwagĩrĩire kũhĩtũkĩra mũtwe-inĩ wake. Arĩikaraga arĩ mwamũre na njĩra ya kũreka njuĩrĩ ya mũtwe wake ĩkũre o nginya matukũ ma wĩyamũrĩri wake harĩ Yahweh mathire

Ndagĩrĩirũo gũkuhĩrĩria mũndũ mũkuũ matukũ-inĩ mothe marĩa arĩkoragwo amũrĩtwo nĩ ũndũ wa Yahweh

O na ithe kana nyina kana mũrũ wa nyina kana mwarĩ wa nyina angĩkua, ndagĩrĩirũo gwĩthahia, tondũ rũũri rwa gũkorũo arĩ Mũnaziri harĩ Kĩhoti wake rũrĩ mũtwe-inĩ wake.

“‘Arĩkoragwo arĩ mwamũre harĩ Yahweh matukũ-inĩ mothe marĩa arĩkoragwo arĩ Mũnaziri

Ĩndĩ mũndũ angĩkua gĩkuũ kĩa hinahi arĩ hakuhĩ na Mũnaziri ũcio na athahie njuĩrĩ ĩyo ĩrũgamĩrĩire wĩyamũrĩri wake harĩ Yahweh-rĩ, no mũhaka enje mũtwe wake mũthenya ũrĩa agaakorũo agĩĩtheria. Agĩrĩirũo kũmĩenja mũthenya wa mũgwanja

Na mũthenya wa kanana, agĩrĩirũo gũtwara ndutura igĩrĩ kana njui igĩrĩ cia ndirahũgĩ kũrĩ mũthĩnjĩri-Yahweh mũromo-inĩ wa hema ya gũtũnganwo

Nake mũthĩnjĩri-Yahweh akahaarĩria ĩmwe ĩrĩ igongona rĩa mehia nayo ĩyo ĩngĩ ĩrĩ igongona rĩa njino na arute igongona rĩa kũhumbĩra mehia nĩ ũndũ wa mehia macio ma mũndũ ũcio makonainie na mũndũ ũcio mũkuũ. Thutha ũcio agĩrĩirũo gwĩtheria mũtwe mũthenya o ro ũcio

No mũhaka eyamũre rĩngĩ harĩ Yahweh nĩ ũndũ wa matukũ make ma gũkorũo arĩ Mũnaziri, na nĩ agĩrĩirũo gũtwara gatũrũme karĩ mwaka-inĩ wako wa mbere karĩ igongona rĩa mahĩtia. O na kũrĩ ũguo, matukũ macio ma mbere matirĩtaragwo tondũ nĩ eethahirie arĩ Mũnaziri.

“‘Na rĩrĩ, ũyũ nĩguo watho wĩgiĩ Mũnaziri: Rĩrĩa aniina matukũ make ma gũkorũo arĩ Mũnaziri, arĩrehagwo mũromo-inĩ wa hema ya gũtũnganwo

Hau nĩho arĩtwaraga igongona rĩake harĩ Yahweh, na nĩrĩo rĩrĩ: gatũrũme kamwe gatarĩ na kaũgũ karĩ mwaka-inĩ wako wa mbere ka igongona rĩa njino, kamwatĩ kamwe gatarĩ na kaũgũ karĩ mwaka-inĩ wako wa mbere ka igongona rĩa mehia, ndũrũme ĩmwe ĩtarĩ na kaũgũ ya igongona rĩa ũiguano,

gĩkabũ kĩa mĩgate ĩtarĩ mĩkĩre ndawa ya kũimbia ĩthondeketwo na mũtu mũhinyu ũtukanĩtio na maguta, tũmĩgate tũceke tũtekĩrĩtwo ndawa ya kũimbia tũhakĩtwo maguta, na igongona rĩacio rĩa mũtu, hamwe na magongona macio ma ndibei

Mũthĩnjĩri-Yahweh agĩrĩirũo gũcitwara mbere ya Yahweh na arute igongona rĩa mehia rĩa mũndũ ũcio na igongona rĩa njino rĩa mũndũ ũcio

Arĩrutaga ndũrũme ĩyo ĩrĩ igongona rĩa ũiguano harĩ Yahweh hamwe na gĩkabũ kĩu kĩa mĩgate ĩtarĩ mĩkĩre ndawa ya kũimbia, ningĩ mũthĩnjĩri-Yahweh akaruta igongona rĩarĩo rĩa mũtu na igongona rĩarĩo rĩa ndibei.

“‘Mũnaziri ũcio acoke enje njuĩrĩ ya mũtwe wake arĩ hau mũromo-inĩ wa hema ya gũtũnganwo, na oe njuĩrĩ ĩyo ya mũtwe wake ĩrĩa ĩkũrĩte arĩ Mũnaziri na amĩikie mwaki-inĩ ũrĩa ũrĩ rungu rwa igongona rĩa ũiguano

Mũthĩnjĩri-Yahweh agĩrĩirũo kuoya kĩande gĩtherũkie kĩa ndũrũme ĩyo, mũgate ũmwe ũtarĩ mwĩkĩre ndawa ya kũimbia kuuma gĩkabũ-inĩ, na kamũgate kamwe gaceke gatekĩrĩtwo ndawa ya kũimbia, na acigĩrĩre moko-inĩ ma Mũnaziri ũcio thutha wake kwenja rũũri rwake rwa kuonania atĩ nĩ Mũnaziri

Mũthĩnjĩri-Yahweh agĩrĩirũo gũcicũgia mbere na thutha irĩ igongona rĩa gũcũgio mbere ya Yahweh. Kĩu nĩ kĩndũ kĩamũre kĩa mũthĩnjĩri-Yahweh, o hamwe na gĩthũri kĩa igongona rĩa gũcũgio na kũgũrũ kwa igai rĩamũre. Thutha ũcio Mũnaziri ũcio no anyue ndibei.

“‘Ũyũ nĩguo watho wĩgiĩ Mũnaziri ũrĩa wĩhĩtĩte mwĩhĩtwa: Angĩĩhĩta na akorũo na ũhoti wa kũrutĩra Yahweh igongona rĩkĩrĩte kĩrĩa agĩrĩirũo nĩ kũruta arĩ Mũnaziri, nĩ agĩrĩirũo kũhingia mwĩhĩtwa ũcio wake nĩ ũndũ wa watho wĩgiĩ gũkorũo arĩ Mũnaziri.’”

Yahweh agĩcoka akĩra Musa ũũ:

“Ĩra Haruni na ariũ ake atĩrĩ, ‘Ũũ nĩguo mwagĩrĩirũo kũrathima ciana cia Isiraeli. Meeragei atĩrĩ:

“Yahweh arokũrathima na akũmenyagĩrĩre.

Yahweh arotũma ũthiũ wake ũkwarĩre, na agũkinyagĩrie wega wake.

Yahweh arogũtiirĩra gĩthiithi gĩake,na atũme ũgĩage na thayũ.”’

Na no mũhaka magwetage rĩĩtwa rĩakwa harĩ ciana cia Isiraeli, niĩ nĩndĩrĩcirathimaga.”