Ndari 8

Yahweh akĩarĩria Musa, akĩmwĩra ũũ:

“Aria na Haruni ũmwĩre atĩrĩ, ‘Rĩrĩa ũgwakia matawa, matawa macio mũgwanja magĩrĩire kũmũrĩka mwena wa na mbere wa mũtĩ wa kũigĩrĩrũo matawa.’”

Nĩ ũndũ ũcio Haruni agĩka ũũ: Agĩakia matawa maguo nĩ ũndũ wa kũmũrĩka mwena wa na mbere wa mũtĩ wa kũigĩrĩrũo matawa, o ta ũrĩa Yahweh aathĩte Musa

Ũũ nĩguo mũtĩ wa kũigĩrĩrũo matawa wathondekirũo: Waturirũo na nyundo na warĩ wa thahabu; kuuma mũtĩ waguo wa kũrũgamia o nginya mahũa maguo, waturirũo na nyundo. Mũtĩ ũcio wa kũigĩrĩrũo matawa wathondekirũo kũringana na ũrĩa Yahweh oonirie Musa kĩoneki-inĩ.

Yahweh akĩarĩria Musa o rĩngĩ, akĩmwĩra atĩrĩ:

“Oya Alawii kuuma gatagatĩ-inĩ ka ciana cia Isiraeli na ũmamũre

Ũũ nĩguo wagĩrĩirũo kũmamũra: Wagĩrĩirũo kũmaminjaminjĩria maĩ ma gũtheria mehia, na menje mwĩrĩ wao wothe na rwenji, mathambie nguo ciao, na metherie

Macoke moe gategwa na igongona rĩako rĩa mũtu rĩthondeketwo na mũtu mũhinyu ũtukanĩtio na maguta, nawe woe gategwa kangĩ nĩ ũndũ wa igongona rĩa mehia

Ũcoke ũtware Alawii acio mbere ya hema ya gũtũnganwo na ũcokanĩrĩrie kĩrĩndĩ gĩothe gĩa ciana cia Isiraeli

Na warehe Alawii acio mbere ya Yahweh, ciana cia Isiraeli ciagĩrĩirũo kũigĩrĩra Alawii acio moko

Nake Haruni arute Alawii acio marĩ igongona rĩa gũcũgio mbere ya Yahweh kuuma harĩ ciana cia Isiraeli, mahingagie ũtungata wa Yahweh.

“Alawii acio macoke maigĩrĩre moko mao mĩtwe-inĩ ya ndegwa icio. Thutha ũcio ĩmwe ĩrutwo ĩrĩ igongona rĩa mehia nayo ĩyo ĩngĩ ĩrĩ igongona rĩa njino harĩ Yahweh nĩ ũndũ wa kũhumbĩra mehia ma Alawii

Ningĩ ũrũgamie Alawii acio mbere ya Haruni na ariũ ake ũmarute marĩ igongona rĩa gũcũgio harĩ Yahweh

Wagĩrĩirũo kwamũra Alawii kuuma gatagatĩ-inĩ ga ciana cia Isiraeli, na Alawii acio megũtuĩka akwa

Thutha ũcio Alawii magĩrĩirũo gũka matungatage hema-inĩ ya gũtũnganwo. Ũguo nĩguo wagĩrĩirũo kũmamũra na kũmaruta marĩ igongona rĩa gũcũgio

Nĩ gũkorũo acio nĩo maheanĩtwo, makaheanwo kũrĩ niĩ kuuma gatagatĩ-inĩ ga ciana cia Isiraeli. Ngũmoya matuĩke akwa, handũ-inĩ ha marigithathi mothe ma ciana cia Isiraeli

Nĩ gũkorũo irigithathi rĩothe gatagatĩ-inĩ ga ciana cia Isiraeli nĩ rĩakwa, rĩa mũndũ o hamwe na rĩa nyamũ. Nĩ ndamaamũrire matuĩke akwa mũthenya ũrĩa ndoragire marigithathi mothe thĩinĩ wa bũrũri wa Misiri

Nguoya Alawii handũ-inĩ ha marigithathi mothe gatagatĩ-inĩ ga ciana cia Isiraeli

Ngũheana Alawii marĩ andũ arĩa maheanĩtwo kũrĩ Haruni na ariũ ake kuuma gatagatĩ-inĩ ga ciana cia Isiraeli, nĩguo matungatage hema-inĩ ya gũtũnganwo handũ-inĩ ha ciana cia Isiraeli na kũruta igongona rĩa kũhumbĩra mehia ma Aisiraeli, nĩguo gũtikanagĩe na ihũũra gatagatĩ-inĩ ga ciana cia Isiraeli nĩ ũndũ wa andũ a Isiraeli gũkuhĩrĩria harĩa hamũre.”

Musa na Haruni na kĩrĩndĩ gĩothe gĩa ciana cia Isiraeli magĩgĩka Alawii ũguo. Na kũringana na ũrĩa wothe Yahweh aathire Musa wĩgiĩ Alawii, ũguo noguo ciana cia Isiraeli ciamekire

Kwoguo Alawii magĩĩtheria na magĩthambia nguo ciao, thutha ũcio Haruni akĩmaruta marĩ igongona rĩa gũcũgio mbere ya Yahweh. Haruni agĩcoka akĩruta igongona rĩa kũhumbĩra mehia mao nĩguo amamũre

Thutha ũcio Alawii magĩthiĩ gũtungata hema-inĩ ya gũtũnganwo marĩ mbere ya Haruni na ariũ ake. O ta ũrĩa Yahweh aathĩte Musa ũhoro-inĩ wĩgiĩ Alawii, ũguo noguo maamekire.

Na rĩrĩ, Yahweh akĩarĩria Musa akĩmwĩra ũũ:

“Ũndũ ũyũ ũkoniĩ Alawii: Mũndũrũme wothe wa kuuma mĩaka 25 gũthiĩ na igũrũ nĩ arĩingĩraga gĩkundi-inĩ kĩa arĩa marĩ ũtungata-inĩ wa hema ya gũtũnganwo

No thutha wa gũkinyia mĩaka 50, akehera gĩkundi-inĩ kĩu kĩa ũtungata ũcio na agatiga gũtungata rĩngĩ

Ĩndĩ no atungate ariũ a ithe arĩa marũmbũyagia mawĩra hema-inĩ ya gũtũnganwo, no ndagĩrĩirũo kũruta wĩra wa kũu. Ũguo nĩguo wagĩrĩirũo gwĩka ũhoro-inĩ wĩgiĩ Alawii na mawĩra marĩa mehokeirũo.”