Ndari 9

Na rĩrĩ, Yahweh akĩaria na Musa werũ-inĩ wa Sinai mweri-inĩ wa mbere wa mwaka wa kerĩ thutha wao kuuma bũrũri-inĩ wa Misiri, akĩmwĩra atĩrĩ:

“Ciana cia Isiraeli nĩ ciagĩrĩirũo kũhaarĩria igongona rĩa Bathaka ihinda-inĩ rĩrĩa rĩtuĩtwo

Mwagĩrĩirũo kũrĩhaarĩria mũthenya wa 14 wa mweri ũyũ hwaĩ-inĩ gũkĩgĩa mairia, ihinda-inĩ rĩrĩa rĩtuĩtwo. Na mũrĩhaarĩrie kũringana na mawatho ma rĩo mothe na mĩtaratara yarĩo yothe ĩrĩa ĩigĩtwo.”

Nĩ ũndũ ũcio Musa akĩra ciana cia Isiraeli ihaarĩrie igongona rĩa Bathaka

Magĩkĩhaarĩria igongona rĩa Bathaka mweri-inĩ wa mbere, mũthenya wa 14 wa mweri ũcio hwaĩ-inĩ gũkĩgĩa mairia, werũ-inĩ wa Sinai. Kũringana na ũrĩa wothe Yahweh aathĩte Musa, ũguo noguo ciana cia Isiraeli ciekire.

Na rĩrĩ, nĩ kwarĩ na arũme maagĩĩte na thahu nĩ ũndũ wa kũhutia kĩimba kĩa mũndũ, kwoguo matiahaarĩirie igongona rĩa Bathaka mũthenya ũcio. Nĩ ũndũ ũcio arũme acio magĩthiĩ mbere ya Musa na Haruni mũthenya o ro ũcio

makĩmwĩra atĩrĩ: “Tũrĩ na thahu nĩ ũndũ wa kũhutia kĩimba kĩa mũndũ. No nĩ kĩĩ kĩngĩgĩtũma tũgirio kũrutĩra Yahweh igongona ihinda-inĩ rĩrĩa rĩtuĩtwo gatagatĩ-inĩ ga ciana cia Isiraeli?

Nĩ ũndũ ũcio Musa akĩmeera ũũ: “Etererai hau, nyambe njigue ũrĩa Yahweh egwathana ũhoro-inĩ wanyu.”

Nake Yahweh akĩra Musa ũũ:

“Ĩra ciana cia Isiraeli atĩrĩ, ‘Mũndũ o wothe gatagatĩ-inĩ kanyu kana wa njiarũa cianyu iria igooka thutha angĩkaagĩa thahu nĩ ũndũ wa kũhutia kĩimba kana akorũo athiĩte rũgendo rwa kũraya, no mũhaka o nake ahaarĩrie igongona rĩa Bathaka harĩ Yahweh

Magĩrĩirũo kũrĩhaarĩria mweri-inĩ wa kerĩ, mũthenya wa 14 hwaĩ-inĩ gũkĩgĩa mairia. Magĩrĩirũo kũrĩrĩa hamwe na mĩgate ĩtarĩ mĩkĩre ndawa ya kũimbia na nyeni ndũrũ

Matiagĩrĩirũo kũreka kĩndũ o na kĩ kĩarĩo gĩkinyie rũcinĩ, na matiagĩrĩirũo kuuna ihĩndĩ o na rĩmwe rĩarĩo. Magĩrĩirũo kũrĩhaarĩria kũringana na watho wothe wĩgiĩ Bathaka

No angĩkorũo mũndũ ndarĩ na thahu kana ndathiĩte rũgendo na age kũhaarĩria igongona rĩa Bathaka, mũndũ ũcio agĩrĩire kweherio kuuma gatagatĩ-inĩ ka andũ ao, tondũ ndanaruta igongona rĩa Yahweh ihinda-inĩ rĩrĩa rĩtuĩtwo. Mũndũ ũcio agĩrĩire kũũrio nĩ ũndũ wa mehia macio make.

“‘Na angĩkorũo nĩ harĩ mũndũ wa kũngĩ ũikaraga hamwe na inyuĩ, o nake nĩ agĩrĩirũo kũhaarĩria igongona rĩa Bathaka harĩ Yahweh. Agĩrĩirũo kũrũmĩrĩra mawatho marĩa megiĩ Bathaka na mũtaratara wayo ũrĩa ũigĩtwo. Kũrĩkoragwo na watho o ũmwe harĩ inyuĩ, harĩ mũndũ wa kũngĩ na harĩ mũndũ ũciarĩirũo bũrũri-inĩ wanyu.’”

Na rĩrĩ, mũthenya ũrĩa gĩikaro kĩrĩa kĩamũre gĩaakirũo, itu rĩkĩhumbĩra gĩikaro kĩu kĩamũre, o kĩo hema ya Ũira, no gwakinya hwaĩ-inĩ kĩndũ kĩahaanaga ta mwaki gĩgĩikara igũrũ rĩa gĩikaro kĩu kĩamũre o nginya rũcinĩ

Ũguo nĩguo gwathiaga: Itu rĩgakĩhumbĩra mũthenya, nakĩo kĩndũ kĩhaana mwaki gĩgakĩhumbĩra ũtukũ

Rĩrĩa rĩothe itu rĩu rĩehera igũrũ rĩa hema ĩyo, ciana cia Isiraeli no kwambĩrĩria ciambagĩrĩria rũgendo, na harĩa itu rĩarũgamaga, hau nĩ ho ciana cia Isiraeli ciambaga hema ciao.

Yahweh aruta watho ciana cia Isiraeli cikambĩrĩria rũgendo, na Yahweh aruta watho cikamba hema. Itu rĩngĩathiire na mbere gũikara igũrũ rĩa gĩikaro kĩu kĩamũre, maathiaga o na mbere gũikara mambĩte hema

Na itu rĩngĩathiire na mbere gũikara igũrũ rĩa gĩikaro kĩu kĩamũre matukũ maingĩ, Ciana cia Isiraeli ciathĩkagĩra Yahweh cikaga gũthiĩ

Rĩmwe itu nĩ rĩngĩaikarire igũrũ rĩa gĩikaro kĩu kĩamũre o matukũ manini. Yahweh aruta watho makamba hema, na Yahweh aruta watho makambĩrĩria rũgendo

Rĩmwe itu nĩ rĩngĩaikarire o kuuma hwaĩ-inĩ nginya rũcinĩ tu, na itu rĩu rĩehera rũcinĩ, makambĩrĩria rũgendo. Itu rĩngĩeherire, kũrĩ mũthenya kana kũrĩ ũtukũ, no kwambĩrĩria maambagĩrĩria rũgendo

O na angĩkorũo nĩ mĩthenya ĩĩrĩ, mweri ũmwe, kana o na makĩria, rĩrĩa rĩothe itu rĩaikaraga igũrũ rĩa gĩikaro kĩu kĩamũre, Ciana cia Isiraeli ciaikaraga ciambĩte hema na matingĩambĩrĩirie rũgendo. No rĩehera, makambĩrĩria rũgendo

Yahweh aruta watho no kwamba maambaga hema, na Yahweh aruta watho makambĩrĩria rũgendo. Meekire o ũrĩa Yahweh aamathaga meke kũringana na watho ũrĩa Yahweh aaheanaga kũgerera Musa.