Nehemiya 13

Mũthenya ũcio, ibuku rĩa Musa nĩ rĩathomirũo andũ mathikĩrĩirie, na gũkĩoneka rĩandĩkĩtwo atĩ gũtirĩ Mũamoni kana Mũmoabi waagĩrĩirũo kũingĩra o na rĩ kĩũngano-inĩ gĩa Kĩhoti ũrĩa wa ma,

tondũ matiigana gũtũnga ciana cia Isiraeli na mũgate na maĩ, no handũ ha ũguo maarĩhire Balaamu acirume. O na kũrĩ ũguo, Kĩhoti witũ nĩ aagarũrire kĩrumi kĩu gĩgĩtuĩka kĩrathimo

Rĩrĩa maiguire Watho ũcio, makĩambĩrĩria kwamũrania andũ othe arĩa maarĩ a kũngĩ kuuma harĩ Isiraeli.

Mbere ĩyo, Eliashibu ũrĩa metainwo na Tobia, nĩwe warĩ mũthĩnjĩri-Yahweh ũrĩa warũgamĩrĩire rumu cia kũiga indo cia nyũmba ya Kĩhoti witũ

Nĩ aaheete Tobia rumu nene ya kũiga indo, ĩrĩa hau kabere yaigagwo igongona rĩa mũtu, ũbani, na indo cia wĩra wa hekarũ na indo iria ciakoragwo irĩ cia Alawii, aini, na arangĩri a ihingo, nĩcio gĩcunjĩ gĩa ikũmi kĩa ngano na indo ingĩ ta icio, ndibei ya mũhihano, na maguta, o hamwe na mũhothi wa kũheo athĩnjĩri-Yahweh.

Ihinda rĩu rĩothe niĩ ndiarĩ thĩinĩ wa Yahrushalayim, tondũ nĩ ndathiĩte kũrĩ mũthamaki mwaka-inĩ wa 32 wa Mũthamaki Aritashashita wa Babuloni; na ihinda rĩna thutha ũcio ngĩhoya mũthamaki rũtha ngorũo itarĩ kuo

Ngĩũka Yahrushalayim na ngĩona ũndũ ũcio mũũru Eliashibu eekĩte, wa kũhe Tobia rumu ya kũiga indo thĩinĩ wa nja ya nyũmba ya Kĩhoti ũrĩa wa ma

Ũndũ ũcio nĩ wandakaririe mũno, kwoguo ngĩruta indo cia Tobia cia nyũmba na ngĩcikia nja ya rumu ĩyo ya kũiga indo

Thutha ũcio ngĩruta watho, na magĩtheria rumu icio cia kũiga indo; na ngĩcokia indo cia nyũmba ya Kĩhoti ũrĩa wa ma rumu-inĩ icio, hamwe na igongona rĩa mũtu na ũbani.

Ningĩ ngĩmenya atĩ Alawii matiaheagwo indo iria maabatiĩ kũheo, na nĩ ũndũ ũcio Alawii na aini arĩa maarutaga wĩra nĩ maathiĩte, o mũndũ agathiĩ mũgũnda-inĩ wake

Kwoguo ngĩnegenia atongoria ngĩmoria atĩrĩ: “Nĩ kĩĩ gĩtũmĩte nyũmba ya Kĩhoti ũrĩa wa ma ĩtiganĩrio?” Ningĩ ngĩcokanĩrĩria Alawii na ngĩmacokia wĩra-inĩ wao

Nao andũ othe a Yahuda makĩrehe icunjĩ cia ikũmi cia ngano, ndibei ya mũhihano, na maguta rumu-inĩ icio cia kũiga indo

Ngĩcoka ngĩiga Shelemia ũrĩa mũthĩnjĩri-Yahweh, na Zadoku ũrĩa mwandĩki, na Pedaia ũrĩa Mũlawii marũgamagĩrĩre rumu icio cia kũiga indo, nake Hanani mũrũ wa Zakuri mũrũ wa Matania nĩwe wamateithagĩrĩria, tondũ athuri acio nĩ moonagwo marĩ ehokeku. Nĩo meehokeirũo wĩra wa kũgayagĩra ariũ a ithe wao indo iria marabatara.

Ndagũthaitha wee Kĩhoti wakwa ũndirikane ũhoro-inĩ ũcio, na ndũkeherie ciĩko ciakwa njega iria njĩkĩte nĩ ũndũ wa nyũmba ya Kĩhoti wakwa na mawĩra mayo.

Matukũ-inĩ macio-rĩ, nĩ ndonire andũ thĩinĩ wa Yahuda makĩruta wĩra kĩhihĩro-inĩ kĩa ndibei mũthenya wa Thabatũ, makarehe ciohe cia ngano na magaciigĩrĩra igũrũ rĩa ndigiri, ningĩ makarehe ndibei, thabibũ, ngũyũ, na mĩrigo ya mĩthemba yothe thĩinĩ wa Yahrushalayim mũthenya wa Thabatũ. Kwoguo ngĩmakaania matige kwendia indo mũthenya ũcio

Na Aturo arĩa maaikaraga itũũra-inĩ rĩu nĩ maarehaga thamaki na indo cia kwendia cia mĩthemba yothe, magaciendia kũrĩ andũ a Yahuda na Yahrushalayim mũthenya wa Thabatũ

Nĩ ũndũ ũcio ngĩnegenia andũ arĩa maarĩ igweta a Yahuda ngĩmeera atĩrĩ: “Nĩ ũndũ ũrĩkũ ũyũ mũũru mũreka, nginya mũgathahia mũthenya wa Thabatũ?”

Na githĩ ũguo tiguo maithe manyu ma tene meekire, magĩtũma Kĩhoti witũ arehe mathĩna maya mothe harĩ ithuĩ o na harĩ itũũra rĩrĩ? Na rĩu nĩ kuongerera mũrongerera marakara mahiũ kwerekera Isiraeli na njĩra ya gũthahia Thabatũ.”

Na rĩrĩ, rĩrĩa kwambĩrĩirie kũgĩa nduma ihingo-inĩ cia Yahrushalayim mbere ya Thabatũ, ngiuga mĩrango ĩhingwo. Ningĩ ngĩmeera matikae kũmĩhingũra nginya Thabatũ ĩthire, na ngĩiga ndungata imwe ciakwa ihingo-inĩ nĩgetha hatikagĩe mũrigo ũkũingĩrio mũthenya wa Thabatũ

Kwoguo onjorithia na endia a indo cia mĩthemba yothe makĩraara nja ya Yahrushalayim riita rĩmwe kana maita merĩ

Na niĩ ngĩmakaania ngĩmeera atĩrĩ: “Nĩ kĩĩ kĩratũma mũraare mbere ya rũthingo? Mweka ũguo rĩngĩ, ngũmũingata kĩa hinya.” Kuuma hĩndĩ ĩyo matiokire rĩngĩ mũthenya wa Thabatũ.

Na ngĩra Alawii atĩ nĩ maagĩrĩirũo kwĩyamũrĩra Yahweh hingo ciothe na magoka kũrangĩra ihingo nĩguo mũthenya wa Thabatũ ũigwo ũrĩ mwamũre. Wee Kĩhoti wakwa, ririkana ũndũ ũcio o naguo nĩ ũndũ wakwa, na ũnjiguĩre tha tondũ wee nĩ ũiyũirũo nĩ tha.

Ningĩ matukũ-inĩ macio, nĩ ndonire Ayahudi maahikĩtie atumia Aashidodi, Aamoni, na Amoabi

Nuthu ya ariũ ao maaragia ­Kĩashidodi na nuthu yao makaria rũthiomi rwa ikundi cia andũ ngũrani, no gũtirĩ o na ũmwe woĩ kwaria rũthiomi rwa Ayahudi

Kwoguo ngĩmanegenia na ngĩmetĩria kĩrumi na ngĩhũũra arũme amwe na ngĩmamunya njuĩrĩ ngĩmeera ũũ: “Mwĩhĩtei na Kĩhoti atĩ mũtikaneana airĩtu anyu kũrĩ ariũ ao, na mũtikoya mũirĩtu o na ũmwe wao nĩ ũndũ wa ariũ anyu o na kana nĩ ũndũ wa inyuĩ ene.

Na githĩ ũndũ ũcio tiguo watũmire Suleimani Mũthamaki wa Isiraeli ehie? Gatagatĩ-inĩ ka ndũrĩrĩ nyingĩ gũtiarĩ mũthamaki ũngĩ take; na nĩ eendetwo nĩ Kĩhoti wake, na nĩkĩo Kĩhoti aamũtuire mũthamaki wa andũ othe a Isiraeli. No aka a kũngĩ nĩ maatũmire ehie

Na githĩ ti ũndũ ũtangĩĩcirĩrio atĩ inyuĩ nĩ mwĩkĩte ũndũ ũyũ mũũru mũkaagarara watho wa Kĩhoti witũ na njĩra ya kũhikia aka a kũngĩ?”

Mũriũ ũmwe wa Joiada mũrũ wa Eliashibu mũthĩnjĩri-Yahweh ũrĩa mũnene nĩ aatuĩkĩte mũthoniwe wa Sanibalati ũrĩa Mũhoroni. Nĩ ũndũ ũcio ngĩmũingata oime harĩ niĩ.

Wee Kĩhoti wakwa, maririkane nĩ gũkorũo nĩ mathahĩtie ũthĩnjĩri-Yahweh na magathahia kĩrĩkanĩro kĩa athĩnjĩri-Yahweh na Alawii.

Ningĩ ngĩmatheria kuumana na thahu o wothe wa andũ a kũngĩ, na ngĩhe athĩnjĩri-Yahweh na Alawii wĩra, o mũndũ ũtungata-inĩ wake,

na ngĩbanga ũrĩa ngũ irĩrehagwo mahinda marĩa matuĩtwo o hamwe na maciaro ma mbere. Ndagũthaitha wee Kĩhoti wakwa ũndirikane na ũnjĩke wega.