Samueli wa Keerĩ 24
Na o rĩngĩ marakara ma Yahweh makĩrĩrĩmbũkĩra Isiraeli rĩrĩa Daudi aacogeirũo kũmerekera akĩrũo atĩrĩ: “Thiĩ ũgatare andũ a Isiraeli na Yahuda.”
Kwoguo mũthamaki akĩra Joabu mũnene wa mbũtũ ũrĩa maarĩ nake ũũ: “Thiĩ mĩhĩrĩga-inĩ yothe ya Isiraeli, kuuma Dani nginya Biri-shiba, wandĩkithie andũ, nĩgetha menye mũigana wa andũ.”
No Joabu akĩra mũthamaki ũũ: “Yahweh Kĩhoti waku arotũma andũ mongerereke maita 100, na maitho ma mwathi wakwa mũthamaki maroeyonera ũndũ ũcio, no rĩrĩ, nĩ kĩĩ kĩratũma mwathi wakwa mũthamaki ende gwĩka ũndũ ta ũcio?”
Ĩndĩ kiugo kĩa mũthamaki gĩgĩtooria Joabu o hamwe na anene a mbũtũ. Nĩ ũndũ ũcio Joabu na anene a mbũtũ makĩehera mbere ya mũthamaki magĩthiĩ kwandĩkithia andũ a Isiraeli
Makĩringa Jorodani na makĩamba hema Aroeru, mwena wa ũrĩo wa itũũra rĩrĩa rĩrĩ gatagatĩ ka mũkuru, kwerekera Agadi na magĩthiĩ nginya Jazeru
Thutha ũcio magĩthiĩ nginya Gileadi na bũrũri-inĩ wa Tahatimu-hodishi na magĩthiĩ na mbere nginya Dani-jaani na magĩthiũrũrũka magĩthiĩ Sidoni
Magĩcoka magĩkinya handũ harĩa hairigĩre ha Turo na matũũra-inĩ mothe ma Ahivi na ma Akanaani, na marigĩrĩrio-inĩ magĩkinya Negebu ya Yahuda thĩinĩ wa Biri-shiba
Nĩ ũndũ ũcio magĩthiĩ bũrũri-inĩ ũcio wothe na magĩcoka Yahrushalayim mũthia-inĩ wa mĩeri kenda na thikũ 20
Joabu agĩkĩnengera mũthamaki mũigana wa andũ arĩa maandĩkithirio. Andũ a Isiraeli maarĩ njamba cia ita 800,000 irĩ na hiũ cia njora, nao arũme a Yahuda maarĩ 500,000.
No ngoro ya Daudi ĩkĩĩrira thutha wake gũtara andũ. Daudi agĩkĩra Yahweh ũũ: “Nĩ njĩhĩtie mũno nĩ ũndũ wa gwĩka ũndũ ũyũ. Na rĩu wee Yahweh, ndagũthaitha wohere ndungata yaku mahĩtia mayo, nĩ gũkorũo nĩ njĩkĩte ũndũ wa ũrimũ mũno.”
Rĩrĩa Daudi ookĩrire rũcinĩ, kiugo kĩa Yahweh gĩgĩkinyĩra mũnabii Gadi, ũrĩa warĩ muoni cioneki wa Daudi, akĩmwĩra ũũ:
“Thiĩ wĩre Daudi atĩrĩ, ‘Ũũ nĩguo Yahweh oigĩte: “Ndĩrakũhe maũndũ matatũ ma gũthuura. Thuura ũndũ ũmwe ũrĩa ũkwenda ngũrehere.”’”
Kwoguo Gadi akĩingĩra harĩ Daudi na akĩmũũria ũũ: “Ũkwenda mĩaka mũgwanja ya ng’aragu yũke bũrũri-inĩ waku-ĩ? Kana ũkwenda kũũrĩra thũ ciaku mĩeri ĩtatũ igĩgũteng’eria-ĩ? Kana ũkwenda kũgĩe na mũrimũ mũũru thikũ ithatũ bũrũri-inĩ waku? Rĩu wĩcũranie wega ũrĩa ũkwenda njokerie Ũrĩa ũndũmĩte.”
Nĩ ũndũ ũcio Daudi akĩra Gadi ũũ: “Nĩ ndangĩkĩte mũno nĩ tondũ wa ũndũ ũyũ. Ndagũthaitha, reke tũgwe guoko-inĩ kwa Yahweh, nĩ gũkorũo tha ciake nĩ nyingĩ; no ndũkareke ngwe guoko-inĩ kwa mũndũ.”
Yahweh agĩgĩtũma mũrimũ mũũru thĩinĩ wa Isiraeli kuuma rũcinĩ o nginya ihinda rĩrĩa rĩatuĩtwo, ũndũ ũrĩa watũmire andũ 70,000 kuuma Dani nginya Biri-shiba makue
Rĩrĩa mũraika aatambũrũkirie guoko gwake erekeirie itũũra-inĩ rĩa Yahrushalayim nĩgetha arĩanange, Yahweh akĩĩrira nĩ ũndũ wa mũthiro ũcio, na akĩra mũraika ũcio warehagĩra andũ mwanangĩko ũcio ũũ: “Nĩ ũguo rĩu! Rĩu cokia guoko gwaku thĩ.” Mũraika ũcio wa Yahweh aarĩ hakuhĩ na kĩhuuhĩro kĩa Arauna Mũjebusi.
Rĩrĩa Daudi oonire mũraika ũcio woragaga andũ, akĩra Yahweh ũũ: “Niĩ nĩ niĩ njĩhĩtie, na nĩ niĩ njĩkĩte ũndũ mũũru; no ng’ondu ici-rĩ—nĩ atĩa ciĩkĩte? Ndagũthaitha, reke guoko gwaku kũnjũkĩrĩre niĩ o hamwe na nyũmba ya baba.”
Kwoguo Gadi agĩthiĩ kũrĩ Daudi mũthenya ũcio na akĩmwĩra ũũ: “Ambata, wakĩre Yahweh kĩgongona kĩhuuhĩro-inĩ kĩa Arauna Mũjebusi.”
Daudi agĩkĩambata kũringana na uuge wa Gadi, o ta ũrĩa Yahweh aathanĩte
Rĩrĩa Arauna aarorire kĩanda na akĩona mũthamaki na ndungata ciake magĩũka kũrĩ we, o rĩo Arauna agĩthiĩ na akĩinamĩrĩra harĩ mũthamaki aturumithĩtie ũthiũ wake thĩ
Arauna akĩũria atĩrĩ: “Nĩ kĩĩ gĩatũma mwathi wakwa mũthamaki oke kũrĩ ndungata yake?” Daudi akĩmũcokeria ũũ: “Nĩgetha ngũre kĩhuuhĩro kuuma kũrĩ wee njakĩre Yahweh kĩgongona, nĩguo ihũũra rĩrĩ rĩkorete andũ rĩthire.”
No Arauna akĩra Daudi atĩrĩ: “Reke mwathi wakwa mũthamaki akĩoe na arute igongona rĩa kĩrĩa ekuona kĩagĩrĩire. Ĩ ici ng’ombe nĩ ũndũ wa igongona rĩa njino o hamwe na rũbaũ rwa kũhũũra ngano na icoki rĩa ng’ombe ituĩke ngũ
Atĩrĩrĩ wee mũthamaki, ici ciothe Arauna nĩ ahe mũthamaki.” Arauna agĩcoka akĩra mũthamaki ũũ: “Ũroetĩkĩrĩka nĩ Yahweh Kĩhoti waku.”
No rĩrĩ, mũthamaki akĩra Arauna ũũ: “Aca, no mũhaka ndĩkĩgũre kuuma harĩ wee na thogora. Ndikũrutĩra Yahweh Kĩhoti wakwa magongona ma njino itarĩ kĩndũ ndutĩte.” Nĩ ũndũ ũcio Daudi akĩgũra kĩhuuhĩro kĩu o hamwe na ng’ombe icio cekeri 50 cia betha
Na Daudi agĩakĩra Yahweh kĩgongona hau na akĩruta magongona ma njino o hamwe na magongona ma ũiguano. Yahweh agĩgĩthikĩrĩria mathaithana nĩ ũndũ wa bũrũri ũcio, na ihũũra rĩu rĩakorete Isiraeli rĩgĩthira.