Samueli wa Keerĩ 23

Ici nĩcio ciugo cia mũico cia Daudi: “Uuge wa Daudi mũrũ wa Jesii, Na uuge wa mũndũ ũrĩa watũũgĩrĩtio, Mũitĩrĩrie maguta wa Kĩhoti wa Jakubu, Mũini mwega wa nyĩmbo cia Isiraeli.

Roho wa Yahweh nĩ waaririe kũgerera harĩ niĩ; Kiugo gĩake kĩarĩ rũrĩmĩ-inĩ rwakwa.

Kĩhoti wa Isiraeli akĩaria; Rwaro rwa Ihiga rwa Isiraeli akĩnjĩra ũũ: ‘Mũndũ ũrĩa ũraatha andũ angĩkorũo arĩ mũthingu, Agathana arĩ na wĩtigĩri Kĩhoti,

Nĩ ta ũtheri wa rũcinĩ rĩrĩa riũa rĩraratha, Rũcinĩ rũtarĩ na matu. Nĩ ta ũtheri thutha wa mbura, Ũrĩa ũtũmaga nyeki ĩmere gũkũ thĩ.’

Na githĩ ũguo tiguo nyũmba yakwa ĩtariĩ mbere ya Kĩhoti? Nĩ gũkorũo nĩ athondekete kĩrĩkanĩro hamwe na niĩ gĩa gũtũũra tene na tene, Gĩkabangwo maũndũ mothe na gĩkarũmio. Tondũ nĩ gĩa gũtũma ngĩe na ũhonokio mũkinyanĩru na gĩkeno gĩothe, Na githĩ tikĩo atũmaga kĩgaacĩre?

No arũme othe matarĩ kĩene matetwo o ta ihinga cia mĩigua, Nĩ gũkorũo itingĩnyitwo na guoko.

Mũndũ agĩcinyita, Agĩrĩirũo gũkorũo anyitĩte kĩndũ gĩa kĩgera o hamwe na mũtĩ wa itimũ, Na ciagĩrĩirũo gũcinwo biũ na mwaki harĩa irĩ.”

Na rĩrĩ, maya nĩmo marĩĩtwa ma njamba cia ita irĩ hinya cia Daudi: Joshebu-bashebethu Mũtakemoni, mũtongoria harĩ njamba ithatũ cia ita. Aanyitire itimũ rĩake akĩũraga andũ 800 ihinda-inĩ rĩmwe

Nake ũrĩa wamũrũmĩrĩire nĩ Eliazaru mũrũ wa Dodo mũrũ wa Ahohi, aarĩ ũmwe wa njamba icio ithatũ cia ita irĩ hinya iria ciarĩ hamwe na Daudi rĩrĩa cianyũrũragia Afilisti. Maacokanĩrĩire hau nĩ ũndũ wa mbaara, na rĩrĩa arũme a Isiraeli moorire,

akĩrũgama ehandĩte na agĩtharĩkĩra Afilisti akĩmoragaga nginya guoko gwake gũkĩnoga na guoko gwake gũkĩganda nĩ ũndũ wa kũnyita rũhiũ rwa njora. Nĩ ũndũ ũcio Yahweh akĩrehe ũhootani mũnene mũthenya ũcio; na andũ magĩcoka marĩ thutha wake nĩguo makabore andũ acio mooragĩtwo.

Nake ũrĩa wamũrũmĩrĩire aarĩ Shamahu mũrũ wa Agee Mũharari. Afilisti moonganĩte hamwe Lehi, kũrĩa kwarĩ na mũgũnda waiyũire ndengũ; nao andũ makĩũra nĩ ũndũ wa Afilisti acio

No we akĩrũgama gatagatĩ ka mũgũnda ũcio na akĩũgitĩra na agĩthiĩ na mbere gũtharĩkĩra Afilisti acio akĩmoraga, nĩ ũndũ ũcio Yahweh akĩrehe ũhootani mũnene.

Atongoria atatũ harĩ atongoria 30 magĩikũrũka hĩndĩ ya magetha magĩthiĩ kũrĩ Daudi ngurunga-inĩ ya Adulamu, na nĩ haarĩ na gĩkundi kĩa Afilisti kĩaambĩte hema Mũkuru-inĩ wa Refaimu

Hĩndĩ ĩyo Daudi aarĩ mwĩgitio-inĩ, na haarĩ kambĩ ya thigari cia Afilisti yarĩ Bethilehemu

Daudi agĩcoka akĩgweta ũndũ ũrĩa eeriragĩria akiuga atĩrĩ: “Na arĩ korũo no hote kũnyua maĩ kuuma irima-inĩ rĩa maĩ rĩrĩa rĩ hakuhĩ na kĩhingo kĩa Bethilehemu!”

Nĩ ũndũ ũcio njamba icio ithatũ cia ita irĩ hinya igĩtonya kambĩ-inĩ ĩyo ya Afilisti kĩa hinya na igĩtaha maĩ irima-inĩ rĩu rĩa maĩ rĩarĩ hakuhĩ na kĩhingo kĩa Bethilehemu na ikĩrehera Daudi; no we akĩrega kũmanyua na akĩmaita thĩ mbere ya Yahweh

Akiuga atĩrĩ: “Wee Yahweh, kũroaga gũtuĩka ũguo atĩ no njĩke ũndũ ũcio! Hihi no nyue thakame ya arũme mathiĩte makaingĩria mĩoyo yao ũgwati-inĩ?” Agĩkĩrega kũmanyua. Macio nĩmo maũndũ marĩa njamba icio ciake ithatũ cia ita irĩ hinya ciekire.

Abishai mũrũ wa nyina na Joabu mũrũ wa Zeruia aarĩ mũtongoria harĩ njamba ingĩ ithatũ cia ita; aanyitire itimũ rĩake akĩũraga andũ 300, na aarĩ na ngumo ta njamba iria ithatũ cia ita

O na gũtuĩka nĩwe woĩkaine makĩria harĩ njamba icio ingĩ ithatũ cia ita na nĩwe warĩ mũnene wacio, ndaagĩire ũnene ta wa njamba iria cia mbere ithatũ cia ita.

Benaia mũrũ wa Jehoiada aarĩ mũndũ warĩ na ũcamba wekire maũndũ maingĩ ma magegania thĩinĩ wa Kabizeeli. Ooragire ariũ eerĩ a Arieli wa Moabi, na nĩ aaharũrũkire irima-inĩ rĩa maĩ mũthenya ũmwe kwarĩ na mbarabu na akĩũraga mũrũthi

Ningĩ nĩ ooragire Mũmisiri warĩ na ũnene ũtarĩ wa ndũire. O na gũtuĩka Mũmisiri ũcio nĩ aanyitĩte itimũ na guoko, Benaia aamũtharĩkĩire na rũthanju na akĩgutha itimũ rĩu rĩarĩ guoko-inĩ kwa Mũmisiri ũcio, akĩmũũraga na itimũ rĩake mwene

Macio nĩmo maũndũ marĩa Benaia mũrũ wa Jehoiada eekire, na aarĩ na ngumo ta njamba iria ithatũ cia ita irĩ hinya

O na gũtuĩka ooĩkaine nginya gũkĩra njamba icio mĩrongo ĩtatũ, ndaagĩire ũnene ta wa njamba iria ithatũ cia ita. O na kũrĩ ũguo, Daudi nĩ aamũtuire mũnene wa arangĩri ake.

Asaheli mũrũ wa nyina na Joabu aarĩ ũmwe wa njamba icio mĩrongo ĩtatũ cia ita: Elihanani mũrũ wa Dodo wa Bethilehemu,

Shamahu Mũharodi, Elika Mũharodi,

Helezu Mũpaliti, Ira mũrũ wa Ikeshu Mũtekoa,

Abi-ezeri Mũanathothi, Mebunai Mũhushathi,

Zalimoni Mũahohi, Maharai Mũnetofathi,

Helebu mũrũ wa Baana Mũnetofathi, Itai mũrũ wa Ribai wa Gibea ya Abenjamini,

Benaia Mũpirathoni, Hidai wa mĩkuru-inĩ ya Gaashu,

Abi-aliboni Mũaribathi, Azamavethu Mũbari-humu,

Eliaba Mũshaaliboni, ariũ a Jasheni, Jonathani,

Shamahu Mũharari, Ahiamu mũrũ wa Sharari Mũharari,

Elifeleti mũrũ wa Ahasabai mũrũ wa Mũmaakathi, Eliamu mũrũ wa Ahithofeli Mũgiloni,

Hezoro Mũkarimeli, Paarai Mũaribi,

Igali mũrũ wa Nathani wa Zoba, Bani Mũgadi,

Zeleki Mũamoni, Naharai Mũbeerothu, ũrĩa wakuuagĩra Joabu mũrũ wa Zeruia indo cia mbaara,

Ira Mũithiri, Garebu Mũithiri,

na Uria Mũhiti—othe maarĩ 37.