Samueli wa Keerĩ 7

Na rĩrĩa mũthamaki aaikarire gwake nyũmba na Yahweh agĩkorũo amũheete ũhurũko kuuma kũrĩ thũ ciake ciothe iria ciamũthiũrũrũkĩirie,

mũthamaki akĩra mũnabii Nathani ũũ: “Atĩrĩrĩ, njikaraga nyũmba-inĩ yakĩtwo na mĩtarakwa no Ithandũkũ rĩa Kĩhoti ũrĩa wa ma rĩikaraga gatagatĩ-inĩ ga itambaya cia hema.”

Nathani agĩcokeria mũthamaki ũũ: “Thiĩ wĩke ũrĩa wothe ũrĩ ngoro-inĩ yaku, nĩ gũkorũo Yahweh arĩ hamwe nawe.”

Ũtukũ o ro ũcio, kiugo kĩa Yahweh gĩgĩkinyĩra Nathani, akĩmwĩra atĩrĩ:

“Thiĩ wĩre Daudi ndungata yakwa atĩrĩ, ‘Ũũ nĩguo Yahweh oigĩte: “Hihi nĩwe ũkũnjakĩra nyũmba njikarage

Nĩ gũkorũo ndirĩ ndaikara thĩinĩ wa nyũmba kuuma mũthenya ũrĩa ndarutire andũ a Isiraeli Misiri nginyagia mũthenya ũyũ wa ũmũthĩ, ĩndĩ ndũũraga thaamathaamaga ndĩ thĩinĩ wa hema na ndĩ thĩinĩ wa gĩikaro kĩrĩa kĩamũre

Ihinda-inĩ rĩrĩa rĩothe ndathiaga hamwe na ciana cia Isiraeli ciothe-rĩ, hihi nĩ harĩ hĩndĩ ndaririe kiugo o na kĩmwe na ũmwe wa atongoria a mĩhĩrĩga ya Isiraeli arĩa ndamũrire marĩithagie andũ akwa Isiraeli, ngiuga ũũ, ‘Mũregete kũnjakĩra nyũmba ya mĩtarakwa nĩkĩ?’”’

Rĩu ĩra Daudi ndungata yakwa atĩrĩ, ‘Ũũ nĩguo Yahweh mũnene wa ita oigĩte: “Ndakũrutire kũndũ gwa kũrĩithia, ũgĩtiga kũrũmĩrĩra rũũru, nĩguo ũtuĩke mũtongoria wa gũtongoragia andũ akwa Isiraeli

Na nĩ ndĩkoragwo hamwe nawe kũrĩa guothe ũrĩthiaga, na nĩ ngũniina thũ ciaku ciothe ciehere mbere yaku; na nĩ ngũgũthondekera rĩĩtwa inene o ta rĩĩtwa rĩa andũ arĩa marĩ igweta thĩinĩ wa thĩ

Nĩ ngũthuura kũndũ nĩ ũndũ wa andũ akwa Isiraeli na ndĩmahe maikarage kuo, na kũu nĩkuo megũtũũra na gũtirĩ hĩndĩ magaacoka gũthumbũrũo; na andũ arĩa aganu matikamahinyĩrĩria rĩngĩ ta ũrĩa meekaga ihinda-inĩ rĩrĩa ihĩtũku,

kuuma mũthenya ũrĩa ndamũrire atiirĩrĩri bũrũri a gũtiirĩrĩra andũ akwa Isiraeli. Na nĩ ngũmũhe ũhurũko kuuma kũrĩ thũ cianyu ciothe.

Rĩrĩa matukũ maku magaakinya mũthia na ũhurũkio hamwe na maithe manyu ma tene, hĩndĩ ĩyo nĩ ngaarahũra mbeũ yaku ĩrĩa ĩgooka thutha waku, mũrũ waku wee mwene, na nĩ ngaahanda ũthamaki wake ũrũme biũ

Ũcio nĩwe ũgaaka nyũmba nĩ ũndũ wa rĩĩtwa rĩakwa, na nĩ ngaahanda gĩtĩ kĩa ũnene kĩa ũthamaki wake kĩrũme tene na tene

Nĩ ngaatuĩka ithe, nake atuĩke mũrũ wakwa. Ahĩtia ngaamũrũngaga na rũthanju rwa andũ na ngamũhũũra na iboko cia ariũ a andũ

Tha ciakwa ndikeheria harĩ we ta ũrĩa ndeheririe harĩ Saulu ũrĩa ndeheririe mbere yaku

Nyũmba yaku na ũthamaki waku igũtũũra irũmĩte tene na tene mbere yaku; gĩtĩ gĩaku kĩa ũnene gĩgũtũũra kĩĩhandĩte wega tene na tene.”’”

Nathani akĩra Daudi ciugo icio ciothe o hamwe na kĩoneki kĩu gĩothe.

Hĩndĩ ĩyo Mũthamaki Daudi akĩingĩra na agĩikara thĩ mbere ya Yahweh na akiuga ũũ: “Niĩ ndĩ ũ, wee Yahweh Mũthamaki Ũrĩa Mũnene? Nayo nyũmba yakwa nĩ kĩĩ atĩ nĩguo ũnginyie haha ũnginyĩtie

Makĩria ma ũguo, wee Yahweh Mũthamaki Ũrĩa Mũnene, ningĩ nĩ warĩtie ũhoro wa nyũmba ya ndungata yaku wĩgiĩ ihinda rĩrĩa rĩgooka thutha-inĩ; na ũyũ nĩ ũtaaro harĩ andũ othe, wee Yahweh Mũthamaki Ũrĩa Mũnene

Nĩ atĩa ũngĩ ndungata yaku Daudi ĩngĩkwĩra na nĩ ũnjũĩ wega, wee Yahweh Mũthamaki Ũrĩa Mũnene

Nĩ ũndũ wa uuge waku na nĩ ũndũ wa gũkorũo wĩtĩkanĩtie na ũndũ ũcio ngoro-inĩ yaku nĩ wĩkĩte maũndũ maya manene na ũkamaguũrĩria ndungata yaku

Nĩkĩo wĩ mũnene, wee Yahweh Mũthamaki Ũrĩa Mũnene. Gũtirĩ ũngĩ ũhaana tawe, na gũtirĩ kĩhoti ũngĩ tiga wee; maũndũ mothe marĩa twĩiguĩrĩire na matũ maitũ nĩ maheanĩte ũira wa ũndũ ũcio

Na nĩ rũrĩrĩ rũrĩkũ rũngĩ rũtariĩ ta andũ aku Isiraeli? Kĩhoti aathiire na akĩmakũũra magĩtuĩka andũ ake, agĩĩthondekera rĩĩtwa na njĩra ya kũmekĩra maũndũ manene na ma magegania. Ũkĩingata ndũrĩrĩ na ihoti ciacio nĩ ũndũ wa andũ aku, arĩa wekũũrĩire kuuma Misiri

Wahandire andũ aku Isiraeli magĩtuĩka andũ aku mwene mahinda mothe; nawe Yahweh, nĩ ũtuĩkĩte Kĩhoti wao.

“Rĩu wee Yahweh Kĩhoti, hingia kĩĩranĩro kĩrĩa wĩranĩire ũhoro-inĩ wĩgiĩ ndungata yaku na nyũmba yayo mahinda-inĩ mothe, na ũroeka o ta ũrĩa wĩranĩire

Rĩĩtwa rĩaku rĩrotũũgĩrio tene na tene, nĩgetha andũ moige atĩrĩ, ‘Yahweh mũnene wa ita nĩwe Kĩhoti wa Isiraeli,’ na nyũmba ya Daudi ndungata yaku ĩroehanda wega mbere yaku

Nĩ gũkorũo wee Yahweh mũnene wa ita Kĩhoti wa Isiraeli nĩ ũguũrĩirie ndungata yaku ũkamĩra atĩrĩ, ‘Nĩ ngũgwakĩra nyũmba.’ Nĩkĩo ndungata yaku ĩrĩ na ũmĩrĩru wa gũkũhoya ihoya rĩrĩ

Na rĩu, wee Yahweh Mũthamaki Ũrĩa Mũnene, wee nĩwe Kĩhoti ũrĩa wa ma, na ciugo ciaku nĩ cia ma, na nĩ wĩrĩire ndungata yaku maũndũ macio mega

Kwoguo ũrokenio nĩ kũrathima nyũmba ya ndungata yaku, na ĩrotũũra tene na tene mbere yaku; nĩ gũkorũo wee Yahweh Mũthamaki Ũrĩa Mũnene, nĩ wĩranĩire, na nyũmba ya ndungata yaku ĩrorathimwo na kĩrathimo gĩaku tene na tene.”