Samueli wa Keerĩ 9

Daudi agĩcoka akĩũria ũũ: “Hihi nĩ harĩ mũndũ o na ũmwe ũtigarĩte wa nyũmba ya Saulu nĩguo hihi ndĩmwĩke maũndũ mega ma ũtugi nĩ ũndũ wa Jonathani?”

Na rĩrĩ, nĩ kwarĩ na ndungata ya nyũmba ya Saulu yetagwo Ziba. Nĩ ũndũ ũcio makĩmĩĩta ĩthiĩ harĩ Daudi, mũthamaki agĩkĩmĩũria atĩrĩ: “Wee nĩwe Ziba?” Nayo ĩgĩcokia ũũ: “Ĩĩ nĩ niĩ ndungata yaku.”

Mũthamaki agĩcoka akĩũria atĩrĩ: “Hihi nĩ harĩ mũndũ o na ũmwe ũtigarĩte wa nyũmba ya Saulu nĩguo ndĩmeĩke maũndũ mega ma ũtugi wa Kĩhoti?” Ziba agĩcokeria mũthamaki ũũ: “Nĩ harĩ mũrũ ũmwe wa Jonathani ũtigarĩte; akoragwo arĩ muonju magũrũ meerĩ.”

Mũthamaki akĩmũũria atĩrĩ: “Arĩ kũ?” Ziba agĩcokeria mũthamaki ũũ: “Arĩ mũciĩ kwa Makiru mũrũ wa Amieli itũũra-inĩ rĩa Lo-debari.”

O hĩndĩ ĩyo Mũthamaki Daudi agĩtũmana agĩĩrũo na akĩrutwo mũciĩ kwa Makiru mũrũ wa Amieli kũu Lo-debari

Rĩrĩa Mefiboshethu mũrũ wa Jonathani mũrũ wa Saulu aakinyire harĩ Daudi, o rĩo akĩĩgũithia agĩturumithia ũthiũ wake thĩ akĩmũinamĩrĩra. Nake Daudi akiuga ũũ: “Mefiboshethu!” nake akiuga: “Ĩ niĩ ũyũ ndungata yaku.”

Daudi akĩmwĩra ũũ: “Ndũgetigĩre nĩ gũkorũo hatarĩ nganja nĩ ngũkuonia maũndũ mega ma ũtugi nĩ ũndũ wa thoguo Jonathani, na nĩ ngũcokia mũgũnda wothe wa gukaguo Saulu harĩ wee, na hingo ciothe ũrĩrĩagĩra metha-inĩ yakwa.”

Aigua ũguo agĩturumithia mũtwe thĩ akĩũria ũũ: “Ndungata yaku nĩyo kĩĩ, atĩ nĩ waririkana ngui nguũ ta niĩ?”

Mũthamaki agĩcoka agĩtũmanĩra Ziba ndungata ya Saulu, akĩmwĩra ũũ: “Kĩrĩa gĩothe kĩarĩ gĩa Saulu o hamwe na nyũmba yake yothe nĩ ndaciheana kũrĩ mũcũkũrũ wa mwathi waku

Wee nĩwe ũrĩmũrĩmagĩra mũgũnda—wee o hamwe na ariũ aku na ndungata ciaku—na nĩwe ũrĩcokanagĩrĩria maciaro maguo nĩgetha gũkoneka irio cia kũrĩa cia andũ a mũcũkũrũ wa mwathi waku. No Mefiboshethu, mũcũkũrũ wa mwathi waku, arĩrĩagĩra metha-inĩ yakwa hĩndĩ ciothe.” Na rĩrĩ, Ziba aarĩ na ariũ 15 na ndungata 20.

Ziba akĩra mũthamaki ũũ: “Ndungata yaku ĩgwĩka ũrĩa wothe mũthamaki aatha ndungata yake ĩke.” Nĩ ũndũ ũcio Mefiboshethu aarĩagĩra metha-inĩ ya Daudi o ta ũmwe wa ariũ a mũthamaki

Na rĩrĩ, Mefiboshethu o nake nĩ aarĩ na kamwana geetagwo Mika; na arĩa othe maaikaraga mũciĩ gwa Ziba magĩtuĩka ndungata cia Mefiboshethu

Na Mefiboshethu agĩgĩikara Yahrushalayim tondũ hĩndĩ ciothe aarĩagĩra metha-inĩ ya mũthamaki; na aarĩ muonju magũrũ meerĩ.