Samueli wa Mbere 1
Na rĩrĩ, nĩ kwarĩ na mũndũ wa kuuma Ramathaimu-zofimu gĩcigo-inĩ kĩrĩa kĩrĩ irĩma kĩa Efiraimu wetagwo Elikana, mũrũ wa Jerohamu, mũrũ wa Elihu, mũrũ wa Tohu, mũrũ wa Zufi, Mũefiraimu
Aarĩ na atumia erĩ; ũmwe eetagwo Hana, nake ũcio ũngĩ eetagwo Penina. Penina nĩ aarĩ na ciana, no Hana ndaarĩ na ciana
Mũndũ ũcio nĩ aambataga kuuma itũũra-inĩ rĩake o mwaka o mwaka agathiĩ Shilo gũthathaiya na kũrutĩra Yahweh mũnene wa ita igongona. Na kũu nĩkuo ariũ erĩ a Eli, Hofini na Phinehasi, maatungatagĩra Yahweh marĩ athĩnjĩri-Yahweh.
Mũthenya ũmwe rĩrĩa Elikana aarutire igongona, nĩ aaheire mũtumia wake Penina o hamwe na ariũ ake na aarĩ ake othe icunjĩ cia igongona rĩu,
no akĩhe Hana gĩcunjĩ kĩmwe kĩa mwanya tondũ Hana nĩwe eendete mũno; ĩndĩ Yahweh ndaaheete Hana ciana
Ningĩ mũiruwe aaikaraga akĩmũnyũrũragia nĩguo amũtuurithie tondũ Yahweh ndaamũheete ciana
Ũguo nĩguo eekaga o mwaka o mwaka; rĩrĩa rĩothe Hana aambataga agathiĩ nyũmba-inĩ ya Yahweh, mũiruwe aamũnyũrũragia mũno nginya akarĩra na akaga kũrĩa irio
No mũthuriwe Elikana akĩmũũria atĩrĩ: “Hana, ũrarĩra nĩkĩ, na ũraaga kũrĩa irio nĩkĩ, na nĩ kĩĩ kĩratũma ũkorũo na kĩeha ũguo? Na githĩ niĩ ndikĩrĩte ariũ ikũmi harĩ wee?”
Na rĩrĩ, rĩrĩa maarĩkirie kũrĩa na kũnyua marĩ kũu Shilo, Hana agĩũkĩra. Hĩndĩ ĩyo, Eli mũthĩnjĩri-Yahweh aaikarĩte thĩ gĩtĩ-inĩ hakuhĩ na gĩtugĩ kĩa mũrango wa hekarũ ya Yahweh
Hana aarĩ na marũrũ maingĩ mũno, na akĩambĩrĩria kũhoya Yahweh akĩrĩraga ategũtigithĩria
Akĩĩhĩta mwĩhĩtwa ũyũ: “Wee Yahweh mũnene wa ita, ũngĩtĩkĩra kũrora thĩna ũyũ wa ndungata yaku na ũndirikane na wage kũriganĩrũo nĩ ndungata yaku na ũhe ndungata yaku mwana wa kahĩĩ, nĩ ngaamũneana kũrĩ Yahweh matukũ mothe ma ũtũũro wake, na rwenji rũtikahutia mũtwe wake.”
Na hĩndĩ ĩyo Hana aahoyaga ihinda iraya arĩ mbere ya Yahweh, Eli aaikarĩte amũrorete kanua
Hana aaragia na ngoro, iromo ciake nocio tu ciainainaga no mũgambo wake ndwaiguĩkaga. Nĩ ũndũ ũcio Eli agĩĩciria atĩ Hana nĩ kũrĩĩo arĩĩtwo
Eli agĩkĩmwĩra atĩrĩ: “Ũgũikara ũrĩ mũrĩĩu nginya rĩ? Tiga kũnyua ndibei ĩyo yaku.”
Nake Hana akĩmũcokeria ũũ: “Aca mwathi wakwa, niĩ ndĩ mũtumia ũrĩ na mĩtangĩko mĩnene; ti kũnyua nyuĩte ndibei kana kĩndũ kĩngĩ o gĩothe kĩngĩtũma mũndũ arĩĩo, no nĩ ngoro yakwa ndĩraitũrũra mbere ya Yahweh
Ndũkone ndungata yaku ta arĩ mũtumia ũtarĩ kĩene, tondũ nĩ kwaria ndĩraria nginyagia rĩu ndĩ na ruo rũingĩ na mĩtangĩko.”
Nake Eli akĩmwĩra ũũ: “Thiĩ na thayũ, na Kĩhoti wa Isiraeli arohingia ũndũ ũrĩa wamũhoya.”
Nĩ ũndũ ũcio Hana akĩmwĩra atĩrĩ: “Reke ndungata yaku ĩtĩkĩrĩke maitho-inĩ maku.” Na mũtumia ũcio agĩĩthiĩra na akĩrĩa irio, na ndaacokire gũtuka gĩthiithi rĩngĩ.
Magĩcoka magĩũkĩra rũcinĩ tene makĩinamĩrĩra mbere ya Yahweh, thutha ũcio magĩcoka kwao mũciĩ kũu Rama. Elikana agĩkoma na mũtumia wake Hana, nake Yahweh akĩririkana Hana
Ihinda-inĩ rĩa mwaka ũmwe Hana akĩgĩa nda na agĩciara kahĩĩ, agĩgeta Samueli, tondũ ooigire atĩrĩ, “nĩ gũkahoya ndakahoire harĩ Yahweh.”
Thutha wa ihinda Elikana akĩambata hamwe na andũ othe a nyũmba yake nĩguo akarutĩre Yahweh igongona rĩa o mwaka na akarute igongona rĩake rĩa mwĩhĩtwa
No Hana ndaathiire, nĩ gũkorũo eerire mũthuriwe atĩrĩ: “Rĩrĩa kahĩĩ gaka gagaatigithio kuonga-rĩ, nĩrĩo ngaagatwara; nako karũgame mbere ya Yahweh na gatũũre kuo kuuma hĩndĩ ĩyo gũthiĩ na mbere.”
Nake mũthuriwe Elikana akĩmwĩra ũũ: “Ĩka ũrĩa ũkuona arĩ wega. Ikara gũkũ mũciĩ o nginya rĩrĩa ũgaagatigithia kuonga. Yahweh arohingia ũguo woiga.” Kwoguo mũtumia ũcio agĩikara kũu mũciĩ agĩkarera o nginya rĩrĩa aagatigithirie kuonga.
Na rĩrĩa aagatigithirie kuonga, agĩgatwara Shilo, hamwe na ndegwa ya mĩaka ĩtatũ, eba ĩmwe ya mũtu, na ndigithũ ĩmwe nene ya ndibei, agĩgĩkinya nyũmba-inĩ ya Yahweh kũu Shilo arĩ hamwe na kahĩĩ kau
Magĩcoka magĩthĩnja ndegwa ĩyo na magĩtwara kahĩĩ kau kũrĩ Eli
Nĩ ũndũ ũcio Hana akĩmwĩra ũũ: “Atĩrĩrĩ mwathi wakwa, o ta ũrĩa ũtũũraga muoyo wee mwathi wakwa, niĩ nĩ niĩ mũtumia ũrĩa warũgamĩte haha nawe ngĩhoya Yahweh
Kahĩĩ gaka nĩko ndahoyaga heo, na Yahweh akĩhingia ũrĩa ndamũhoete
Na rĩu na niĩ nĩ ndakaheana kũrĩ Yahweh. Matukũ-inĩ mako mothe, ndakaheana kũrĩ Yahweh.” Nake akĩinamĩrĩra hau mbere ya Yahweh.