Samueli wa Mbere 19

Thutha ũcio Saulu akĩaria na mũrũwe Jonathani na ndungata ciake ciothe ũhoro wĩgiĩ kũũraga Daudi.

Tondũ Jonathani mũrũ wa Saulu nĩ eendete Daudi mũno, Jonathani akĩra Daudi atĩrĩ: “Baba witũ Saulu arenda gũkũũragithia. Ndagũthaitha rũciũ rũcinĩ ũkeehaarĩria ũthiĩ handũ ha hitho na ũikare ho wĩhithĩte

Na niĩ ngaathiĩ ndũgame hakuhĩ na baba mũgũnda-inĩ hau ũgaakorũo ũrĩ. Nĩ ngeera baba ũhoro waku, na ingĩkaamenya kaũndũ o gothe, nĩ ngaatigĩrĩra nĩ ndakwĩra.”

Nĩ ũndũ ũcio Jonathani akĩaria ndeto njega ciĩgiĩ Daudi harĩ ithe Saulu. Agĩkĩmwĩra ũũ: “Mũthamaki ndagĩrĩirũo kwĩhĩria ndungata yake Daudi, nĩ gũkorũo we ndakwĩhĩirie, na maũndũ marĩa agwĩkĩire nĩ makũgunĩte

Aaingĩririe muoyo wake ũgwati-inĩ nĩguo orage Mũfilisti, ũndũ ũrĩa watũmire Yahweh arehere andũ othe a Isiraeli ũhootani mũnene. Wee mwene nĩ weyoneire ũndũ ũcio, na ũgĩkena mũno. Kwoguo-rĩ, nĩ kĩĩ kĩngĩgĩtũma wĩhĩrie thakame ĩtarĩ na mahĩtia na njĩra ya kũũragithia Daudi hatarĩ gĩtũmi?”

Saulu agĩgĩthikĩrĩria Jonathani, na Saulu akĩĩhĩta ũũ: “O ta ũrĩa Yahweh atũũraga muoyo, Daudi ndekũũragwo.”

Thutha ũcio Jonathani agĩta Daudi na akĩmwĩra maũndũ macio mothe. Nĩ ũndũ ũcio Jonathani akĩrehe Daudi kũrĩ Saulu, na agĩthiĩ na mbere gũtungatĩra Saulu o ta mbere ĩyo.

Thutha wa ihinda mbaara ĩgĩtuthũka rĩngĩ, na Daudi agĩthiĩ kũrũa na Afilisti na akĩmoraga njũragano yarĩ nene mũno, nao makĩmũũrĩra.

Naguo roho mũũru kuuma kũrĩ Yahweh ũgĩũka harĩ Saulu aikaire thĩ gwake nyũmba anyitĩte itimũ rĩake na guoko, hĩndĩ ĩyo nake Daudi aahũũraga kĩnanda kĩa mũgeeto

Saulu akĩgeria gũthecereria Daudi rũthingo-inĩ na itimũ, no we akĩeherera Saulu, agĩgĩthecereria itimũ rĩu rũthingo-inĩ. Daudi akĩũra, agĩĩthara ũtukũ ũcio

Thutha-inĩ Saulu agĩtũma atũmwo nyũmba-inĩ ya Daudi mamĩrangĩre na mamũũrage rũcinĩ, no Mikali mũtumia wa Daudi akĩmwĩra atĩrĩ: “Waga gwĩthara ũtukũ ũyũ, rũciũ ũgaakorũo ũrĩ mũndũ mũkuũ.”

O hĩndĩ ĩyo Mikali agĩikũrũkĩria Daudi ndirica-inĩ, nĩgetha ahote kũũra ethare

Mikali agĩkĩoya mũhianano wa terafimu na akĩũkomia ũrĩrĩ-inĩ, agĩcoka akĩigĩrĩra neti ya guoya wa mbũri harĩa Daudi aakomagia mũtwe wake, na akĩũhumbĩra na nguo.

Na rĩrĩ, Saulu agĩtũma atũmwo makagĩre Daudi, no Mikali akĩmeera ũũ: “Nĩ mũrwaru.”

Nĩ ũndũ ũcio Saulu agĩtũma atũmwo acio makarore Daudi, akĩmeera atĩrĩ: “Mũrehei kũrĩ niĩ arĩ ũrĩrĩ-inĩ wake nĩguo ndĩmũũragithie.”

Rĩrĩa atũmwo acio maatonyire thĩinĩ, magĩkora mũhianano wa terafimu ũrĩrĩ igũrũ na neti ya guoya wa mbũri ĩrĩ harĩa Daudi aakomagia mũtwe wake

Saulu akĩũria Mikali atĩrĩ: “Nĩ kĩĩ gĩtũmĩte ũũheenie ũguo na ũkareka thũ yakwa yũre nĩguo ĩĩthare?” Mikali agĩcokeria Saulu ũũ: “Aranjĩrire atĩrĩ, ‘Ndekereria njũre, kana ngũũrage!’”

Na rĩrĩ, Daudi oorire na agĩĩthara, agĩthiĩ Rama kũrĩ Samueli. Agĩkĩmwĩra maũndũ marĩa mothe Saulu aamwĩkĩte. Thutha ũcio Daudi na Samueli magĩthiĩ magĩikara Naiothu

Thutha wa ihinda Saulu akĩrũo ũũ: “Atĩrĩrĩ, Daudi arĩ Naiothu kũu Rama.”

O rĩo Saulu agĩtũma atũmwo makanyite Daudi. Rĩrĩa moonire anabii akũrũ makĩratha mohoro na Samueli arũgamĩte akĩmatongoria, roho wa Kĩhoti ũgĩũka igũrũ rĩa atũmwo acio a Saulu, o nao makĩambĩrĩria gwĩka ta anabii.

Rĩrĩa meerire Saulu ũhoro ũcio, o hĩndĩ ĩyo agĩtũma atũmwo angĩ, na o nao makĩambĩrĩria gwĩka ta anabii. Saulu agĩgĩtũma atũmwo o rĩngĩ, gĩkundi gĩa gatatũ, na o nao makĩambĩrĩria gwĩka ta anabii

Thutha-inĩ o nake agĩthiĩ Rama. Rĩrĩa aakinyire irima-inĩ rĩrĩa inene rĩa maĩ rĩrĩa rĩrĩ Seku, akĩũria ũũ: “Samueli na Daudi marĩ kũ?” Makĩmũcokeria atĩrĩ: “Marĩ Naiothu kũu Rama.”

Na rĩrĩa Saulu aarĩ njĩra-inĩ oima hau athiĩte Naiothu kũu Rama, roho wa Kĩhoti ũgĩũka igũrũ rĩake o nake, agĩgĩthiĩ agĩkaga ta mũnabii o nginya rĩrĩa aakinyire Naiothu kũu Rama

Ningĩ akĩruta nguo ciake, na o nake agĩka ta mũnabii arĩ mbere ya Samueli, agĩgĩkoma hau arĩ njaga mũthenya ũcio wothe na ũtukũ ũcio wothe. Nĩkĩo andũ moigaga atĩrĩ: “Kaĩ o nake Saulu arĩ wa thiritũ ya anabii?”