Samueli wa Mbere 21
Thutha-inĩ Daudi agĩthiĩ Nobu kũrĩ Ahimeleku mũthĩnjĩri-Yahweh. Ahimeleku akĩambĩrĩria kũinaina rĩrĩa moonanire na Daudi, agĩkĩmũũria ũũ: “Nĩ kĩĩ ũrĩ wiki gũtarĩ mũndũ mũrĩ nake?”
Daudi agĩcokeria Ahimeleku mũthĩnjĩri-Yahweh ũũ: “Mũthamaki andũmĩte njĩke ũndũ mũna, no akanjĩra atĩrĩ, ‘Ndũkareke mũndũ o na ũrĩkũ amenye ũhoro wĩgiĩ ũndũ ũrĩa ngũtũmĩte ũgeke o na kana ũhoro wĩgiĩ maũndũ marĩa ngwĩrĩte wĩke.’ Na niĩ nĩ ndĩkanĩire na anake akwa tũcemanie handũ hana
Na rĩu angĩkorũo ũrĩ na mĩgate ĩtano, no ũũhe, o na kana kĩndũ kĩngĩ o gĩothe kĩrĩa ũngĩkorũo nakĩo.”
No mũthĩnjĩri-Yahweh akĩra Daudi ũũ: “Gũtirĩ na mĩgate ĩtarĩ mĩamũre, no mĩgate mĩamũre—angĩkorũo anake acio matihutanĩtie na andũ-a-nja.”
Daudi agĩcokeria mũthĩnjĩri-Yahweh ũũ: “Hatarĩ nganja nĩ twĩthemete kũhutania na andũ-a-nja o ta mahinda marĩa mangĩ ndanakorũo ngĩthiĩ mbaara-inĩ. Angĩkorũo mĩĩrĩ ya anake acio ĩkoragwo ĩrĩ mĩamũre rĩrĩa marathiĩ nginya wĩra-inĩ ũtarĩ mwamũre-rĩ, na githĩ ũmũthĩ matikĩagĩrĩirũo gũkorũo marĩ amũre o na makĩria!”
Kwoguo mũthĩnjĩri-Yahweh akĩmũhe mĩgate mĩamũre, nĩ gũkorũo gũtiarĩ na mĩgate ĩngĩ tiga mĩgate ya magongona, ĩrĩa yeeheretio mbere ya Yahweh nĩgetha haigwo mĩgate ĩngĩ ĩrugĩtwo ica ikuhĩ mũthenya ũrĩa ĩyo yeeheragio.
Na rĩrĩ, mũthenya ũcio ndungata ĩmwe ya Saulu yarĩ kũu, ĩhingĩrĩirio hau mbere ya Yahweh. Ndungata ĩyo yetagwo Doegu Mũedomu, mũnene wa arĩithi a Saulu.
Daudi akĩra Ahimeleku ũũ: “Hihi no ũkorũo na itimũ kana rũhiũ rwa njora gũkũ? Ndinakuua rũhiũ rwakwa rwa njora o na kana matharaita makwa, tondũ mũthamaki andũmire njĩke ũndũ ũcio na ihenya.”
Mũthĩnjĩri-Yahweh aigua ũguo akiuga atĩrĩ: “Rũhiũ rwa njora rwa Goliathu Mũfilisti ũrĩa woragĩire Mũkuru-inĩ wa Ela, rũrĩ haha, ruohetwo na gĩtambaya thutha wa ebodi. Angĩkorũo nĩ ũkwenda kũruoya ũthiĩ naruo, no ũruoe, tondũ noruo rwĩ gũkũ.” Daudi akiuga ũũ: “Gũtirĩ rũngĩ taruo. Rũũnengere.”
Mũthenya ũcio Daudi akĩarahũka na agĩthiĩ na mbere kũũrĩra Saulu, na marigĩrĩrio-inĩ agĩkinya kũrĩ Mũthamaki Akishi wa Gathu
Ndungata cia Akishi ikĩmwĩra atĩrĩ: “Na githĩ ũyũ ti Daudi mũthamaki wa bũrũri? Na githĩ tiwe maainaga ũhoro wake rĩrĩa maathũngũthaga, makiugaga ũũ, ‘Saulu eyũragĩire makiri, Nake Daudi akeyũragĩra ngiri makũmi maingĩ’?”
Daudi akĩiga ciugo icio ngoro-inĩ na akĩigua guoya mũno nĩ ũndũ wa Mũthamaki Akishi wa Gathu
Nĩ ũndũ ũcio agĩĩtua mũgũrũki hau mbere yao na agĩka ta mũgũrũki gatagatĩ-inĩ kao. Aathiaga agĩcoraga marũũri mĩrango-inĩ ya kĩhingo agĩitaga rũta rũkanyũrũrũka nderu-inĩ ciake
Thutha-inĩ Akishi akĩra ndungata ciake ũũ: “Ta rorai muone mũndũ ũyũ nĩ mũgũrũki! Mũmũrehete kũrĩ niĩ nĩkĩ
Hihi nĩ kũnyihĩrũo nyihĩirũo nĩ agũrũki atĩ nĩguo ngorũo ngĩbatara ũyũ ũreka ta mũgũrũki mbere yakwa? Hihi mũndũ ũyũ nĩ agĩrĩirũo kũingĩra nyũmba yakwa?”