Thaburi 102

Yahweh, igua ihoya rĩakwa; Reke kĩrĩro gĩakwa gĩa kũhoya ũteithio gĩgũkinyĩre.

Ndũkahithe ũthiũ waku kuuma harĩ niĩ hĩndĩ ĩrĩa ndĩ na mĩtangĩko. Ndegera gũtũ gwaku; Njĩtĩka na ihenya rĩrĩa ndagũkaĩra.

Nĩ gũkorũo matukũ makwa marathira o ta ndogo, Na mahĩndĩ makwa marakana o ta marĩ mwaki-inĩ.

Ngoro yakwa nĩ ĩringĩkĩte o ta nyeki na ĩkahooha, Tondũ nĩ ndiganagĩrũo nĩ kũrĩa irio ciakwa.

Nĩ ũndũ wa ũrĩa njayaga nyanĩrĩire, Mahĩndĩ makwa manyitanĩte na nyama ciakwa.

Haana ta nyoni ĩrĩa ĩtagwo gakuua-ũrogi ya werũ-inĩ; Ndariĩ ta ndundu nini ĩrĩ kũndũ kwanangĩku.

Ndaaraga itarĩ toro; Haana ta nyoni ĩrĩ iki nyũmba igũrũ.

Mũthenya wothe thũ ciakwa itindaga ikĩnyũrũria. Arĩa manyũrũragia mahũthagĩra rĩĩtwa rĩakwa rĩrĩ kĩrumi.

Nĩ gũkorũo ndĩaga mũhu ũrĩ mũgate wakwa, Na kĩrĩa nyuaga gĩgatukana na maithori,

Nĩ ũndũ wa marakara maku na mang’ũrĩ maku, Tondũ wanjoire na igũrũ ũgĩcoka ũkĩnde.

Matukũ makwa matariĩ ta kĩĩruru kĩrathiĩ gĩgĩthiraga, Na niĩ ndĩrahooha o ta nyeki.

No wee Yahweh ũtũũraga tene na tene, Na ngumo yaku ĩgũtũũra njiarũa-inĩ ciothe.

Hatarĩ nganja nĩ ũkwarahũka ũiguĩre Zayuni tha, Tondũ rĩrĩ nĩrĩo ihinda rĩa kũmĩiguĩra tha; Ihinda rĩrĩa rĩtuĩtwo nĩ ikinyu.

Nĩ gũkorũo ndungata ciaku nĩ ikenagio nĩ mahiga makuo Na nĩ ciendete nginya rũkũngũ rwakuo.

Ndũrĩrĩ nĩ igeetigĩra rĩĩtwa rĩa Yahweh, Na athamaki othe a thĩ metigĩre riri waku.

Tondũ Yahweh nĩ agaaka Zayuni rĩngĩ; Nĩ akooneka arĩ na riri wake.

Nĩ agaathikĩrĩria mahoya ma arĩa anyamariku; Ndakanyarara mahoya mao.

Ũndũ ũyũ wandĩkĩtwo nĩ ũndũ wa rũciaro rũrĩa rũgooka, Nĩgetha andũ arĩa magooka thutha makaagooca Yahu.

Nĩ gũkorũo aroraga thĩ arĩ kũu gwake kwamũre igũrũ, Yahweh nĩ aroraga thĩ arĩ igũrũ,

Nĩgetha aigue gũcaya kwa mũndũ ũrĩa wohetwo, Nĩguo ohore arĩa matuĩrĩirũo gĩkuũ,

Nĩgetha rĩĩtwa rĩa Yahweh rĩmenyithanio Zayuni Na rũgooco rwake rũmenyithanio Yahrushalayim,

Rĩrĩa irĩndĩ cia andũ na mothamaki Macemania hamwe nĩguo matungatĩre Yahweh.

Nĩ aandunyire hinya ũtũũro wakwa ũrĩ gatagatĩ; Nĩ aanyihirie matukũ makwa.

Niĩ ndoigire ũũ: “Wee El wakwa, Ndũkaniine hĩndĩ ĩrĩa ũtũũro wakwa ũrĩ gatagatĩ, O wee mĩaka yaku ĩtũũraga nginya njiarũa na njiarũa.

Tene mũno nĩ waigire mĩthingi ya thĩ, Narĩo igũrũ nĩ wĩra wa moko maku.

Icio nĩ igaathira, no wee nĩ ũgũtũũra; O ta nguo, ciothe nĩ igaathira. Nĩ ũgaacicenjia o ta nguo, na nĩ igaathira ciehere.

No wee ndũgarũrũkaga, na mĩaka yaku gũtirĩ hĩndĩ ĩgaakinya mũthia.

Ciana cia ndungata ciaku igaatũũra na thayũ, Na njiarũa ciacio nĩ igaaikara irũmĩte mbere yaku.”