Thaburi 103

Ngoro yakwa rathima Yahweh; Kĩndũ gĩothe kĩrĩa kĩrĩ thĩinĩ wakwa nĩ kĩgathe rĩĩtwa rĩake rĩamũre.

Kĩrathime Yahweh,wee ngoro ĩno yakwa; Menya gũkanariganĩrũo nĩ maũndũ marĩa mothe ekĩte.

Akuohagĩra mahĩtia maku mothe Na agakũhonia mĩrimũ yaku yothe;

Nĩ akũũraga muoyo waku kuuma irima-inĩ Na agakũhumba ũtugi wake o na tha ciake ta arĩ thũmbĩ.

Nĩ akũhũnagia na indo njega ũtũũro-inĩ waku wothe, Nĩguo wĩthĩ waku ũkerũhagio o ta wa nderi.

Yahweh ekaga maũndũ na ũthingu o na kĩhooto Harĩ arĩa othe mahinyagĩrĩrio.

Nĩ aamenyithirie Musa njĩra ciake, Na akĩmenyithia ariũ a Isiraeli ciĩko ciake.

Yahweh nĩ mũigua tha na mũcayanĩri, Ndahiũhaga kũrakara na nĩ aiyũirũo nĩ ũtugi.

Ndacaragia mahĩtia hingo ciothe, Kana agatũũra arakarĩte tene na tene.

Ndatwĩkĩte kũringana na mehia maitũ, Kana agatũrĩha kũringana na ũrĩa mehia maitũ magĩrĩire kũrĩhwo.

Nĩ gũkorũo o ta ũrĩa igũrũ kũraihanĩrĩirie na thĩ, Noguo ũtugi wake ũrĩ mũnene kwerekera arĩa mamwĩtigĩrĩte.

O ta ũrĩa irathĩro kũraihanĩrĩirie na ithũĩro, No taguo atũthengeirie mehia maitũ matũraihĩrĩrie na ithuĩ.

O ta ũrĩa mũthuri aiguagĩra ariũ ake tha, Yahweh nĩ aiguagĩra tha arĩa mamwĩtigĩrĩte.

Tondũ nĩ oĩ wega ũrĩa tũmbĩtwo, Akaririkana atĩ tũrĩ o rũkũngũ.

Mũndũ-rĩ, matukũ make matariĩ ta ma nyeki; Acanũkaga o ta ihũa rĩa gĩthaka.

No hĩndĩ ĩrĩa rũhuho rwahurutana, rĩtikoragwo ho rĩngĩ, Rĩkahaana ta rĩtarĩ rĩakorũo ho.

No ũtugi wa Yahweh nĩ wa tene na tene harĩ arĩa mamwĩtigĩrĩte, Na ũthingu wake harĩ ciana cia ciana ciao,

Harĩ arĩa marũmagia kĩrĩkanĩro gĩake O hamwe na arĩa merutanagĩria gwathĩkĩra mawatho make.

Yahweh nĩ ahandĩte na akarũmia gĩtĩ gĩake kĩa ũnene igũrũ; Na ũthamaki wake wathaga indo ciothe.

Kĩrathimei Yahweh, inyuĩ araika ake othe, o inyuĩ mũrĩ hinya mũingĩ, O inyuĩ mũhingagia kiugo gĩake, mũgathĩkĩra mũgambo wake.

Kĩrathimei Yahweh, inyuĩ mbũtũ ciake ciothe, O inyuĩ ndungata ciake iria ciĩkaga wendi wake.

Kĩrathimei Yahweh, inyuĩ mawĩra make mothe, Kũndũ guothe kũrĩa athanaga. Ngoro yakwa nĩ ĩkĩrathime Yahweh.