Thaburi 104

Ngoro yakwa, kĩrathime Yahweh. Hĩ! Yahweh Kĩhoti wakwa, wee ũrĩ mũnene mũno. Wĩhumbĩte ũtĩĩku na ũkaru.

Wĩhumbĩte ũtheri ta arĩ nguo; Ũgagĩtambũrũkia igũrũ ta gĩtambaya kĩa hema.

We aigaga mĩgamba ya rumu ciake cia igũrũ maĩ-inĩ marĩa marĩ igũrũ, Agatua matu ngaari yake ya mbarathi, Agathiĩ akuuĩtwo nĩ mathagu ma rũhuho.

Atũmaga araika ake matuĩke maroho, Ndungata ciake agatũma ituĩke mwaki wa kũniinana.

Nĩ ahandĩte thĩ igũrũ rĩa mĩthingi yayo; Gũtirĩ hĩndĩ ĩkeherio harĩa ĩrĩ tene na tene.

Wamĩhumbĩrire na maĩ mariku ta arĩ nguo. Maĩ maarũgamĩte igũrũ rĩa irĩma.

Wamakũũmire, namo makĩũra; Rĩrĩa maaiguire mũgambo wa mũrurumo waku nĩ moorire nĩ ũndũ wa guoya

—Irĩma ikĩambata nayo mĩkuru ĩgĩikũrũka Magĩthiĩ kũrĩa wathondekete nĩ ũndũ wamo.

Nĩ waigire mũhaka ũrĩa matagĩrĩire gũkĩra, Nĩgetha matikanahumbĩre thĩ rĩngĩ.

We ũtũmaga kũgĩe na matherũkĩro mĩkuru-inĩ; Mathereraga gatagatĩ-inĩ ka irĩma.

Nĩ maheaga nyamũ ciothe cia gĩthaka maĩ ma kũnyua; Nĩkuo ndigiri cia gĩthaka iniinagĩra nyota.

Nyoni cia rĩera-inĩ cikaraga igũrũ rĩamo; Cinaga irĩ thĩinĩ wa mathangũ matumanu.

We ũitagĩrĩria irĩma maĩ kuuma rumu-inĩ ciake cia igũrũ. Thĩ nĩ ĩhũnagio nĩ maciaro ma wĩra waku.

We ũtũmaga nyeki ĩkũre nĩ ũndũ wa mahiũ Na mĩmera nĩ ũndũ wa kũhũthĩrũo nĩ andũ, Nĩgetha thĩ ĩmere irio

O na ndibei ĩrĩa ĩtũmaga ngoro ya mũndũ ĩkene, Maguta marĩa matũmaga ũthiũ ũkenge, Na mũgate ũrĩa ũtũũragia ngoro ya mũndũ.

Mĩtĩ ya Yahweh nĩ ĩhũnaga, O yo mĩtarakwa ya Lebanoni ĩrĩa aahandire,

Kũrĩa nyoni ciakaga itara. Mũciĩ wa njũũ nĩ mĩtĩ-inĩ ya mĩthengera.

Irĩma-inĩ iria ndaihu na igũrũ nĩkuo mbũri cia irĩma-inĩ cikaraga; Ndũmba-inĩ cia mahiga nĩkuo rĩũrĩro rĩa ikami.

Nĩ oombire mweri nĩguo ũmenyithanagie mahinda marĩa matuĩtwo; Riũa nĩ rĩũĩ wega hĩndĩ yarĩo ya gũthũa.

Ũrehaga nduma, naguo ũtukũ ũkaingĩra, Rĩrĩa nyamũ ciothe cia gĩthaka ciũrũraga.

Mĩrũthi mĩthĩ ĩraramaga ĩkĩhĩta Na ĩgacaria irio ciayo kuuma kũrĩ El.

Hĩndĩ ĩrĩa riũa rĩaratha, Ĩcokaga imamo-inĩ ciayo ĩgakoma.

Nake mũndũ agathiĩ wĩra-inĩ wake, Akaruta wĩra nginya hwaĩ-inĩ.

Mawĩra maku wee Yahweh kaĩ nĩ maingĩ-ĩ! Mothe ũmarutĩte na njĩra ya ũũgĩ ũrĩa wa ma. Thĩ ĩiyũire indo ciaku.

Kũrĩ na iria, inene mũno na rĩariĩ, Rĩiyũire indo nyingĩ irĩ muoyo itangĩtarĩka, iria nene o na iria nini.

Nĩkuo meri igeragĩra, O na Leviathani, ĩrĩa wombire nĩguo ĩthaakagĩre thĩinĩ warĩo.

Icio ciothe nĩwe cietagĩrĩra Nĩguo ũciheage irio ciacio ihinda rĩrĩa rĩagĩrĩire.

Nĩ icokanagĩrĩria kĩrĩa wacihe. Rĩrĩa wakumbatũra guoko gwaku, nĩ ihũnagio nĩ indo njega.

Rĩrĩa wahitha ũthiũ waku, nĩ itangĩkaga. Ũngĩeheria roho wacio, ikuaga igacoka rũkũngũ-inĩ.

Ũngĩtũma roho waku, nĩ ciũmbagwo, Na ũkerũhia thĩ.

Riri wa Yahweh ũgũtũũra tene na tene. Yahweh nĩ arĩkenagio nĩ mawĩra make.

Aroraga thĩ, nayo ĩkainaina; Ahutagia irĩma, nacio ikoima ndogo.

Ngũtũũra nyinagĩra Yahweh ũtũũro-inĩ wakwa wothe; Ndĩrĩinaga nyĩmbo cia kũgooca Kĩhoti wakwa ihinda rĩrĩa rĩothe ngũtũũra muoyo.

Mecũũrania ma ngoro yakwa marogĩa na mũrio harĩ we. Nĩ ndĩrĩkenaga nĩ ũndũ wa Yahweh.

Arĩa mehagia nĩ makehera thĩinĩ wa thĩ, Na arĩa aganu matigaakorũo kuo rĩngĩ. Ngoro yakwa kĩrathime Yahweh! Hallelu-Yah!