Thaburi 105

Cokeriai Yahweh ngatho, kaĩrai rĩĩtwa rĩake, Menyithaniai mawĩko make gatagatĩ-inĩ ka ikundi cia andũ!

Mũinĩrei, mũkumiei na nyĩmbo, Kĩheanei ũhoro wa mawĩra make mothe marĩa ekĩte ma magegania.

Mwĩrahei nĩ ũndũ wa rĩĩtwa rĩake rĩamũre. Ngoro cia arĩa macaragia Yahweh nĩ icanjamũke.

Caragiai Yahweh o na hinya wake. Caragiai ũthiũ wake hingo ciothe.

Ririkanai mawĩra ma magegania marĩa ekĩte, O na ciama ciake na matuĩro make ma cira makinyanĩru, o macio ma kanua gake.

Inyuĩ mbeũ ya Iburahimu ndungata yake, Inyuĩ ariũ a Jakubu, o inyuĩ aathuurire.

We nĩ Yahweh Kĩhoti witũ. Matuĩro make makinyanĩru marĩ kũndũ guothe thĩinĩ wa thĩ.

Nĩ aririkanaga kĩrĩkanĩro gĩake tene na tene, Kĩĩranĩro kĩrĩa eerĩire nginya njiarũa ngiri,

Kĩrĩkanĩro kĩrĩa aarĩkanĩire na Iburahimu, Na mwĩhĩtwa ũrĩa eehĩtĩire Isaaka,

Ũrĩa aahandire ũrĩ ta watho harĩ Jakubu Na ũrĩ kĩrĩkanĩro gĩa gũtũũra harĩ Isiraeli,

Akiuga atĩrĩ, “Nĩ ngaakũhe bũrũri wa Kanaani Ũtuĩke igai rĩanyu rĩrĩa mũgaĩirũo.”

Hĩndĩ ĩyo nĩ rĩrĩa maarĩ o andũ anini, Andũ anini mũno, na maarĩ ageni bũrũri-inĩ.

Mathamathaga kuuma bũrũri ũmwe nginya ũrĩa ũngĩ, Kuuma ũthamaki ũmwe nginya kũrĩ andũ angĩ.

Ndeetĩkĩririe mũndũ o wothe amahinyĩrĩrie, No nĩ aarũithirie athamaki nĩ ũndũ wao,

Akiuga ũũ: “Mũtikahutie arĩa akwa aitĩrĩrie maguta, Na mũtigeke anabii akwa ũndũ mũũru.”

Nĩ ooigire bũrũri ũgĩe ng’aragu; Akĩniina mũgate wao.

Agĩtũma mũndũ athiĩ mbere yao Nĩwe Jusufu ũrĩa weendirio atuĩke ngombo.

Makĩoha magũrũ make na bĩngũ, Ngingo yake ĩkĩohwo na igera;

Nginya hĩndĩ ĩrĩa kiugo gĩake kĩahingire, Uuge wa Yahweh nĩguo wamũroririe ũkĩmũtheria.

Mũthamaki agĩtũmana ohorũo, Mũtongoria ũcio wa ikundi cia andũ akĩmũrekereria.

Akĩmũtua mwathi wa nyũmba yake, Atuĩke wa gwathaga indo ciake ciothe,

Athage anene a mũthamaki ũrĩa ona kwagĩrĩire Na arutage arĩa akũrũ kũmũkĩra nĩguo magĩe na ũũgĩ.

Thutha ũcio Isiraeli agĩthiĩ Misiri, Jakubu agĩikara arĩ mũgeni bũrũri-inĩ wa Hamu.

Yahweh agĩgĩtũma andũ ake maciarane mũno; Agĩtũma makorũo na hinya gũkĩra thũ ciao,

O icio aarekire ngoro ciacio igarũrũke imene andũ ake, Ikĩbanga gũũkĩrĩra ndungata ciake.

Nake agĩtũma Musa ndungata yake, Na Haruni, ũrĩa aathuurĩte.

Nao makĩonania imenyithia ciake gatagatĩ-inĩ kao, Makĩringa ciama ciake bũrũri-inĩ wa Hamu.

Agĩtũma nduma, na bũrũri ũcio ũgĩtumana; Nao matiaremeire ciugo ciake.

Akĩgarũra maĩ mao magĩtuĩka thakame Na akĩũraga thamaki ciao.

Bũrũri wao ũkĩiyũra ciũra, Nginya tũnyũmba-inĩ twa anene.

Agĩatha ngi itharĩkĩre O na rwagĩ rũtharĩkĩre icigo-inĩ ciao ciothe.

Mbura yao akĩmĩgarũra ĩgĩtuĩka ya mbembe Na agĩtũma rũheni bũrũri-inĩ wao.

Akĩhũũra mĩthabibũ yao o na mĩtĩ yao ya mĩkũyũ Na akiunanga mĩtĩ ĩrĩa yarĩ gĩcigo-inĩ kĩao.

Akiuga ngigĩ itharĩkĩre, Ngigĩ nyingĩ itangĩtarĩka.

Ikĩrĩa mĩmera yothe ya bũrũri, Na ikĩrĩa maciaro ma tĩri.

Agĩcoka akĩũraga marigithathi mothe bũrũri-inĩ wao, Kĩambĩrĩria kĩa ũhoti wao wa ũciari.

Akĩruta andũ ake kuo makuuĩte betha na thahabu; Na gũtirĩ o na ũmwe harĩ mĩhĩrĩga yake wahĩngirũo.

Rĩrĩa maathiire, andũ a Misiri nĩ maakenire, Tondũ nĩ maanyitĩtwo nĩ guoya nĩ ũndũ wa Isiraeli.

Aatambũrũkirie itu nĩguo rĩmathiĩke Na mwaki nĩguo ũmaheage ũtheri ũtukũ.

Meetirie, nake akĩrehe tũmakia arũme; Nĩ aamahũnagia na mũgate kuuma igũrũ.

Aahingũrire rwaro rwa ihiga, namo maĩ magĩtherera; Maathererire magereire werũ-inĩ o ta rũũĩ.

Nĩ gũkorũo nĩ aaririkanire kĩĩranĩro kĩrĩa kĩamũre eerĩire Iburahimu ndungata yake.

Nĩ ũndũ ũcio akĩruta andũ ake kuo marĩ na gĩkeno kĩnene, Andũ acio ake athuure akĩmaruta kuo mena mũkũngũiyo.

Akĩmahe mabũrũri ma ndũrĩrĩ; Makĩgaya indo iria ikundi ingĩ cia andũ ciarutĩte wĩra na kĩyo nĩguo igĩe nacio,

Nĩgetha mamenyagĩrĩre Watho Wake Na mathĩkagĩre mawatho make. Hallelu-Yah!