Thaburi 107
Cokeriai Yahweh ngatho, tondũ nĩ mwega; Ũtugi wake ũtũũraga tene na tene.
Arĩa makũũrĩtwo nĩ Yahweh nĩ moige ũguo, O acio aakũũrire kuuma guoko-inĩ gwa thũ.
Arĩa aacokanĩrĩirie hamwe kuuma mabũrũri-inĩ, Kuuma mwena wa irathĩro na kuuma mwena wa ithũĩro, Kuuma mwena wa rũgongo na kuuma mwena wa mũhuro.
Moorũrire werũ-inĩ, kũndũ gũtaikaragwo; Mationire njĩra ya gũthiĩ itũũra-inĩ kũndũ mangĩatũũrire.
Maarĩ ahũtu na makanyota; Nĩ moorĩtwo nĩ hinya nĩ ũndũ wa kũnoga.
Nĩ maakayagĩra Yahweh hĩndĩ ĩrĩa maarĩ na mĩtangĩko; Nake akamahonokia kuuma thĩna-inĩ ũcio wao.
Aamagereirie njĩra-inĩ ĩrĩa yagĩrĩire Nĩguo makinye itũũra-inĩ kũrĩa mangĩatũũrire.
Andũ nĩ macokerie Yahweh ngatho nĩ ũndũ wa Ũtugi wake. Na tondũ wa mawĩra ma magegania marĩa ekaga nĩ ũndũ wa ariũ a andũ.
Nĩ gũkorũo nĩ anyotorete mũndũ ũrĩa mũnyotu Nake ũrĩa mũhũtu akamũhũnia na indo njega.
Amwe maaikarire nduma-inĩ, o kĩruru-inĩ gĩa gĩkuũ Makanyamarĩka mohetwo na marĩ na mĩnyororo.
Tondũ nĩ maaremeire Ciugo cia El; Naguo ũtaaro wa Ũrĩa ũrĩ Igũrũ Mũno makĩwagĩra gĩtĩo.
Nĩ ũndũ ũcio agĩtũma ngoro ciao ciĩnyihie kũgerera moritũ; Makĩhĩngwo, na gũtiarĩ na mũndũ wa kũmateithia.
Magĩkaĩra Yahweh hĩndĩ ĩrĩa maarĩ na mĩtangĩko; Nake akĩmahonokia kuuma thĩna-inĩ ũcio wao.
Aamarutire nduma-inĩ okũu kĩruru-inĩ gĩa gĩkuũ, Na agĩtua mĩnyororo ĩrĩa moohetwo nayo.
Andũ nĩ macokerie Yahweh ngatho nĩ ũndũ wa ũtugi wake Na tondũ wa mawĩra ma magegania marĩa ekaga nĩ ũndũ wa ariũ a andũ.
Nĩ gũkorũo nĩ oinangĩte mĩrango ya gĩcango Na agatinangia mĩgamba ya kĩgera.
Maarĩ akĩgu na makĩnyamarĩka Nĩ ũndũ wa mehia mao na mahĩtia mao.
Nĩ maanyirire irio cia mĩthemba yothe; Maakuhĩrĩirie ihingo cia gĩkuũ.
Nĩ maakaĩire Yahweh amateithie hĩndĩ ĩrĩa maarĩ na mĩtangĩko; Nake akĩmahonokia kuuma thĩna-inĩ ũcio wao.
Aatũmaga kiugo gĩake akamahonia Na akamahonokia kuuma marima-inĩ marĩa maagũĩte.
Nao nĩ magĩcokerie Yahweh ngatho nĩ ũndũ wa ũtugi wake Na tondũ wa mawĩra ma magegania marĩa ekaga nĩ ũndũ wa ariũ a andũ.
Nĩ marute magongona ma gũcokia ngatho Na maganage mawĩko make mena mũkũngũiyo.
Arĩa mageraga iria-inĩ na meri, O acio mahũũragĩra biacara ciao maĩ-inĩ maingĩ,
Nĩ monete mawĩra ma Yahweh Na mawĩko make ma magegania kũndũ kũrĩa kũriku;
Makona ũrĩa kiugo gĩake gĩtũmaga kĩhuhũkanio kiumĩre, Gĩkoya makũmbĩ ma iria na igũrũ.
Nao makoywo na igũrũ nginya matu-inĩ; Makarikĩra kũndũ kũrĩa kũriku. Ũcamba wao ũgathira nĩ ũndũ wa ũgwati ũrĩa ũrĩ mbere.
Magakĩagaaga na magatũgũga ta mũndũ mũrĩĩu, Na ũũgĩ wao wothe ũgatuĩka wa tũhũ.
Magakaĩra Yahweh hĩndĩ ĩyo marĩ na mĩtangĩko, Nake akamahonokia kuuma thĩna-inĩ ũcio wao.
Akahooreria kĩhuhũkanio kĩu; Makũmbĩ ma iria magakira.
Nao magakena nĩ ũndũ wa iria kũhoorera, Nake akamatongoria nginya gĩcukĩro-inĩ kĩrĩa marenda gũthiĩ.
Andũ nĩ macokerie Yahweh ngatho nĩ ũndũ wa ũtugi wake Na tondũ wa mawĩra ma magegania marĩa ekaga nĩ ũndũ wa ariũ a andũ.
Nĩ mamũtũũgĩrie thĩinĩ wa kĩũngano kĩa andũ, Na mamũkumie kĩama-inĩ gĩa athuri.
Agarũraga njũũĩ igatuĩka werũ Nacio ithima cia maĩ igatuĩka kũndũ kũng’aru,
Bũrũri ũrĩa ũciaraga mũno ũgatuĩka bũrũri mwanangĩku ũrĩ na cumbĩ, Nĩ ũndũ wa waganu wa arĩa maikaraga thĩinĩ waguo.
Agarũraga werũ ũgatuĩka tũria twa maĩ tũrĩ na mathanjĩ, Naguo bũrũri ũrĩa mũũmũ ũgatuĩka ithima cia maĩ.
Atũmaga arĩa ahũtu maikarage kuo, Nĩgetha maake itũũra kũrĩa mangĩikara.
Mahandaga mbeũ mĩgũnda-inĩ na makahanda mĩgũnda ya mĩthabibũ Nĩgetha ĩrute mĩmera ĩrĩ na maciaro.
Amarathimaga nao makongerereka mũno; Ndarekaga mahiũ mao manyihe.
No o rĩngĩ mũigana wao ũkanyiha na magaconorithio Nĩ ũndũ wa kũhinyĩrĩrio, thĩna, o na kĩeha.
Nĩ atũmaga andũ arĩa marĩ igweta manyararũo Na agatũma morũre kũndũ kwanangĩku gũtarĩ njĩra.
No andũ arĩa athĩni nĩ amagitagĩra matikahinyĩrĩrio Na agatũma mbarĩ ciao cingĩhe o ta rũũru.
Andũ arĩa arũngĩrĩru monaga ũndũ ũcio magakena; No andũ arĩa othe matarĩ athingu matumagia tũnua twao.
Mũndũ o wothe mũũgĩ nĩ ekwĩrorera maũndũ macio Na ecũranie mũno ũhoro wa ciĩko cia Yahweh cia ũtugi.