Thaburi 109

Rĩu Kĩhoti, o wee ngumagia, ndũgaikare ũkirĩte.

Nĩ gũkorũo andũ arĩa aganu na arĩa a maheeni matumũraga tũnua twao nĩguo manjũkĩrĩre. Maragia na nĩmĩ ciao maũndũ ma maheeni igũrũ rĩakwa;

Mandigicagĩria na ciugo cia rũmena, Na magatharĩkĩra hatarĩ gĩtũmi.

Ndĩmonagia wendo, ĩndĩ o makanjũkĩrĩra; No nĩ thiaga na mbere kũhoya.

Marĩhaga wega wakwa na ũũru Na wendo wakwa makaũrĩha na rũmena.

Amũra mũndũ mwaganu akorũo na wathani igũrũ rĩake; Guoko-inĩ gwake kwa ũrĩo harorũgama mũkararia.

Rĩrĩa araciirithio-rĩ, arotuĩrũo atĩ nĩ ahĩtĩtie; O na mahoya make nĩ monwo marĩ mehia.

Matukũ make maronyiha; Wĩra wake arĩ mũrori nĩ ũheo mũndũ ũngĩ.

Ciana ciake irotuĩka cia ngoriai, Na mũtumia wake atuĩke wa ndigwa.

Ciana ciake irotuĩka cia kũũrũraga ikĩhoyahoyaga, Igacaragia irio kuuma mĩciĩ yao mĩanangĩku.

Arotahwo indo ciake ciothe nĩ mũndũ ũrĩa ũmũkombithĩtie, Na ageni maromũtunya indo ciake ciothe.

Kũroaga mũndũ wa kũmuonia ũtugi, O na kwage mũndũ ũngĩiguĩra tha ciana icio ciake itigĩtwo itarĩ ithe.

Njiarũa ciake ironiinwo; Rĩĩtwa rĩao rĩrothario thĩinĩ wa rũciaro rũrĩa rũgooka.

Mahĩtia ma maithe make ma tene maroririkanwo nĩ Yahweh, Na mehia ma nyina maroaga gũthario.

Yahweh aroririkanaga hingo ciothe ũrĩa maneka; Na atũme matikanacoke kũririkanwo rĩngĩ gũkũ thĩ.

Nĩ gũkorũo ndaaririkanire kuonania ũtugi, No aaikaraga agĩthingataga mũndũ ũrĩa mũhinyĩrĩrie, ũrĩa mũthĩni, o na ũrĩa mũthuthĩku ngoro Nĩguo amũũrage.

Nĩ eendete kũrumana nĩguo andũ manyitwo nĩ kĩrumi, na nĩ ũndũ ũcio kĩrumi nĩkĩo kĩamũkorire; We ndaarĩ na wendi wa kũrathima, na kwoguo gũtirĩ kĩrathimo aamũkĩrire.

Eehumbĩte irumi ta arĩ nguo yake. Nacio igĩitĩrĩrio mwĩrĩ-inĩ wake ta maĩ, Na mahĩndĩ-inĩ make o ta maguta.

Irumi ciake irotuĩka o ta nguo ĩrĩa ehumbaga Na o ta mũcibi ũrĩa eyohaga hingo ciothe.

Macio nĩmo marĩhi kuuma kũrĩ Yahweh ma mũndũ ũrĩa ũnjũkagĩrĩra O na ma andũ arĩa maragia maũndũ moru igũrũ rĩakwa.

No wee Yahweh Mwathi Ũrĩa Mũnene-rĩ, Njĩka maũndũ mega nĩ ũndũ wa rĩĩtwa rĩaku. Honokia tondũ ũtugi waku nĩ mwega.

Nĩ gũkorũo ndirĩ na hinya na ndĩ mũthĩni, Na ngoro yakwa nĩ ĩthecetwo.

Niĩ nĩ gũthira ndĩrathira o ta kĩĩruru kĩrabuĩria; Hurutĩtwo o ta ngigĩ.

Maru makwa nĩ maregerete nĩ ũndũ wa kwĩhinga kũrĩa; Mwĩrĩ wakwa nĩ mũhĩnju, na nĩ ndĩrorũo nĩ hinya.

Nduĩkĩte kĩndũ gĩa kũnyũrũragio nĩo. Rĩrĩa manyona, mainagia mĩtwe yao.

Ndeithia, wee Yahweh Kĩhoti wakwa; Honokia kũringana na ũtugi waku.

Reke mamenye atĩ guoko gwaku nĩkuo gwĩkĩte ũndũ ũcio; Atĩ wee, o wee Yahweh, nĩwe wĩkĩte ũguo.

O nĩ marumanage, no wee ũrathimanage. Rĩrĩa marahũka manjũkĩrĩre, maroconorithio, No ndungata yaku nĩ ĩcanjamũke.

Andũ arĩa manjũkagĩrĩra marohumbwo gĩconoko; Marohumbwo thoni o ta arĩ kanjũ.

Kanua gakwa karĩgoocaga Yahweh na kĩyo; Ndĩrĩmũkumagia ndĩ harĩa mũingĩ ũnganĩire.

Nĩ gũkorũo we arĩrũgamaga guoko-inĩ kwa ũrĩo kwa mũndũ ũrĩa mũthĩni Nĩguo amũhonokie kuuma harĩ andũ arĩa mamũtuagĩra.