Thaburi 115

Ti ithuĩ, wee Yahweh, ti ithuĩ, No nĩ rĩĩtwa rĩaku wagĩrĩirũo kũgoocithia. Tondũ wa ũtugi waku tondũ wa Ũhoro waku wa ma.

Nĩ kĩĩ kĩngĩgĩtũma ndũrĩrĩ ciũrie atĩrĩ: “Kĩhoti wao arĩ kũ?”

Kĩhoti witũ arĩ igũrũ; We ekaga ũndũ o wothe ũrĩa endaga.

Mĩhianano yao nĩ betha na thahabu, Wĩra wa moko ma andũ.

Nĩ ĩrĩ kanua, no ndĩngĩhota kwaria; Nĩ ĩrĩ maitho, no ndĩngĩhota kuona;

Nĩ ĩrĩ matũ, no ndĩngĩhota kũigua; Nĩ ĩrĩ iniũrũ, no ndĩngĩhota kũigua mũnungo;

Nĩ ĩrĩ moko, no ndĩngĩhota kũnyita kĩndũ; Nĩ ĩrĩ magũrũ, no ndĩngĩhota gũthiĩ; Gũtirĩ mũgambo ĩrutaga na mĩmero yayo.

Andũ arĩa mamĩthondekaga makaahaana o tayo, O hamwe na arĩa othe mamĩĩhokaga.

Atĩrĩrĩ wee Isiraeli, wĩhokage Yahweh —Nĩwe mũteithia wao na nĩwe ngo yao.

Atĩrĩrĩ inyuĩ nyũmba ya Haruni, mwĩhokagei Yahweh —Nĩwe ũmateithagia na nĩwe ngo yao.

Inyuĩ mwĩtigĩrĩte Yahweh, mwĩhokagei Yahweh —Nĩwe ũmateithagia na nĩwe ngo yao.

Yahweh nĩ atũririkanaga na nĩ egũtũrathima; Nĩ ekũrathima nyũmba ya Isiraeli; Nĩ ekũrathima nyũmba ya Haruni.

Nĩ ekũrathima arĩa metigĩrĩte Yahweh, Arĩa anini o na arĩa anene.

Yahweh nĩ egũtũma mũingĩhe, Inyuĩ o hamwe na ciana cianyu.

Mũrorathimwo nĩ Yahweh, Mũũmbi wa igũrũ na thĩ.

Igũrũ-rĩ, nĩ rĩa Yahweh, No thĩ amĩheanĩte kũrĩ ariũ a andũ.

Andũ akuũ matigoocaga Yahweh; O na arĩa othe maikũrũkaga ũkiri-inĩ wa gĩkuũ.

No ithuĩ nĩ tũrĩgoocaga Yahweh Kuuma rĩu nginya tene na tene. HalleluYah!