Thaburi 118

Cokeriai Yahweh ngatho, tondũ nĩ mwega; Ũtugi wake ũtũũraga tene na tene.

Andũ a Isiraeli rĩu nĩ moige ũũ: “Ũtugi wake ũtũũraga tene na tene.”

Andũ a nyũmba ya Haruni rĩu nĩ moige ũũ: “Ũtugi wake ũtũũraga tene na tene.”

Andũ arĩa metigĩrĩte Yahweh rĩu nĩ moige ũũ: “Ũtugi wake ũtũũraga tene na tene.”

Nĩ ndakaĩire Yahu rĩrĩa ndarĩ na mĩtangĩko; Nake Yahu akĩnjĩtĩka na akĩndwara handũ harĩ na ũgitĩri.

Yahweh arĩ mwena wakwa; ndigwĩtigĩra. Mũndũ-rĩ, angĩnjĩka atĩa hihi?

Yahweh arĩ mwena wakwa nĩguo andeithie; Nĩ ngwĩrorera thũ ciakwa ikĩhootwo.

Nĩ kaba kũũrĩra harĩ Yahweh Gũkĩra kwĩhoka andũ.

Nĩ kaba kũũrĩra harĩ Yahweh Gũkĩra kwĩhoka anene.

Ndũrĩrĩ ciothe nĩ ciathiũrũrũkĩirie, No nĩ ũndũ wa rĩĩtwa rĩa Yahweh, Nĩ ndacitooririe.

Nĩ ciathiũrũrũkĩirie, ngĩthiũrũrũkĩrio biũ, No nĩ ũndũ wa rĩĩtwa rĩa Yahweh, Nĩ ndacitooririe.

Ciathiũrũrũkĩirie ta njũkĩ, No ikĩhorio na ihenya o ta mwaki wa mĩigua. Nĩ ũndũ wa rĩĩtwa rĩa Yahweh, Nĩ ndacitooririe.

Ndatindĩkĩrĩirio mũno nĩguo ngũe, No Yahweh akĩndeithia.

Yahu nĩwe mwĩgitio wakwa o na hinya wakwa, Na nĩ atuĩkĩte ũhonokio wakwa.

Mũgambo wa gĩkeno na ũhonokio Ũrĩ hema-inĩ cia arĩa athingu. Guoko kwa ũrĩo kwa Yahweh nĩ kũronania hinya wakuo.

Guoko kwa ũrĩo kwa Yahweh nĩ gũtũũgĩrĩte; Guoko kwa ũrĩo kwa Yahweh nĩ kũronania hinya wakuo.

Ndigũkua, no nĩ ngũtũũra, Nĩguo menyithanie mawĩra ma Yahweh.

Yahu nĩ aaherithirie mũno, Ĩndĩ ndaandekereirie harĩ gĩkuũ.

Hingũrĩrai ihingo cia ũthingu; Ngũtonya thĩinĩ wacio ngooce Yahu.

Gĩkĩ nĩkĩo kĩhingo kĩa Yahweh. Andũ arĩa athingu nĩkĩo marĩtonyagĩra.

Nĩ ngũkũgooca, tondũ nĩ wanjĩtĩkire Na ũgĩtuĩka ũhonokio wakwa.

Ihiga rĩrĩa aaki maaregire Nĩ rĩtuĩkĩte ihiga rĩrĩa inene rĩa mũthingi.

Ũndũ ũcio uumĩte kũrĩ Yahweh; Nĩ wa magegania maitho-inĩ maitũ.

Ũyũ nĩguo mũthenya ũrĩa Yahweh athondekete; Nĩ tũgũkena na tũcanjamũke mũthenya ũyũ.

Atĩrĩrĩ Yahweh, tũrakũhoya ũtũhonokie, twagũthaitha! Tũhe ũhootani Yahweh, twagũthaitha!

Kũrathimwo nĩ ũrĩa ũũkaga na rĩĩtwa rĩa Yahweh; Nĩ twamũrathima inyuĩ kuuma nyũmba-inĩ ya Yahweh.

El nĩ Yahweh; Nĩ atũheaga ũtheri. Ohai nyamũ ya igongona na mũkanda, O nginya hĩa-inĩ cia kĩgongona.

Wee nĩwe El wakwa, na nĩ ngũkũgooca; El wakwa, nĩ ngũgũtũũgĩria.

Cokeriai Yahweh ngatho, tondũ nĩ mwega; Ũtugi wake ũtũũraga tene na tene.