Thaburi 119
Kũrathimwo nĩ andũ arĩa matarĩ ũcuke mĩthiĩre-inĩ yao, Arĩa mathiaga kũringana na watho wa Yahweh.
Kũrathimwo nĩ arĩa mamenyagĩrĩra maũira make, Arĩa mamũcaragia na ngoro yao yothe.
Matiĩkaga ũndũ o wothe ũtarĩ wa ũthingu; Marũmagĩrĩra njĩra ciake.
Wee nĩ ũtwathĩte atĩ tũrũmagie matua maku na kĩyo.
Na arĩ korũo no ndũũrie wĩkindĩru Nĩgetha nũmagĩrĩre imenyithania ciaku!
Hĩndĩ ĩyo niĩ ndingĩconorithio Rĩrĩa ndarũmbũiya maathani maku mothe.
Nĩ ngũkũgooca ndĩ na ngoro nũngĩrĩru Nderuta ũhoro wa matuĩro maku ma ũthingu.
Nĩ ndĩrĩrũmagĩrĩra imenyithania ciaku. Ndũkanandiganĩrie biũ. ב [Beth]
Mũndũ mwĩthĩ-rĩ, angĩkinyanĩria mĩthiĩre yake atĩa? Nĩ na njĩra ya kwĩgitĩra kũringana na kiugo gĩaku.
Niĩ ngũcaragia na ngoro yakwa yothe. Ndũkareke njũre njĩra ndigane na maathani maku.
Nĩ hithĩte uuge waku ngoro-inĩ yakwa Nĩgetha ndikae gũkwĩhĩria.
Ũrorathimwo, wee Yahweh; Ndutaa imenyithania ciaku.
Nĩ menyithanagia na mĩromo yakwa Matuĩro marĩa mothe uugĩte.
Nĩ ngenagĩra maũira maku Gũkĩra indo iria ingĩ ciothe cia goro.
Nĩ ndĩrĩĩcũranagia igũrũ rĩgiĩ matua maku Na maitho makwa megũtũũra macũthĩrĩirie njĩra ciaku.
Nĩ nyendete imenyithania ciaku. Ndikariganĩrũo nĩ kiugo gĩaku. ג [Gimel]
Ĩkĩra ndungata yaku maũndũ ma ũtugi, Nĩguo ndũũre muoyo na nũmagĩrĩre kiugo gĩaku.
Hingũra maitho makwa nĩguo nyone wega Maũndũ ma magegania kuuma watho-inĩ waku.
Niĩ ndĩ mũgeni thĩinĩ wa bũrũri. Ndũkahithe maathani maku kuuma harĩ niĩ.
Nĩ njũrĩtwo nĩ hinya nĩ ũndũ wa kwĩrirĩria Matuĩro maku hingo ciothe.
Nĩ ũrũngaga andũ arĩa etĩi, O acio arume, arĩa moraga njĩra magatigana na maathani maku.
Njehereria kĩnyũrũri o na kũnyararũo, Tondũ nĩ nũmĩrĩire maũira maku.
O na rĩrĩa anene maikara thĩ hamwe marie ũrĩa mekũnjũkĩrĩra, Ndungata yaku ĩĩcũranagia igũrũ rĩgiĩ imenyithania ciaku.
Nĩ nyendete maũira maku; Mau nĩmo ngenagio nĩmo na makandaara. ד [Daleth]
Ngomete ndurumithĩtie mũtwe thĩ rũkũngũ-inĩ. Ndũũria muoyo kũringana na kiugo gĩaku.
Nĩ nyumbũrĩte ũhoro wa njĩra ciakwa, nawe ũkĩnjigua; Nduta imenyithania ciaku.
Ndeithia ndaũkĩrũo nĩ ũrĩa matua maku moigĩte, Nĩgetha ndĩĩcũranagie igũrũ rĩgiĩ mawĩra maku ma magegania.
Nĩ njũrĩtwo nĩ toro nĩ ũndũ wa kĩeha. Njĩkĩra hinya kũringana na kiugo gĩaku.
Njehereria njĩra ya maheeni, Na ũthukĩre watho waku na ũmenyereri .
Nĩ thuurĩte njĩra ya Ũhoro ũrĩa wa ma. Matuĩro maku ma cira ngakĩmaiga mbere yakwa.
Niĩ nĩ nũmĩtie maũira maku. Wee Yahweh, ndũkanareke njonorithio.
Ndĩrĩthingataga na kĩyo njĩra ya maathani maku Tondũ nĩ ũtũmaga ĩgĩe na handũ ngoro-inĩ yakwa. ה [He]
Yahweh, kĩndute njĩra ya imenyithania ciaku, Na ngũtũũra ndĩmĩrũmagĩrĩra nginya mũthia.
He ũtaũku, Nĩgetha nũmagĩrĩre watho waku Na ndĩwathĩkagĩre na ngoro yakwa yothe.
Ndwarĩrĩria njĩra-inĩ ya maathani maku, Tondũ nĩ ĩngenagia.
Erekeria ngoro yakwa kũrĩ maũira maku, No ti kũrĩ maũndũ ma ũcumĩkĩri.
Hũgũra maitho makwa matige kũrora ũndũ wa tũhũ; Ndũũria muoyo njĩra-inĩ yaku.
Rũmia kiugo gĩaku harĩ ndungata yaku, o ĩyo ĩrutĩire gũtũũra ĩgwĩtigĩrĩte.
Njehereria gĩconoko kĩrĩa ndĩtigĩrĩte, Tondũ matuĩro maku nĩ mega.
Ta rora ũrĩa nyoteire matua maku. Kĩnjarahũre ũnjokie muoyo kũringana na ũthingu waku. ו [Waw]
Ĩĩni Yahweh, reke ndĩyonere ũtugi waku, Ndĩyonere ũhonokio waku kũringana na kiugo gĩaku;
Na niĩ nĩ ngũcokeria ũrĩa ũnyũrũragia, Tondũ nĩ ndĩhokete kiugo gĩaku.
Ndũkeherie biũ kiugo kĩa ũhoro wa ma kanua-inĩ gakwa, Tondũ njigaga kĩĩrĩgĩrĩro gĩakwa harĩ matuĩro maku ma cira.
Ngũtũũra njathĩkagĩra watho waku hingo ciothe, Tene na tene.
Na ndĩrĩthiaga itarĩ na guoya o harĩa ndenda, Tondũ nĩ nduĩragia matua maku.
Ndĩrĩaragia ũhoro wa maũira maku ndĩ mbere ya athamaki, Na ndirĩconokaga.
Niĩ nĩ ndĩrĩkenagio nĩ maathani maku, Ti itherũ, nĩ ndĩmendete.
Ndĩrĩtambũrũkagia moko makwa na igũrũ kũrĩ maathani maku, o macio nyendete, Na ngecũrania igũrũ rĩgiĩ imenyithania ciaku. ז [Zayin]
Ririkana kiugo kĩrĩa werire ndungata yaku, Kĩrĩa ũũheaga kĩĩrĩgĩrĩro nakĩo.
Ũndũ ũcio nĩguo ũnyũmagĩrĩria rĩrĩa ndĩranyamarĩka, Tondũ uuge waku nĩ ũndũũrĩtie muoyo.
Nĩ nyũrũragio mũno nĩ andũ arĩa etĩi, No niĩ ndithengaga ngatiganagĩria watho waku.
Nĩ ndirikanaga matuĩro maku ma cira ma tene, wee Yahweh, Na ngeyũmagĩrĩria nĩũndũ wamo.
Nĩ nyitĩtwo nĩ kĩmako kĩnene nĩ ũndũ wa andũ arĩa aganu, Arĩa matiganaga na watho waku.
Imenyithania ciaku nĩ nyĩmbo harĩ niĩ handũ hothe harĩa njikaraga hĩndĩ ĩno ndĩ rũgendo-inĩ rwa gwaku.
Ũtukũ nĩ ndirikanaga rĩĩtwa rĩaku, wee Yahweh, Nĩgetha njathĩkagĩre watho waku.
Ũguo nĩguo menyerete gwĩka Tondũ nĩ nũmĩrĩire matua maku. ח [Heth]
Yahweh nĩwe rwĩga rwakwa; Nĩ njugĩte atĩ nĩ ndĩrĩathĩkagĩra ciugo ciaku.
Ndagũthaitha na ngoro yakwa yothe; Njiguĩra tha kũringana na kiugo gĩaku.
Ngĩgĩthuthurĩa njĩra ciakwa, Nĩguo njokie magũrũ makwa harĩ maũira maku.
Na ngĩkĩhiũka narua na ndicererwo Gwathĩkĩra maathani maku.
Mbũtũ cia andũ arĩa aganu nĩ cindunyĩte indo kĩahinya, Ĩndĩ ndiriganagĩrũo nĩ watho waku.
Ũtukũ gatagatĩ nĩ ndĩũkĩraga gũgũcokeria ngatho Nĩ ũndũ wa matuĩro maku ma ũthingu.
Ndĩ wa ndundu-inĩ ya arĩa othe magwĩtigĩrĩte Na wa arĩa mathĩkagĩra matua maku.
Ũtugi waku ũiyũrĩte thĩinĩ wa thĩ, wee Yahweh; Nduta imenyithania ciaku. ט [Teth]
Nĩ wĩkĩte ndungata yaku maũndũ mega, Wee Yahweh, kũringana na kiugo gĩaku.
Nduta matuĩro mega ma cira na ũhe kũgĩa na ũmenyo, Tondũ nĩ njĩtĩkĩtie maathani maku.
Mbere itananyamarĩka, nĩ ndahĩtĩtie njĩra, No rĩu nĩ njathĩkagĩra uuge waku
Wee ũrĩ mwega na wĩkaga wega. Nduta imenyithania ciaku.
Andũ arĩa etĩi mathugundĩte ndeto cia maheeni ciingoniĩ, No niĩ nũmagĩrĩra matua maku na ngoro yakwa yothe.
Ngoro ciao inorete ta ngurunyu, No niĩ ndĩrĩkenagia na watho waku.
Nĩ ũndũ mwega atĩ nĩ nyamarĩkĩte, Nĩgetha ndĩĩrute imenyithania ciaku.
Watho wa kanua gaku nĩ mwega harĩ niĩ, Gũkĩra makiri ma icunjĩ cia thahabu na betha. י [Yod]
Moko maku nĩmo maanyũmbire na magĩĩthondeka. He ũtaũku, Nĩgetha ndĩĩrute maathani maku.
Arĩa magwĩtigĩrĩte manyonaga magakena, Tondũ kiugo gĩaku nĩkĩo kĩĩrĩgĩrĩro gĩakwa.
Atĩrĩrĩ Yahweh, nĩ njũĩ atĩ matuĩro maku ma cira nĩ ma ũthingu Na atĩ ũũnyamarĩtie nĩ ũndũ wa wĩhokeku waku.
Ihoya rĩakwa nĩ atĩ tha ciaku na ũtugi waku cituĩke cia kũnyũmagĩrĩria, Kũringana na kiugo kĩrĩa werĩire ndungata yaku.
Tha ciaku ironginyĩrĩra, nĩguo thiĩ na mbere gũtũũra muoyo, Tondũ nĩ ngenagio nĩ watho waku.
Andũ arĩa etĩi maroconorithio, Tondũ manjĩkaga ũũru hatarĩ gĩtũmi. No ngwĩcũrania igũrũ rĩgiĩ matua maku.
Arĩa magwĩtigĩrĩte nĩ makĩnjokerere, O acio moĩ maũira maku.
Ngoro yakwa ĩroaga ũcuke ũhoro-inĩ wĩgiĩ imenyithania ciaku, Nĩgetha ndigaconorithio. כ [Kaph]
Nĩ ndĩĩriragĩria ũhonokio waku nginya ngaigua kũringĩka, Tondũ kiugo gĩaku nĩkĩo kĩĩrĩgĩrĩro gĩakwa.
Maitho makwa nĩ kũira mairĩte nĩ ũrĩa ndũire ndoragĩrĩria uuge waku, Ngoria atĩrĩ: “Hihi nĩ rĩ ũkaanyũmĩrĩria?”
Nĩ gũkorũo ndariĩ o ta mondo ya rũũa ĩrĩa yũmĩire ndogo-inĩ, Ĩndĩ ndiriganagĩrũo nĩ imenyithania ciaku.
Ndungata yaku ĩgweterera matukũ maigana? Nĩ rĩ ũgaatuĩra andũ arĩa maanyariraga?
Andũ arĩa etĩi nĩ manyenjagĩra marima, O acio mareganaga na watho waku.
Maathani maku mothe nĩ ma kwĩhokeka. Nĩ nyariragwo nĩ andũ hatarĩ gĩtũmi; ndeithia!
Maarĩ hakuhĩ kũniina njehere thĩinĩ wa thĩ, Ĩndĩ ndiatiganĩirie matua maku.
Ndũũria muoyo nĩ ũndũ wa ũtugi na wendo waku, Nĩgetha njathĩkagĩre maũira ma kanua gaku. ל [Lamed]
Kuuma o tene Yahweh, Kiugo gĩaku gĩtũũraga kũu igũrũ.
Wĩhokeku waku ũtũũraga njiarũa-inĩ ciothe. Nĩ ũhandĩte thĩ ĩkarũma, ĩgathiĩ na mbere gũikara o hau.
Nĩ itũũrĩte kuo nginyagia ũmũthĩ kũgerera matuĩro maku, Tondũ ciothe nĩ ndungata ciaku.
Guca ngenagio nĩ watho waku, Nĩ ingĩthirĩte nĩ ũndũ wa mĩnyamaro yakwa.
Ndirĩ hĩndĩ ngariganĩrũo nĩ matua maku, Tondũ nĩ ũndũũrĩtie muoyo kũgerera harĩ mo.
Niĩ ndĩ waku; honokia, Tondũ nĩ nduĩrĩtie matua maku.
Andũ arĩa aganu metagĩrĩra nĩguo manyanange, Ĩndĩ niĩ nĩ ndĩrĩrũmbũyagia na kĩyo maũira maku.
Nĩ nyonete atĩ ũkinyanĩru o wothe nĩ ũrĩ mĩhaka, No rĩathani rĩaku rĩaramĩte o kwarama. מ [Mem]
Watho waku-rĩ! Kaĩ nĩndĩkĩwendeteĩ! Ndĩĩcũranagia igũrũ rĩaguo mũthenya wothe.
Nĩ kũgerera Maathani maku ũtũmĩte ngĩe na ũũgĩ gũkĩra thũ ciakwa, Tondũ makoragwo hamwe na niĩ tene na tene.
Ndĩ na ũtaũku mũingĩ gũkĩra arutani akwa othe, Tondũ nĩ ndĩĩcũranagia igũrũ rĩgiĩ maũira maku.
Niĩ njĩkaga maũndũ na ũtaũku mũingĩ gũkĩra athuri akũrũ, Tondũ nĩ nũmagĩrĩra matua maku.
Nĩ ndegaga kũgerera njĩra o yothe njũru, Nĩgetha njathĩkagĩre kiugo gĩaku.
Nditiganagĩria matuĩro maku ma cira, Tondũ wee nĩ ũndutĩte.
Uuge waku wĩ rũrĩmĩ-inĩ rwakwa kaĩ wĩ cama-ĩĩ! Gũkĩra ũũkĩ kanua-inĩ gakwa!
Niĩ njĩkaga maũndũ na ũtaũku nĩ ũndũ wa matua maku. Nĩkĩo thũire njĩra o yothe ya maheeni. נ [Nun]
Ũhoro waku nĩ tawa ũmũrĩkagĩra makinya makwa, Na ũtheri ũnyonagia njĩra.
Nĩ ndĩhĩtĩte mwĩhĩtwa, na nĩ ngũũhingia, Atĩ nĩ ndĩrĩrũmagĩrĩra matuĩro maku ma ũthingu.
Nĩ nyamarĩkĩte mũno. Rĩu Yahweh, kĩndũũrie muoyo kũringana na kiugo gĩaku.
Ndagũthaitha wĩtĩkĩre magongona makwa ma kwĩyendera ma kanua gakwa, wee Yahweh, Na ũndute matuĩro maku ma cira.
Hingo ciothe ndindaga nyitĩrĩire mũoyo wakwa na ngundi, Ĩndĩ ndiriganĩirũo nĩ watho waku.
Andũ arĩa aganu nĩ manjigĩire mũtego, No nditiganĩirie matua maku.
Maũira maku makoragwo marĩ igai rĩakwa rĩa gũtũũra, Nĩ gũkorũo nĩmo gĩkeno kĩa ngoro yakwa.
Nĩ nduĩte itua rĩa gwathĩkagĩra matua maku Hĩndĩ ciothe, o nginya ithirĩro. ס [Samekh]
Nĩ thũire methugunda matarĩ ũguni, No watho waku nĩguo nyendete.
Wee nĩwe mwĩgitio wakwa na ngo yakwa, Tondũ kiugo gĩaku nĩkĩo kĩĩrĩgĩrĩro gĩakwa.
Ikarai haraya na niĩ, inyuĩ andũ aya mwĩkaga waganu, Nĩgetha nũmagĩrĩre maathani ma Kĩhoti wakwa.
Ndiirĩrĩra o ta ũrĩa weranĩire na kiugo gĩaku, Nĩguo thiĩ na mbere gũtũũra muoyo; Ndũkareke kĩĩrĩgĩrĩro gĩakwa gĩtuĩke gĩconoko.
Ndiirĩrĩra nĩgetha honoke; Na niĩ nĩ ndĩrĩrũmbũyagia imenyithania ciaku hingo ciothe.
Nĩ ũregaga arĩa othe matiganaga na imenyithania ciaku, Tondũ kwĩhenia kũu meheenagia nakuo ti kwa ma.
Ũteaga andũ arĩa othe aganu a gũkũ thĩ o ta gĩko. Nĩkĩo nyendete maũira maku.
Mwĩrĩ wakwa nĩkũringwo ũringagwo nĩ thithi nĩũndũ wa guoya waku; Nĩ ndĩtigĩrĩte matuĩro maku ma cira. ע [Ayin]
Nĩ nduĩte itua na ngeka ũndũ wa kĩhooto. Ndũgakĩndekererie arĩa maahinyagĩrĩria.
Ndungata ĩno yaku, ĩranĩra atĩ nĩũgũtuĩka mũrũgamĩrĩri wayo ĩgĩka maũndũ mega; Andũ arĩa egereri maroaga kũũhinyĩrĩria.
Maitho makwa nĩ kũira mairĩte o njetereire ũhonokio waku, O ngĩetagĩrĩra kiugo gĩaku kĩa ũthingu.
Onia ndungata yaku ũtugi waku, Na ũndute imenyithania ciaku.
Niĩ ndĩ ndungata yaku; he ũtaũku, Nĩgetha menye maũira maku.
Ihinda rĩaku, Yahweh, rĩa kuoya ikinya nĩ ikinyu, Tondũ nĩ mathahĩtie watho waku makaũtua kĩndũ hatarĩ.
Nĩkĩo nyendete maathani maku gũkĩra thahabu, o na thahabu ĩrĩa njega.
Nĩ ũndũ ũcio, nĩ ndĩĩte ũrutani o wothe kuuma kũrĩ wee amu nĩ mwagĩrĩru; Nĩ thũire njĩra o yothe ya maheeni. פ [Pe]
Maũira maku nĩ ma magegania. Na nĩmo ndĩrĩrũmagĩrĩra.
Ciugo ciaku ciataũka imenyeke-rĩ nĩ kũrehe irehaga ũtheri, Igatũma arĩa matarĩ na ũmenyeru magĩe na ũtaũku.
Ndaathamirie kanua gakwa ngĩtuumatuuma ngoro, Tondũ nĩ ndeeriragĩria maathani maku.
Wĩhũgũre ũndore na ũnjiguĩre tha, Ota ũrĩa wekaga arĩa a tene mendete rĩĩtwa rĩaku.
Rũngĩrĩria makinya makwa kũgerera uuge waku; Ndĩroaga gwathwo nĩ ũndũ o na ũmwe mũũru.
Honokia kuuma harĩ andũ arĩa ahinyanĩrĩria, Na nĩ ndĩrĩathĩkagĩra matua maku.
Tũma ũthiũ waku warĩre ndungata yaku, Na ũndute imenyithania ciaku.
Maithori nĩ manyũrũrũkaga kuuma maitho-inĩ makwa ta rũũĩ Tondũ andũ matiathĩkagĩra watho waku. צ [Tsade]
Wee Yahweh ũrĩ mũthingu, Na matuĩro maku ma cira nĩ marũngĩrĩru.
Maũira marĩa wathanĩte nĩ ma ũthingu Na nĩ ma kwĩhokeka kũna.
Kĩyo gĩakwa nĩ kĩrandĩa, Tondũ thũ ciakwa nĩ iriganĩirũo nĩ ciugo ciaku.
Uuge waku nĩ mũtheru nginya ũgakemba kũna, Nĩkĩo ndungata yaku nĩ ĩwendete.
Niĩ ndirĩ kĩene ngĩonwo na nĩ njagagĩrwo bata; O na kũrĩ ũguo, ndiriganĩirũo nĩ matua maku.
Ũthingu waku nĩ ũthingu wa tene na tene, Na watho waku nĩguo ũhoro wa ma.
O na gũtuĩka nĩ nyitagwo nĩ mĩtangĩko na ngacemania na mooritũ, Ndũũraga ngenetio nĩ maathani maku.
Ũthingu wa maũira maku nĩ wa tene na tene. He ũtaũku, nĩguo thiĩ na mbere gũtũũra muoyo. ק [Qoph]
Ndagũkaĩre na ngoro yakwa yothe. Njĩtĩka wee Yahweh. Nĩ ndĩrĩrũmagĩrĩra matua maku.
Nĩ ndagũkaĩra; honokia! Nĩ ndĩrĩathĩkagĩra maũira maku.
Njarahũkĩte mĩrongo tena gũtanakĩa, nĩguo ngũkaĩre ngĩkũhoya ũteithio, Nĩ ndetereire kiugo gĩaku.
Ndihiingaga riitho ũtukũ wothe, Nĩgetha ndĩĩcũranie igũrũ rĩgiĩ uuge waku.
Thikĩrĩria mũgambo wakwa nĩ ũndu wa ũtugi waku wa wendani, wũii Yahweh, ndũũria muoyo kũringana na matua maku ma cira.
Arĩa mekaga maũndũ ma thoni nĩ manguhĩrĩirie; Makoragwo kũraihu mũno na watho waku.
Wee Yahweh ũrĩ hakuhĩ, Na maathani maku mothe nĩ ma ma.
Tene mũno nĩ nderutire ũhoro wĩgiĩ maũira maku, Atĩ ũmahandĩte nĩguo matũũre tene na tene. ר [Resh]
Rora mĩnyamaro yakwa na ũũhonokie, Tondũ ndiriganĩirũo nĩ watho waku.
Ndetera na ũũhonokie; Ndũũria muoyo kũringana na kiugo gĩaku.
Ũhonokio ũrĩ kũraihu mũno na andũ arĩa aganu, Tondũ matituĩragia imenyithania ciaku.
Tha na ũmenyereri waku wee Yahweh nĩ nyingĩ mũno. Ndũũria muoyo kũringana na matua maku ma cira .
Thũ ciakwa nĩ nyingĩ, o hamwe na arĩa manyariraga; No niĩ nditiganĩirie maũira maku.
Nderoreire agarari watho makĩndurithia ngoro, Tondũ matiathĩkagĩra uuge waku.
Ta rora ũrĩa nyendete matua maku! Kuoguo Yahweh, kĩndũũrie muoyo nĩ ũndũ wa wendo na ũtugi waku .
Kiugo gĩaku gĩothe nĩ kĩa ma kuuma o kĩambĩrĩria, Na matuĩro maku mathingu ma cira matũũraga tene nginya ona tene. ש [Sin] kana [Shin]
Nĩ nyariragwo nĩ anene hatarĩ gĩtũmi, No ngoro yakwa nĩ ĩĩtigĩrĩte ciugo ciaku.
Nĩ ngenagio nĩ uuge waku O ta mũndũ ũtahĩte indo nyingĩ.
Nĩ thũire maheeni—nĩ ndĩmamenete Watho waku nĩ ndĩwendete.
Ngũkumagia maita mũgwanja o mũthenya Tondũ wa matuĩro maku mathingu ma cira.
Andũ arĩa mendete watho waku makoragwo na thayũ mũingĩ; Gũtirĩ ũndũ ũngĩtũma mahĩngwo.
Niĩ nĩ ndũire njĩrĩgĩrĩire ciĩko ciaku cia kũhonokania, wee Yahweh, Na nĩ nũmagĩrĩra maathani maku.
Ngoro yakwa nĩ yaathĩkagĩra maũira maku, Na nĩ ndĩmeendete mũno kũna kũna.
Nĩ nũmagĩrĩra matua maku na maũira maku, Tondũ wee nĩ ũĩ maũndũ mothe marĩa njĩkaga. ת [Taw]
Kĩrĩro gĩakwa gĩa kũhoya ũteithio kĩrogũkinyĩra, wee Yahweh. He ũtaũku, kũringana na kiugo gĩaku.
Ihoya rĩakwa rĩa kwenda gwĩtĩkĩrĩka rĩrogũkinyĩra. Honokia, o ta ũrĩa kiugo gĩaku gĩtariĩ.
Mĩromo yakwa ĩiyũire ciugo cia gũgũkumia, Amu nĩ ũndutĩte ũhoro wa imenyithania ciaku.
Rũrĩmĩ rwakwa nĩ rũine igũrũ rĩgiĩ uuge waku, Nĩ gũkorũo maathani maku mothe nĩ ma ũthingu.
Guoko gwaku nĩ gũkĩĩhaarĩrie kũndeithia, Amu niĩ thuurite gwathĩkĩra matua maku.
Yahweh, nĩ ndũire ndĩriragĩria ũhonokio waku, Naguo watho waku nĩ gĩkeno gĩakwa.
Reke ngoro yakwa ĩtũũre muoyo na nĩ ĩrĩgũkumagia; Matuĩro maku ma cira matuĩke ũteithio wakwa.
Nĩ hĩtĩtie njĩra o ta ng’ondu yũrĩte. Gĩcarie ndungata yaku, Tondũ niĩ ndiriganĩirũo nĩ maathani maku.