Thaburi 16

Ngitĩra wee Kĩhoti, nĩ gũkorũo njũrĩire harĩ wee.

Njĩrĩte Yahweh atĩrĩ: “Wee nĩwe Yahweh, Kĩhumo gĩakwa kĩa wega.

Na andũ arĩa aamũre thĩinĩ wa thĩ, O acio marĩ riri, nĩ mandehagĩra gĩkeno kĩnene.”

Andũ arĩa mathingataga ihoti ingĩ maingĩhagia kĩeha kĩao. Niĩ gũtirĩ hĩndĩ ngaacirutĩra magongona ma thakame, O na kana mĩromo yakwa ĩgwete marĩĩtwa ma cio.

Yahweh nĩwe rwĩga rwakwa, gĩcunjĩ kĩrĩa ngaĩirũo, na gĩkombe gĩakwa. Nĩ ũgitagĩra igai rĩakwa.

Nĩ thimĩirũo kũndũ kwega. Nĩ njiganĩire na igai rĩakwa.

Nĩ ngũgooca Yahweh, o we ũũheete ũtaaro. O na ũtukũ, methugunda makwa ma thĩinĩ biũ nĩ manũngaga.

Njigaga Yahweh mbere yakwa hingo ciothe. Tondũ arĩ guoko-inĩ gwakwa kwa ũrĩo, gũtirĩ hĩndĩ ngenyenyeka.

Nĩ ũndũ ũcio, ngoro yakwa nĩ ĩcanjamũkĩte, na ndĩ mũkenu mũno. Na ndũũraga ndĩ na ũgitĩri.

Nĩ gũkorũo ndũkandiganĩria thĩinĩ wa Mbĩrĩra. Ndũkareka ũrĩa waku mũigua-Yahweh atuĩke wa kuora.

Nĩ ũũmenyithagia njĩra ya muoyo. Mbere yaku hakoragwo na gĩkeno kĩingĩ; Gũkoragwo na gĩkeno guoko-inĩ gwaku kwa ũrĩo tene na tene.