Thaburi 17

Atĩrĩrĩ Yahweh, igua ithaithana rĩakwa rĩa kũhoya kĩhooto; Tega matũ ũigue kĩrĩro gĩakwa gĩa kũhoya ũteithio; Thikĩrĩria ihoya rĩakwa rĩrĩa ndĩrahoya hatarĩ maheeni.

Ũrotua itua rĩa kĩhooto nĩ ũndũ wakwa; Maitho maku nĩ mone ũndũ ũrĩa wagĩrĩire.

Nĩ ũthuthurĩtie ngoro yakwa, nĩ ũnduĩrĩtie ũtukũ; Nĩ ũtheretie; Nĩ ũkuona atĩ ndithugundĩte ũndũ o wothe mũũru, Na kanua gakwa gatiĩhĩtie.

Ha ũhoro wĩgiĩ ciĩko cia andũ, Nĩ ndĩĩthemaga njĩra cia mũtunyani, kũringana na kiugo kĩa mĩromo yaku.

Reke makinya makwa maikare njĩra-inĩ ciaku Nĩgetha magũrũ makwa matikahĩngwo.

Ndĩragwĩta tondũ nĩ ũkũnjigua, wee Kĩhoti. Ndegera gũtũ gwaku. Igua ciugo ciakwa.

Onania ũtugi waku na njĩra ya magegania, O wee Mũhonokia wa arĩa moragĩra guoko-inĩ gwaku kwa ũrĩo Kuuma harĩ arĩa makũremagĩra.

Ngitĩra o ta kĩũma kĩa riitho rĩaku; Hitha kĩĩruru-inĩ kĩa mathagu maku.

Ngitĩra kuuma harĩ andũ aganu arĩa manjũkagĩrĩra, Kuuma harĩ thũ ciakwa iria cithiũrũrũkagĩria.

Nĩ momĩtie ngoro ciao; Tũnua twao twaragia na mwĩtĩo;

Rĩu nĩ matũthiũrũrũkĩirie; Maracaria kamweke ga gũtũma tũgũe.

O ũmwe wao atariĩ ta mũrũthi ũkĩenda gũtambura kĩndũ kĩrĩa ũnyitĩte tũcunjĩ tũcunjĩ, O ta mũrũthi mwĩthĩ ũgĩceema wĩhithĩte.

Arahũka wee Yahweh, nĩguo ũng’ethanĩre nake na ũmũgũithie thĩ; Honokia kuuma harĩ ũcio mwaganu ũkĩhũthĩra rũhiũ rwaku rwa njora;

Honokia na guoko gwaku wee Yahweh, Kuuma harĩ andũ a thĩ ĩno, arĩa igai rĩao rĩrĩ ũtũũro-inĩ ũyũ, Acio ũiyũragia na maũndũ mega marĩa ũheanaga, O acio matigagĩra ariũ ao aingĩ igai.

No niĩ-rĩ, nĩ ũndũ wa ũthingu nĩ ngoona ũthiũ waku; Nĩ njiganagĩra gũũkĩra ndĩ mbere yaku.