Thaburi 18

Nĩ ngwendete Yahweh, o wee hinya wakwa.

Yahweh nĩwe ndũmba yakwa ya ihiga na mwĩgitio wakwa na Ũrĩa ũũhonokagia. Kĩhoti wakwa nĩwe rwaro rwakwa rwa ihiga, na njũragĩra harĩ we, Nĩwe ngo yakwa na rũhĩa rwakwa rwa ũhonokio, rĩũrĩro rĩakwa irũmu.

Ngayagĩra Yahweh, o ũcio wagĩrĩire kũgoocwo, Na nĩ ngaahonokio kuuma harĩ thũ ciakwa.

Mĩkwa ya gĩkuũ nĩ yandigicĩirie; Mũiyũro mũnene wa andũ matarĩ kĩene nĩ wanjĩkĩrire guoya.

Mĩkwa ya Mbĩrĩra nĩ yathiũrũrũkĩirie; Mĩtego ya gĩkuũ nĩ yang’etheire.

Ndakaĩire Yahweh rĩrĩa ndarĩ na mĩtangĩko, Ndaikaraga ngĩrĩragĩra Kĩhoti wakwa andeithie. Nake akĩigua mũgambo wakwa arĩ hekarũ-inĩ yake, Na kĩrĩro gĩakwa gĩa kũmũhoya ũteithio gĩgĩkinyĩra matũ make.

Hĩndĩ ĩyo thĩ ĩkĩambĩrĩria kũinaina na gũthingitha; Mĩthingi ya irĩma ĩkĩenyenyeka Na ĩgĩcũga mbere na thutha tondũ nĩ aarakarĩtio.

Ndogo ĩkĩambata na igũrũ yumĩte maniũrũ-inĩ make, Na mwaki wa kũniinana ũkiuma kanua-inĩ gake; Makara maakanaga mwaki makĩrĩrĩmbũka kuuma harĩ we.

Agĩtũma igũrũ rĩĩkũnje rĩrĩa aaikũrũkaga, Na rungu rwa magũrũ make kwarĩ na nduma .

Ookire ombũkĩte arĩ igũrũ rĩa kerubi. Agĩikũrũka thĩ arĩ igũrũ rĩa mathagu ma rũhuho.

Agĩcoka akĩĩhumbĩra na nduma, Ĩmũrigicĩirie mĩena yothe ta arĩ gĩthũnũ, Maĩ marĩ na nduma na matu mairũ.

Kuuma harĩ ũtheri ũrĩa warĩ mbere yake-rĩ, Mbura ya mbembe na makara maakanaga mwaki igĩtũrĩkanĩria matu-inĩ.

Yahweh agĩcoka akĩambĩrĩria kũruruma arĩ igũrũ; Ũrĩa ũrĩ Igũrũ Mũno agĩtũma mũgambo wake ũiguĩke Gũkĩgĩa mbura ya mbembe na makara maakanaga mwaki.

Agĩikia mĩguĩ yake akĩmahurunja; Akĩrekereria rũheni rwake na agĩtũma matukanĩrũo.

Rungu rwa tũrũũĩ gũkĩambĩrĩria kuoneka; Mĩthingi ya thĩ ĩkĩguũrio nĩ ũndũ wa mũgambo waku mũnene, wee Yahweh, Nĩ ũndũ wa mĩhũmũ ĩrĩa yatuthũkire kuuma maniũrũ-inĩ maku.

Agĩtambũrũkia guoko arĩ igũrũ; Akĩnyita na akĩngucia akĩnduta maĩ-inĩ mariku.

Akĩhonokia kuuma harĩ thũ yakwa ĩrĩa yarĩ na hinya, Kuuma harĩ arĩa mathũire, arĩa maarĩ na hinya kũngĩra.

Maanjũkĩrĩire mũthenya ũrĩa ndarĩ na thĩna, No Yahweh nĩwe wandiirĩrĩire.

Aandwarire handũ harĩ na ũgitĩri; Akĩhonokia tondũ nĩ aakenagio nĩ niĩ.

Yahweh andathimaga kũringana na ũthingu wakwa; Andĩhaga kũringana na ũkinyanĩru wa moko makwa.

Nĩ gũkorũo ndũire nũmĩtie njĩra cia Yahweh, Na ndirĩ ndeka ũndũ mũũru wa gũtiganĩria Kĩhoti wakwa.

Matuĩro make mothe marĩ mbere yakwa; Gũtirĩ hĩndĩ ngaahũthia mawatho make.

Ngũtũũra itarĩ na ũcuke maitho-inĩ make, Na nĩ ndĩrĩĩthemaga mehia.

Yahweh arondĩha kũringana na ũthingu wakwa, Kũringana na ũkinyanĩru wa moko makwa maitho-inĩ make.

Harĩ mũndũ mũtugi, wee ũkoragwo ũrĩ mũtugi; Harĩ mũndũ ũtarĩ na ũcuke wonanagia atĩ ndũrĩ na ũcuke;

Harĩ ũrĩa mwamũre wonanagia atĩ ũrĩ mwamũre, No harĩ ũrĩa ũtarĩ mũrũngĩrĩru wonanagia atĩ ũrĩ na ũũgĩ.

Tondũ wee nĩ ũhonokagia arĩa matarĩ hinya No nĩ ũnyihagia arĩa marĩ mwĩtĩo.

Nĩ gũkorũo wee Yahweh nĩwe wakagia tawa wakwa, Kĩhoti wakwa ũrĩa ũtũmaga nduma yakwa ĩtuĩke ũtheri.

Nĩ ũndũ wa ũteithio waku no hote gũtharĩkĩra gĩkundi kĩa atunyani; Kũgerera hinya wa Kĩhoti no hote kũrũga rũthingo.

Njĩra ya Kĩhoti ũrĩa wa ma nĩ nginyanĩru; Uuge wa Yahweh nĩ ũrĩa mũthuranĩre. Akoragwo arĩ ngo harĩ arĩa othe moragĩra harĩ we.

Tondũ rĩrĩ, nũũ ũngĩ Kĩhoti tiga Yahweh? Na nũũ ũngĩ rwaro rwa ihiga tiga Kĩhoti witũ?

Kĩhoti ũrĩa wa ma nĩwe ũũhumbaga hinya, Na nĩ egũtũma njĩra yakwa ĩkinyanĩre.

Atũmaga magũrũ makwa mahaane ta ma thwariga; Nĩ atũmaga hote kũrũgama kũndũ gũtũũgĩru.

Nĩ amenyeragia moko makwa nĩ ũndũ wa mbaara; Moko makwa no mahote gũkũnja ũta wa gĩcango.

Nĩ ũũheaga ngo yaku ya ũhonokio, Guoko gwaku kwa ũrĩo nĩ kũndiiragĩrĩra, Na wĩnyihia waku nĩ ũũnenehagia.

Nĩ waramagia njĩra nĩ ũndũ wa makinya makwa; Magũrũ makwa matingĩtindirũka.

Ngũthingata thũ ciakwa na ndĩcikinyĩre; Ndigũcoka citarĩkĩtie kũniinwo biũ.

Ngũcihehenja nginya iremwo kwarahũka; Cikũgwa rungu rwa magũrũ makwa.

Nĩ ũkũũhe hinya wa kũrũa; Ũgũtũma thũ ciakwa igwe rungu rwakwa.

Ũgũtũma thũ ciakwa injũrĩre, Na nĩ ngũniina arĩa mathũire.

Makayaga nĩguo maheo ũteithio, no gũtikoragwo na mũndũ wa kũmahonokia; Makayagĩra nginya Yahweh, no ndamaiguaga.

Ngũmahehenja mahaane ta rũkũngũ rũhinyu rũrombũrũo nĩ rũhuho; Ngũmaikia nja ta ndoro ya njĩra-inĩ.

Nĩ ũkũũhonokia kuuma harĩ andũ arĩa macaranagĩria mahĩtia. Ũkũnyamũra nduĩke mũtongoria wa ndũrĩrĩ. Andũ itoĩ nĩ marĩndungatagĩra.

Kũigua ũhoro wakwa tu nĩ kũrĩtũmaga manjathĩkĩre Andũ a kũngĩ marĩũkaga mbere yakwa menyihĩtie.

Andũ a kũngĩ nĩ mekũũrũo nĩ hinya; Marĩũkaga makĩinainaga kuuma mĩĩgitio-inĩ yao.

Yahweh arĩ muoyo! Ũcio Rwaro Rwakwa rwa Ihiga arogoocwo! Kĩhoti wa ũhonokio wakwa nĩ atũũgĩrio.

Kĩhoti ũrĩa wa ma nĩwe ũndĩhagĩria; Atooragia ikundi cia andũ agaciiga rungu rwakwa.

Nĩ andeithũraga kuuma harĩ thũ ciakwa iria irĩ na marakara; Ũũnenehagia igũrũ rĩa arĩa manjũkagĩrĩra; Nĩ ũũhonokagia kuuma harĩ mũndũ ũrĩa ũhũthagĩra ũhinya.

Nĩkĩo ngũkũgooca wee Yahweh, ndĩ gatagatĩ-inĩ ka ndũrĩrĩ, Na nyine nyĩmbo ngooce rĩĩtwa rĩaku.

Nĩ ekaga maũndũ manene ma kũhonokania nĩ ũndũ wa mũthamaki wake; Onanagia maũndũ ma tha harĩ ũrĩa wake mũitĩrĩrie maguta, Harĩ Daudi na mbeũ yake tene na tene.