Thaburi 25
Atĩrĩrĩ Yahweh, wee nĩwe ngayagĩra. ב [Beth]
Kĩhoti wakwa, wee nĩwe ndĩhokaga; Ndũkareke njonorithio. Ndũkareke thũ ciakwa ithekerere. ג [Gimel]
Gũtirĩ mũndũ ũigaga kĩĩrĩgĩrĩro gĩake harĩ wee ũgaaconorithio, Ĩndĩ gĩconoko nĩ gĩetereire andũ arĩa makunyanagĩra hatarĩ gĩtũmi. ד [Daleth]
Atĩrĩrĩ Yahweh, ndeithia menye njĩra ciaku; Nduta njĩra ciaku. ה [He]
Ndeithia thiage kũringana na ũhoro waku wa ma na ũndutage, Nĩ gũkorũo wee nĩwe Kĩhoti wa ũhonokio wakwa. ו [Waw] Wee nĩwe ndĩĩrĩgagĩrĩra mũthenya wothe. ז [Zayin]
Atĩrĩrĩ Yahweh, ririkana tha ciaku o na ũtugi wa wendani waku, Iria ũtũire wonanĩtie. ח [Heth]
Ndũkaririkane mehia marĩa ndekire ndĩ mũnyinyi, o na mahĩtia makwa. Ndirikana kũringana na tha ciaku, Nĩ ũndũ wa wega waku, wee Yahweh. ט [Teth]
Yahweh nĩ mwega na nĩ mũrũngĩrĩru. Nĩkĩo arutaga andũ arĩa ehia njĩra ĩrĩa magĩrĩirũo gũtũũra. י [Yod]
Nĩ arĩtongoragia andũ arĩa ahooreri ũndũ-inĩ ũrĩa wagĩrĩire, Na nĩ arĩrutaga andũ arĩa ahooreri njĩra yake. כ [Kaph]
Njĩra ciothe cia Yahweh nĩ cia ũtugi na ũhoro-wa-ma Harĩ arĩa marũmagĩrĩra kĩrĩkanĩro gĩake na iririkania ciake. ל [Lamed]
Nĩ ũndũ wa rĩĩtwa rĩaku wee Yahweh, Njohera rĩhia rĩakwa, o na gũtuĩka nĩ inene. מ [Mem]
Nĩ mũndũ ũrĩkũ wĩtigĩrĩte Yahweh? Mũndũ ũcio nĩ arĩrutagwo nĩwe njĩra ĩrĩa agĩrĩirũo gũthuura. נ [Nun]
Nĩ arĩonaga maũndũ mega ma gũtũma ngoro yake ĩikarage o ĩhoreire. Nacio njiarũa ciake nĩ ikaagaya thĩ. ס [Samekh]
Ũrata wa hakuhĩ na Yahweh nĩ wa arĩa mamwĩtigĩrĩte, Na nĩ amamenyithagia kĩrĩkanĩro gĩake. ע [Ayin]
Maitho makwa maikaraga marorete Yahweh hingo ciothe, Nĩ gũkorũo nĩ ekũhatũra magũrũ makwa kuuma neti-inĩ. פ [Pe]
Erekeria ũthiũ waku kũrĩ niĩ ũnyonie ũtugi, Nĩ gũkorũo ndĩ o wiki na ndirĩ na hinya. צ [Tsade]
Mĩtangĩko ya ngoro yakwa nĩ ĩingĩhĩte; Njehereria ruo rũrĩa ndĩ naruo. ר [Resh]
Rora mĩnyamaro yakwa o na mathĩna makwa, Na ũnjohere mehia makwa mothe.
Ta rora ũrĩa thũ ciakwa cingĩhĩte Na ũrĩa cimenete na rũmena rũnene. ש [Shin]
Gitĩra muoyo wakwa na ũũhonokie. Ndũkareke njonorithio, nĩ gũkorũo nĩ njũrĩire harĩ wee. ת [Taw]
Wĩkindĩru na ũrũngĩrĩru irongitagĩra, Nĩ gũkorũo kĩĩrĩgĩrĩro gĩakwa kĩrĩ harĩ wee.
Atĩrĩrĩ Kĩhoti, honokia Isiraeli kuuma harĩ mĩtangĩko yake yothe.