Thaburi 26

Atĩrĩrĩ Yahweh, nduĩra ciira, tondũ nĩ thiĩte kũringana na wĩkindĩru wakwa;Ona ndũũrĩte ndĩhokete Yahweh itekwenyenyeka.

Ndakũhoya ũũthuthurie wee Yahweh, na ũngerie; Ũgerie higo ciakwa o hamwe na ngoro yakwa.

Nĩ gũkorũo ũtugi wa wendo waku ũkoragwo mbere yakwa hĩndĩ ciothe, Na thiaga kũringana na ũhoro waku wa ma.

Ndinyitanagĩra na andũ a maheeni, Na nĩ ndĩĩthemaga arĩa mehithaga ũrĩa matariĩ.

Nĩ thũire thiritũ ya arĩa mekaga maũndũ moru, Na nĩ ndegaga kũnyitanĩra na andũ aganu.

Nĩ ngwĩthamba moko nyonanie atĩ ndihĩtĩtie, Na thiũrũrũke kĩgongona gĩaku, wee Yahweh,

Nĩgetha ndũme mũgambo wa gũcokia ngatho ũiguĩke Na menyithanie mawĩra maku mothe ma magegania.

Atĩrĩrĩ Yahweh, nĩ nyendete nyũmba ĩrĩa ũikaraga, Kũndũ kũrĩa riri waku ũikaraga.

Ndũkanjeherie ũkieheria arĩa ehia, Kana ũniine muoyo wakwa hamwe na arĩa mekaga maũndũ ma ũhinya,

O acio moko mao mekaga maũndũ ma thoni, Na guoko kwao kwa ũrĩo gũkaiyũra mahaki.

No niĩ-rĩ, ndĩrĩthiaga kũringana na wĩkindĩru wakwa. Honokia na ũnyonie ũtugi.

Kũgũrũ gwakwa kũrũgamĩte handũ haaraganu; Ndĩrĩgoocaga Yahweh ndĩ thĩinĩ wa kĩũngano kĩnene.