Thaburi 28

Njikaraga ngĩgũkayagĩra, wee Yahweh Rwaro Rwakwa rwa Ihiga; Ndũkarege gũũthikĩrĩria. Waikara ũngirĩire, Ngũhaana o ta arĩa maikũrũkaga irima-inĩ.

Igua mathaithana makwa rĩrĩa ndagũkaĩra ũndeithie Rĩrĩa ndambararia moko makwa ndĩmerekeirie rumu ya thĩinĩ biũ ya handũ haku harĩa hamũre.

Ndũkangururie hamwe na andũ arĩa amaramari, hamwe na arĩa mekaga maũndũ ma waganu, O acio maragia ciugo cia thayũ na mũndũ ũrĩa ũngĩ, no ngoro-inĩ ciao marĩ na ũũru.

Marĩhe nĩ ũndũ wa ciĩko ciao, Kũringana na maũndũ moru marĩa mekaga. Marĩhe nĩ ũndũ wa wĩra wa moko mao, Kũringana na maũndũ marĩa mekĩte.

Tondũ matirũmbũyanagia na mawĩko ma Yahweh, Kana wĩra wa moko make. Nĩ akaamamomora na ndakamaaka rĩngĩ.

Yahweh arogoocwo, Nĩ gũkorũo nĩ aiguĩte mathaithana makwa ngĩmũhoya ũteithio.

Yahweh nĩwe hinya wakwa o na ngo yakwa; Ngoro yakwa nĩwe ĩhokete. Nĩ nyamũkĩrĩte ũteithio wake, na ngoro yakwa ĩrĩ na gĩkeno, Kwoguo nĩ ngũmũgooca na rwĩmbo rwakwa.

Yahweh nĩwe hinya wa andũ ake; We nĩ mwĩgitio, arehagĩra ũrĩa wake mũitĩrĩrie maguta ũhonokio mũnene.

Honokia andũ aku, na ũrathime igai rĩaku. Marĩithie na ũmakuue moko-inĩ maku tene na tene.