Thaburi 36

Wagarari Watho wa mũndũ mwaganu nĩ waragia nake ngoro-inĩ yake thĩinĩ biũ; Ũhoro wa gwĩtigĩra Kĩhoti ndũrĩ maitho-inĩ make.

Tondũ nĩ egaathagĩrĩria mũno maitho-inĩ make mwene Ũũ atĩ ndangĩhota gũkũũrana na gũthũũra mahĩtia make.

Ciugo cia kanua gake nĩ cia gũtuurithia na cia maheeni; Ndakoragwo na ũtaũku wa gwĩka wega.

Abangaga njama njũru o na arĩ ũrĩrĩ-inĩ wake. Arũmagĩrĩra njĩra ĩtarĩ njega; Ndareganaga na ũndũ ũrĩa mũũru.

Wee Yahweh-rĩ, ũtugi waku ũkinyĩte o igũrũ, Naguo wĩhokeku waku ũgakinya matu-inĩ.

Ũthingu waku ũhaana ta irĩma nene; Matuĩro maku matariĩ ta maĩ maingĩ na mariku. Nĩ ũrũmbũyagia andũ o na nyamũ, wee Yahweh.

Wee Kĩhoti-rĩ, kaĩ ũtugi waku nĩ wa goro-ĩ! Kĩĩruru-inĩ kĩa mathagu maku-rĩ, nĩho ariũ a andũ moragĩra.

Marĩhũnagio ũnoru wa indo iria irĩ nyũmba-inĩ yaku nginya makaigania, Na ũgatũma manyue rũũĩ-inĩ rwa maũndũ maku marĩa mega.

Wee nĩwe kĩhumo kĩa muoyo; Kũgerera ũtheri waku nĩ tũhotaga kuona ũtheri.

Thiĩ na mbere kuonania ũtugi waku harĩ andũ arĩa makũũĩ, Na kuonania ũthingu waku harĩ andũ arĩa arũngĩrĩru ngoro.

Ndũkareke kũgũrũ kwa andũ arĩa etĩi kũnangĩrĩrie Kana guoko kwa arĩa aganu kũnyingate.

Ta rora harĩa andũ arĩa mekaga maũndũ moru magũĩte; Nĩ magũithĩtio thĩ na matingĩhota gũũkĩra.