Thaburi 37
Ndũgatangĩke nĩ ũndũ wa andũ arĩa aganu Kana ũigue ũiru nĩ ũndũ wa andũ arĩa mekaga maũndũ moru.
Marĩhooha o na ihenya ta nyeki Na mome o ta nyeki nduru. ב [Beth]
Wĩhokage Yahweh na wĩkage maũndũ mega; Tũũra thĩinĩ wa thĩ, na wĩkage maũndũ ũrĩ na wĩhokeku.
Gĩaga na gĩkeno kĩnene nĩ ũndũ wa Yahweh, Nake nĩ arĩkũhingagĩria merirĩria ma ngoro yaku. ג [Gimel]
Rekagĩrĩria njĩra yaku harĩ Yahweh; Mwĩhokage, nake nĩ arĩgũteithagia.
Nĩ arĩtũmaga ũthingu waku ware o ta ũtheri wa rũcinĩ gũgĩthererũka, Nakĩo kĩhooto gĩaku kĩare o ta riũa rĩa mũthenya gatagatĩ. ד [Daleth]
Kindagĩria ũkahurũka ũrĩ mbere ya Yahweh Na ũmwetagĩrĩre ũtegũthethũka. Ndũgatangĩkage nĩ ũndũ wa mũndũ Ũrĩa ũragaacĩra harĩ kũhingia njama ciake cia waganu. ה [He]
Eheria marakara na ũtigane na mathũgũta; Ndũkarakare wĩke ũndũ mũũru.
Nĩ gũkorũo andũ arĩa aganu nĩ makaaniinwo, No arĩa merĩgagĩrĩra Yahweh nĩ makaagaya thĩ. ו [Waw]
No kahinda kanini gatigaru, na andũ arĩa aganu matigaakorũo kuo rĩngĩ; Ũkaarora kũrĩa maakoragwo, Na matigaakorũo kuo.
No andũ arĩa ahooreri nĩ makaagaya thĩ, Na nĩ magaakena mũno nĩ ũndũ wa kũingĩhĩrũo nĩ thayũ. ז [Zayin]
Mũndũ ũrĩa mwaganu abangaga ũrĩa egũũkĩrĩra mũndũ ũrĩa mũthingu; Ahagaranagia magego nĩ ũndũ wa kũmũrakarĩra.
No Yahweh nĩ amũthekagĩrĩra, Tondũ nĩ oĩ atĩ mũthenya wake nĩ ũroka. ח [Heth]
Andũ arĩa aganu macomoraga hiũ ciao cia njora na makahaarĩria moota mao Nĩguo magũithie andũ arĩa mahinyagĩrĩrio o na arĩa athĩni, Na morage arĩa mathiaga na njĩra nũngĩrĩru.
No rũhiũ rwao rwa njora rũgaatheca ngoro ciao ene; Namo moota mao nĩ makoinangwo. ט [Teth]
Nĩ kaba kĩndũ kĩnini kĩa mũndũ mũthingu Gũkĩra indo nyingĩ cia andũ aingĩ aganu.
Nĩ gũkorũo moko ma andũ arĩa aganu nĩ makoinangwo, No Yahweh nĩ agaatiirĩrĩra arĩa athingu. י [Yod]
Yahweh nĩ amenyaga maũndũ marĩa andũ arĩa matarĩ ũcuke macemanagia namo, Na igai rĩao rĩgaatũũra tene na tene.
Matigaaconorithio hĩndĩ ya thĩna; Na hĩndĩ ya ng’aragu nĩ magaakorũo na irio nyingĩ. כ [Kaph]
No andũ arĩa aganu nĩ makaaniinwo; Thũ cia Yahweh igaathira o ta ũrĩithio ũrĩ na riri; Igaathira o ta ndogo. ל [Lamed]
Mũndũ ũrĩa mwaganu akombaga no ndarĩhaga, No mũndũ ũrĩa mũthingu akoragwo arĩ mũtaana na nĩ aheanaga.
Andũ arĩa marathimĩtwo nĩ Yahweh nĩ makaagaya thĩ, No arĩa marumĩtwo nĩwe nĩ makaaniinwo. מ [Mem]
Yahweh nĩ atongoragia makinya ma mũndũ Hĩndĩ ĩrĩa akenio nĩ njĩra ya mũndũ ũcio.
O na mũndũ ũcio angĩhĩngwo, ndagũaga, Nĩ gũkorũo Yahweh nĩ amũnyitagĩrĩra na guoko gwake. נ [Nun]
Kũrĩ hĩndĩ ndarĩ mwĩthĩ na rĩu ndĩ mũkũrũ, No ndirĩ ndona mũndũ o na ũmwe mũthingu atiganĩirio, Kana ciana ciake ikĩhoya mũgate.
Hingo ciothe akombanagĩra eyendeire, Nacio ciana ciake nĩ ikaagĩa na kĩrathimo. ס [Samekh]
Wĩthemage maũndũ marĩa moru na wĩkage marĩa mega, Na nĩ ũgũtũũra tene na tene.
Nĩ gũkorũo Yahweh nĩ endete kĩhooto, Na ndagaatiganĩria andũ ake arĩa ehokeku. ע [Ayin] Hingo ciothe nĩ marĩgitagĩrũo; No njiarũa cia andũ arĩa aganu nĩ ikaaniinwo.
Andũ arĩa athingu nĩ makaagaya thĩ, Na magaatũũra thĩinĩ wayo tene na tene. פ [Pe]
Kanua ka mũndũ ũrĩa mũthingu karagia maũndũ ma ũũgĩ, Naruo rũrĩmĩ rwake rũkaria maũndũ ma kĩhooto.
Watho wa Kĩhoti wake ũkoragwo thĩinĩ wa ngoro yake; Makinya make matingĩtindirũka. צ [Tsade]
Mũndũ ũrĩa mwaganu aikaraga akĩroraga ũrĩa mũthingu, Agĩcaria ũrĩa angĩmũũraga.
No Yahweh ndangĩtiganĩria mũndũ ũcio mũthingu guoko-inĩ kwa mũndũ ũcio mwaganu O na kana amũtuĩre atĩ nĩ ahĩtĩtie rĩrĩa araciirithio. ק [Qoph]
Wĩrĩgagĩrĩre Yahweh na ũrũmagĩrĩre njĩra yake, Nake nĩ agaagũtũũgĩria ũgae thĩ. Rĩrĩa andũ arĩa aganu makaaniinwo, wee nĩ ũkeyonera ũndũ ũcio. ר [Resh]
Nĩ nyonete mũndũ mwaganu ũtarĩ tha Agĩtherema o ta mũtĩ mũruru ũrĩ tĩri-inĩ waguo mwene.
No akĩehera o na ihenya na akĩagwo; Ngĩikara ngĩmũcaragia, no ndiamuonire. ש [Shin]
Ta wĩcũranie ũhoro wa mũndũ ũrĩa ũtarĩ ũcuke, Na ũrorage mũndũ ũrĩa mũrũngĩrĩru, Nĩ gũkorũo ũtũũro wa mũndũ ũcio wa mahinda mokĩte ũgaakorũo ũrĩ wa thayũ.
No andũ arĩa othe mehagia nĩ makaanangwo; Andũ arĩa aganu nĩ kũniinwo makaaniinwo. ת [Taw]
Ũhonokio wa andũ arĩa athingu uumaga harĩ Yahweh; We nĩwe ũkoragwo arĩ handũ hao hairigĩre hĩndĩ ya thĩna.
Yahweh nĩ arĩmateithagia na akamateithũra. Nĩ arĩmateithũraga kuuma harĩ arĩa aganu na akamahonokia, Nĩ gũkorũo moragĩra harĩ we.