Thaburi 38

Wũii Yahweh, ndũkanũnge ũrĩ na marakara, Kana ũnũnge ũrĩ na mang’ũrĩ.

Tondũ nĩ thecetwo nĩ mĩguĩ yaku ĩkanyingĩra thĩinĩ biũ, Na guoko gwaku gũkahinyĩrĩria na thĩ.

Mwĩrĩ wakwa wothe nĩ mũrũaru nĩ ũndũ wa marakara maku. Mahĩndĩ makwa matirĩ na thayũ nĩ ũndũ wa mehia makwa.

Tondũ mahĩtia makwa meiganĩrĩire igũrũ rĩa mũtwe wakwa; O ta mũrigo mũritũ, nĩ maritũ mũno ndingĩhota kũmakuua.

Ironda ciakwa nĩ iranunga na igatherema Tondũ wa ũrimũ wakwa.

Nĩ ndangĩkĩte na ngathuthĩka ngoro mũno; Ndindaga na kĩeha mũthenya wothe.

Ndĩraigua ngĩcinwo thĩinĩ wakwa; Mwĩrĩ wakwa wothe nĩ mũrũaru.

Ng’andĩte na ngahehenjeka biũ; Mĩtangĩko ya ngoro yakwa ĩtũmaga ndarame na mũgambo mũnene.

Riu Yahweh, merirĩria makwa mothe marĩ mbere yaku, Na nĩ ũĩ gũcaya gwakwa.

Ngoro yakwa ĩrahũũra na hinya, na ngorũo nĩ hinya, Na ũtheri wa maitho makwa nĩ ũthirĩte.

Arata akwa na athiriti akwa matiendaga kũnguhĩrĩria nĩ ũndũ wa ihũũra rĩakwa, Nao arata akwa a hakuhĩ maikaraga haraya na niĩ.

Arĩa macaragia muoyo wakwa nĩ manjigagĩra mĩtego; Acio mendaga kũnjĩka ũũru maragia ũhoro wa mwanangĩko; Mũthenya wothe matindaga makĩhehanĩrĩra maũndũ ma maheeni.

No o ta mũndũ ũrĩa ũtaiguaga, niĩ ndimathikagĩrĩria; O ta mũndũ ũrĩa ũtahotaga kwaria, nditumũraga kanua gakwa.

Nduĩkĩte o ta mũndũ ũtarĩ ũhoti wa kũigua, Ũrĩa ũtangĩhota kuuga ũndũ na kanua gake nĩguo etetere.

Tondũ wee Yahweh nĩwe ndeetereire, Nawe ũkĩnjigua, wee Yahweh Kĩhoti wakwa.

Nĩ gũkorũo ndoigire ũũ: “Maroaga gũũthekerera Kana metũũgĩrie igũrũ rĩakwa kũgũrũ gwakwa kũngĩtindirũka.”

Tondũ ndarĩ hakuhĩ kũgũa, Na ndaiguaga ruo hingo ciothe.

Nĩ ndoimbũrire mahĩtia makwa; Nĩ ndatangĩkaga nĩ ũndũ wa mehia makwa.

No thũ ciakwa irĩ na ũhoti o na hinya, Arĩa mathũire hatarĩ gĩtũmi nĩ maingĩhĩte mũno.

Maarĩhire wega wakwa na ũũru; Nĩ maanjũkagĩrĩra nĩ ũndũ wa gũthingata maũndũ marĩa mega.

Wuii Yahweh, ndũkandiganĩrie. Ndũgaikare haraya na niĩ, wee Kĩhoti wakwa.

Hiũha ũũke ũndeithie, Wee Yahweh, o wee ũhonokio wakwa.