Thaburi 39

Ndoigire atĩrĩ: “Nĩ ngũmenyerera mĩthiĩre yakwa Nĩgetha ndikehie na rũrĩmĩ rwakwa. Nĩ ndĩrĩgiragĩrĩria kanua gakwa ngakahumbĩra Rĩrĩa rĩothe mũndũ wothe mwaganu arĩ harĩa ndĩ.”

Ndaikarire ngirĩte itekwaria; Ndagire kwaria nginya ũhoro wa maũndũ marĩa mega. No ruo rwakwa rwarĩ rũnene.

Ngoro yakwa nĩ yaakanaga thĩinĩ wakwa. O ũrĩa ndecũranagia, noguo mwaki wathiaga ũgĩakanaga. Na niĩ ngĩaria na rũrĩmĩ rwakwa ngiuga atĩrĩ:

"Rĩu wee Yahweh, ndeithia kũmenya ũrĩa mũthia wakwa ũkaahana, Na ũndeithie kũmenya mũigana wa matukũ makwa, Nĩgetha menye ũrĩa ũtũũro wakwa ũrĩ mũkuhĩ.

Ti itherũ nĩ ũtũmĩte matukũ makwa manyihe; Na ũraihu wa ũtũũro wakwa ti kĩndũ harĩ wee. Hatarĩ nganja mũndũ o wothe o na angĩoneka ta aiganĩire atariĩ o ta mĩhũmũ. (Sela)

Mũndũ o wothe ũrathiĩ akoragwo ahaana ta kĩĩruru. Ahang’aga o tũhũ. Acokanagĩrĩria ũtonga mũingĩ, atekũmenya nũũ ũkaaũkenera.

Gũkĩrĩ ũguo-rĩ, ingĩkĩĩrĩgĩrĩra kĩĩ Yahweh? Wee nowe kĩĩrĩgĩrĩro gĩakwa.

Honokia kuuma harĩ mehia makwa mothe. Ndũkareke nduĩke kĩndũ gĩa kũnyũrũrio nĩ mũndũ ũrĩa mũkĩgu.

Ndaikarire ngirĩte; Ndingĩatumũrire kanua gakwa, Tondũ wee nĩwe wekĩte ũndũ ũcio.

Njehereria ihũũra rĩaku. Nĩ njũrĩtwo nĩ hinya tondũ guoko gwaku nĩ kũngũthaga.

Ũrũngaga mũndũ ũkamũherithia nĩ ũndũ wa mehia make; Ũniinaga indo iria onaga irĩ cia bata o ta ũrĩa memenyi irĩaga kĩndũ ikaniina. Ti itherũ mũndũ o wothe no ta mĩhũmũ. (Sela)

Yahweh ĩĩ, igua ihoya rĩakwa, Thikĩrĩria kĩrĩro gĩakwa gĩa kũhoya ũteithio. Ndũkage kũrũmbũiya maithori makwa. Tondũ niĩ haana o ta mũndũ wa kũngĩ harĩ wee, Ta mũgendi ũrahĩtũka, o ta ũrĩa maithe maitũ mothe ma tene maatariĩ.

Tiga kũndora ũrĩ na marakara nĩgetha ngĩe na gĩkeno Itanakua njage gũkorũo ho rĩngĩ.”