Thaburi 40

Gweterera ndetereire Yahweh o ngirĩrĩirie Nake akĩndegera gũtũ gwake na akĩigua gũkaya gwakwa ngĩmũhoya ũteithio.

Akĩnduta irima-inĩ rĩarĩ rĩũru mũno, Akĩnduta mũtondo-inĩ. Na agĩkinyithia magũrũ makwa igũrũ rĩa ndũmba ya ihiga; Agĩtũma ndĩhande wega.

Agĩcoka agĩĩkĩra rwĩmbo rwerũ kanua-inĩ gakwa, Rwa kũgooca Kĩhoti witũ. Andũ aingĩ nĩ mekwĩyonera ũndũ ũcio metigĩre Na maige mwĩhoko wao harĩ Yahweh.

Kũrathimwo nĩ mũndũ ũrĩa wĩhokaga Yahweh Ũrĩa ũtehokaga andũ arĩa eetĩi kana andũ arĩa marũmagĩrĩra maheeni.

Nĩ wĩkĩte maũndũ maingĩ, Wee Yahweh Kĩhoti wakwa, Mawĩra maku ma magegania o na methugunda maku gũtwerekera. Gũtirĩ ũngĩ ũngĩringithanio nawe; Korũo ndageria kwaria njuge ũhoro wamo, No makorũo marĩ maingĩ mũno ũndũ itangĩhota kũmagweta!

Wee ndwerirĩirie igongona na iruta, No nĩ wahingũrire matũ makwa nĩgetha njigue. Ndwetirie magongona ma njino na magongona ma mehia.

Ngĩcoka ngiuga ũũ: “Atĩrĩrĩ, nĩ ndoka. Thĩinĩ wa gĩkũnjo nĩ kwandĩkĩtwo ũhoro wakwa.

Niĩ ngenagio nĩ gwĩka wendi waku, wee Kĩhoti wakwa, Naguo watho waku ũrikĩrĩte thĩinĩ wakwa biũ.

Nĩ hunjagia ũhoro mwega wa ũthingu thĩinĩ wa kĩũngano kĩnene. Na rĩrĩ, ndigiragĩrĩria mĩromo yakwa, O ta ũrĩa ũĩ wega, wee Yahweh.

Ndihingagĩrĩria ũhoro wa ũthingu waku thĩinĩ wa ngoro yakwa. Nĩ menyithanagia wĩhokeku na ũhonokio waku. Ndihithaga ũtugi waku o na ũhoro waku wa ma ndĩ thĩinĩ wa kĩũngano kĩnene.”

Wũii Yahweh, ndũkage kũnjiguĩra tha. Tha ciaku nyingĩ hamwe na ũtugi waku wa kũnyenda o na ũhoro waku wa ma irongitagĩra hingo ciothe.

Mathĩna marĩa mandigicĩirie nĩ maingĩ mũno matingĩtarĩka. Mahĩtia makwa nĩ maingĩ mũno ũũ atĩ nĩ manditũhĩire nginya ngaremwo nĩ kuona njĩra; Nĩ maingĩ gũkĩra njuĩrĩ cia mũtwe wakwa, Na nĩ nguĩte ngoro.

Ndagũthaitha wĩtĩkĩre kũũhonokia, wee Yahweh. Hiũha ũũke ũndeithie, wee Yahweh.

Arĩa othe maracaria ũrĩa mekũnduta muoyo Maroigua thoni na maconorithio. Arĩa makenaga rĩrĩa ndĩ na thĩna Marocoka na thutha more maconokete.

Arĩa maranjĩra atĩrĩ: “Aha! Aha!” Maronyitwo nĩ kĩeha nĩ ũndũ wa gũconoka.

No arĩa magũcaragia-rĩ, Nĩ makene na macanjamũke nĩ ũndũ waku. Arĩa mendete ciĩko ciaku cia kũhonokania nĩ moigage ũũ hingo ciothe: “Yahweh arotũũgĩrio.”

No niĩ ndirĩ hinya na ndĩ mũthĩni; Yahweh aronũmbũiya. Wee nĩwe mũteithia na mũhonokia wakwa; Wee Kĩhoti wakwa-rĩ, ndũgaikare ũtokĩte.