Thaburi 41

Kũrathimwo nĩ mũndũ o wothe ũrũmbũyagia mũndũ ũrĩa ũtarĩ hinya; Yahweh nĩ arĩmũhonokagia mũthenya wa ũũru.

Yahweh nĩ arĩmũgitagĩra na akamũtũũria muoyo. Arĩonagwo arĩ mũndũ mũrathime bũrũri-inĩ; Gũtirĩ hĩndĩ wee ũkaamũrekereria harĩ thũ ciake nĩguo imwĩke kũringana na wendi wacio.

Yahweh nĩ arĩmũtiiragĩrĩra rĩrĩa arĩ ũrĩrĩ-inĩ arĩ mũrũaru; Hĩndĩ ĩrĩa arĩ mũrũaru-rĩ, wee nĩ ũkaagarũra ũrĩrĩ wake, ũmũhonie .

Tondũ niĩ ndoigire atĩrĩ: “Njiguĩra tha wee Yahweh. Honia, nĩ gũkorũo nĩ ngwĩhĩirie.”

No thũ ciakwa nĩ ciaragia maũndũ moru igũrũ rĩakwa ikoria ũũ: “Agaakua rĩ nĩguo rĩĩtwa rĩake rĩthire?”

Ũmwe wao angĩũka kũnyona, aragia maheeni ngoro-inĩ yake. Agacaria ũndũ mũũru wa kuuga; Agacoka agathiĩ na akaũtheremia kũrĩ andũ arĩa angĩ.

Andũ arĩa othe mathũire nĩ mahehanagĩrĩra; Mathugundaga ũndũ mũũru wa kũnjũkĩrĩra makoiga atĩrĩ:

“Nĩ akoretwo nĩ ũndũ mũũru mũno; Rĩu tondũ nĩ agũĩte, ndangĩcoka gũũkĩra rĩngĩ.”

O na mũrata wakwa wa hakuhĩ, ũrĩa ndĩrehokete, Ũrĩa ũrarĩaga mũgate wakwa, nĩ angarũrũkĩte.

No wee Yahweh-rĩ, njiguĩra tha na ũnjarahũre, Nĩguo ndĩmaherithie nĩ ũndũ wa ũguo mekĩte.

Ũndũ ũyũ nĩguo ũgũtũma menye atĩ nĩ ũkenagio nĩ niĩ: Thũ ciakwa ciaga kwanĩrĩra nĩ ũndũ wa ũhootani igũrũ rĩakwa.

Niĩ-rĩ, ũndiiragĩrĩra nĩ ũndũ wa wĩkindĩru wakwa; Ũgũtũũra ũnjigĩte mbere yaku tene na tene.

Yahweh Kĩhoti wa Isiraeli arogoocwo Tene na tene. Amein na Amein.