Thaburi 4

Njĩtĩka rĩrĩa ndagũkaĩra, wee Kĩhoti wa ũthingu wakwa. Thondekera njĩra ya kũũrĩra nĩ ũndũ wa mĩtangĩko yakwa. Njiguĩra tha na ũigue ihoya rĩakwa.

Inyuĩ ariũ a andũ-rĩ, mũgũtũũra mũgarũraga gĩtĩo gĩakwa gĩgatuĩka gĩconoko nginya rĩ? Mũgũtũũra mwendete maũndũ ma tũhũ na mũgacaria maũndũ ma maheeni nginya rĩ? (Sela)

Menyai atĩ Yahweh nĩ arĩrũmbũyagia ũrĩa wake mwĩhokeku na njĩra ya mwanya; Yahweh nĩ ekũnjigua ndamũkaĩra.

Rĩrĩa mwarakara-rĩ, mũtikehagie. Teretagai na ngoro cianyu, mũrĩ marĩrĩ-inĩ manyu, na mwĩkiragĩre. (Sela)

Rutagai magongona ma ũthingu, Na mwĩhokage Yahweh.

Nĩ kũrĩ andũ aingĩ maroria atĩrĩ: “Nũũ ũgũtuonia ũndũ o wothe mwega?” Atĩrĩrĩ Yahweh, reke ũtheri wa ũthiũ waku ũtwarĩre.

Nĩ ũiyũrĩtie ngoro yakwa gĩkeno kĩnene Gũkĩra arĩa marĩ na magetha maingĩ ma ngano na ndibei ya mũhihano.

Ngũkoma na nyone toro ndĩ na thayũ, Tondũ wee Yahweh, nowe ũtũmaga ndũũre itarĩ na guoya.