Thaburi 45

Ngoro yakwa nĩ ĩrahĩahĩa tondũ wa ũndũ mwega. Ngoiga atĩrĩ: “Rwĩmbo rwakwa rũkoniĩ mũthamaki.” Rũrĩmĩ rwakwa rũrohaana ta karamu ka mwandĩki wĩthagathagĩte wega.

Wee nĩwe mũthaka mũno harĩ ariũ a andũ. Ciugo cia ũtugi ithereraga kuuma mĩromo-inĩ yaku. Nĩkĩo Kĩhoti akũrathimĩte tene na tene.

Wĩyohe rũhiũ rwaku rwa njora mwena-inĩ, o wee ũrĩ hinya, Wĩhumbe gĩtĩo na riri.

Na ũrĩ na riri ũcio waku-rĩ, thiĩ na mbere nginya ũhootane; Thiĩ ũhaicĩte mbarathi ũrũĩrĩre ũhoro wa ma na wĩnyihia o na ũthingu, Nakuo guoko gwaku kwa ũrĩo nĩ gũkũhingia maũndũ ma magegania.

Mĩguĩ yaku nĩ mĩũgĩ, ĩtũmaga ikundi cia andũ igũe mbere yaku; Ĩthecaga ngoro cia thũ cia mũthamaki.

Kĩhoti, gĩtĩ gĩaku kĩa ũnene gĩgũtũũra tene na tene; Mũthĩgi wa ũthamaki waku nĩ mũthĩgi wa ũrũngĩrĩru.

Nĩ weendire ũthingu, na ũgĩthũũra waganu. Nĩkĩo Kĩhoti, o we Kĩhoti waku, agũitĩrĩirie maguta akĩhũthĩra maguta ma gĩkeno gũkĩra athiritũ aku.

Nguo ciaku ciothe irĩ na mũnungo wa manemane na thubiri o na mwĩnũ; Nĩ ũrakenio nĩ mũgambo wa inanda cia ndigi ũrĩa ũroima nyũmba-inĩ ya mũthamaki ĩrĩa ĩgemetio na mĩguongo.

Gatagatĩ-inĩ ka andũ-a-nja arĩa atĩĩku harĩ na airĩtu a athamaki. Mũtumia wa mũthamaki arũgamĩte guoko-inĩ gwaku kwa ũrĩo, agemetio na thahabu ya Ofiri.

Ta thikĩrĩria, wee mwarĩ ũyũ, ũthikĩrĩrie na kinyi na ũtege gũtũ gwaku; Riganĩrũo nĩ andũ anyu o na nyũmba ya thoguo.

Nake mũthamaki nĩ ekwĩrirĩria ũthaka waku, Nĩ gũkorũo nĩwe mwathi waku, Nĩ ũndũ ũcio kĩmũinamĩrĩre.

Mwarĩ wa Turo nĩ egũka na kĩheo; Andũ arĩa atongu biũ nĩ mekwĩyendithĩrĩria harĩ wee.

Thĩinĩ wa nyũmba ya mũthamaki-rĩ, mwarĩ wa mũthamaki arĩ na riri mũnene; Nguo ciake igemetio na thahabu.

Ekũrehwo kũrĩ mũthamaki ehumbĩte nguo itumĩtwo na njĩra ya ũũgĩ. Airĩtu gathirange a thiritũ yake, o acio mamũrũmĩrĩire, nĩ mekũrehwo mbere yaku.

Mekũrehwo kũrĩ na gĩkeno na ndũhio nene; Nĩ mekũingĩra thĩinĩ wa nyũmba ya mũthamaki.

Ariũ aku nĩ magaacoka ithenya rĩa maithe maku ma tene. Nĩ ũkaamamũra matuĩke anene thĩinĩ wa thĩ yothe.

Nĩ ngũtũma rĩĩtwa rĩaku rĩmenyeke njiarũa-inĩ ciothe iria igooka thutha-inĩ. Nĩkĩo ikundi cia andũ igũtũũra ikũgoocaga tene na tene.