Thaburi 49
Thikĩrĩriai ũndũ ũyũ, inyuĩ ikundi ciothe cia andũ. Tegai matũ, inyuĩ aikari othe a thĩ,
Andũ arĩa matarĩ igweta o na arĩa marĩ igweta, Andũ arĩa atongu o na arĩa athĩni.
Kanua gakwa gekwaria ciugo cia ũũgĩ, Na methugunda ma ngoro yakwa monanie ũtaũku.
Nĩ ngũtega matũ thikĩrĩrie thimo; Ngũtaarĩria ndaĩ yakwa ngĩhũũraga kĩnanda kĩa mũgeeto.
Nĩ kĩĩ gĩgũtũma ndĩtigĩre hĩndĩ ya thĩna, Rĩrĩa thiũrũrũkĩirio nĩ ũũru wa andũ arĩa marageria kũniina?
Arĩa mehokaga ũtonga wao Na magetĩa nĩ ũndũ wa indo ciao nyingĩ,
Gũtirĩ o na ũmwe wao ũngĩhota gũkũũra mũrũ wa ithe Kana ahe Kĩhoti kĩndũ gĩa gũkũũra mũndũ ũcio,
(Thogora wa gũkũũra mĩoyo yao nĩ wa goro mũno Ũũ atĩ gũtirĩ hĩndĩ mangĩhota kũũrĩha);
Atĩ nĩguo atũũre tene na tene na ndakanathiĩ irima-inĩ.
Mũndũ wothe nĩ onaga atĩ o na andũ arĩa ogĩ nĩ makuaga; Andũ arĩa akĩgu na arĩa matarĩ wĩcirio mathiraga hamwe, Na ũtonga wao maũtigagĩra andũ angĩ.
Wendi wa ngoro ciao nĩ atĩ nyũmba ciao itũũre tene na tene, Na hema ciao itũũre nginya njiarũa na njiarũa. Makoragwo maheete mĩgũnda yao marĩĩtwa mao ene.
No mũndũ-rĩ, o na angĩkorũo aheetwo gĩtĩo, ndangĩtũũra; Ndakĩrĩte nyamũ iria ikuaga.
Ĩno nĩyo njĩra ya andũ arĩa akĩgu O hamwe na arĩa mamarũmagĩrĩra, arĩa makenagio nĩ ciugo ciao cia tũhũ. (Sela)
Matuĩrĩirũo gũthiĩ thĩinĩ wa Mbĩrĩra o ta ng’ondu. Gĩkuũ nĩkĩo kĩrĩmarĩithagia; Rũcinĩ marĩathagwo nĩ andũ arĩa arũngĩrĩru. Nĩ magaathira biũ; Handũ ha nyũmba ya ũnene, Mbĩrĩra nĩyo ĩgaatuĩka mũciĩ wao.
No Kĩhoti nĩ akaahonokia kuuma harĩ hinya wa Mbĩrĩra, Nĩ gũkorũo nĩ agaatambũrũkia guoko anyite. (Sela)
Ndũkanetigĩre atĩ tondũ mũndũ nĩ agĩa na ũtonga, Atĩ tondũ riri wa nyũmba yake nĩ waingĩha,
Nĩ gũkorũo hĩndĩ ĩrĩa akua gũtirĩ kĩndũ angĩthiĩ nakĩo; Riri wake ndũngĩikũrũka hamwe nake.
Nĩ gũkorũo hĩndĩ ĩrĩa arĩ muoyo nĩ egaathagĩrĩria. (Andũ nĩ makũgaathagĩrĩria hĩndĩ ĩrĩa wagaacĩra.)
No acokaga agathiĩ kũrĩ rũciaro rwa maithe make ma tene. Gũtirĩ hĩndĩ magaacoka kuona ũtheri rĩngĩ.
Mũndũ ũtataũkagĩrũo nĩ ũndũ ũcio, o na angĩkorũo aheetwo gĩtĩo, Ndakĩrĩte nyamũ iria ikuaga.