Thaburi 48

Yahweh nĩ mũnene na nĩ agĩrĩire mũno kũgoocagwo Thĩinĩ wa itũũra rĩa Kĩhoti witũ, kĩrĩma-inĩ gĩake kĩrĩa kĩamũre.

Kĩrĩma kĩu gĩthaka na kĩraihu na igũrũ, o kĩo gĩkeno gĩa thĩ yothe, Nĩ Kĩrĩma gĩa Zayuni kĩrĩa kĩrĩ mwena wa rũgongo biũ, Itũũra rĩa Mũthamaki Ũrĩa Mũnene.

Thĩinĩ wa nyũmba iria ndaya na igũrũ irĩ na ũgitĩri cia itũũra rĩu, Kĩhoti nĩ amenyithanĩtie atĩ we nĩ rĩũrĩro irũmu.

Tondũ rĩrĩ, athamaki nĩ magomanĩte; Nĩ mathiĩte marĩ hamwe.

Rĩrĩa maarĩonire, nĩ maagegire. Makĩnyitwo nĩ guoya na makĩũra nĩ ũndũ wa kũmaka.

Makĩambĩrĩria kũinaina marĩ kũu, Makĩnyitwo nĩ ruo ta rwa mũtumia akĩgĩa mwana.

Nĩ wanangaga meri cia Tarishishi ũkĩhũthĩra rũhuho rwa mwena wa irathĩro.

Maũndũ marĩa twaiguĩte-rĩ, rĩu nĩ twĩyoneire ithuĩ ene Thĩinĩ wa itũũra rĩa Yahweh mũnene wa ita, itũũra-inĩ rĩa Kĩhoti witũ. Kĩhoti nĩ egũtũma rĩtũũre rĩĩhandĩte tene na tene. (Sela)

ĩĩni Kĩhoti, nĩ twĩcũranagia ũhoro wa wendo waku wa ũtugi, Tũrĩ hekarũ-inĩ yaku.

O ta rĩĩtwa rĩaku, wee Kĩhoti, ngumo yaku Ĩkinyaga ituri-inĩ cia thĩ. Guoko gwaku kwa ũrĩo kũiyũire ũthingu.

Kĩrĩma gĩa Zayuni nĩ gĩkene, Taũni cia Yahuda nĩ icanjamũke nĩ ũndũ wa matuĩro maku.

Ceeraceerai Zayuni; mĩthiũrũrũkei; Tarai nyũmba ciayo iria ndaya na igũrũ.

Erekeriai ngoro cianyu harĩ njirigo ciayo. Thuthuriai nyũmba ciayo iria ndaya na igũrũ irĩ na ũgitĩri, Nĩgetha mũkeera njiarũa iria igooka thutha-inĩ ũhoro wayo.

Nĩ gũkorũo Kĩhoti ũcio nĩwe Kĩhoti witũ tene na tene. Egũtũũra atũtongoragia nginya tene na tene.