Thaburi 51

Wũii Kĩhoti, njiguĩra tha kũringana na tha ciaku. Huura mehia makwa nĩ ũndũ wa tha ciaku nyingĩ.

Thambia biũ kuumana na mahĩtia makwa, Na ũũtherie kuumana na mehia makwa.

Nĩ gũkorũo nĩ njũĩ wega mahĩtia makwa, Na mehia makwa makoragwo mbere yakwa hingo ciothe.

Makĩria ma arĩa angĩ othe, wee nĩwe njĩhĩirie; Nĩ njĩkĩte maũndũ marĩa wee wonaga marĩ moru. Nĩ ũndũ ũcio, wee ũrĩ mũthingu ũkĩaria Na ũrĩ na kĩhooto ũgĩtua ciira.

ĩĩni, niĩ ndaciarirũo ndĩ na mahĩtia, Na maitũ oohire nda ya kũnjiara arĩ o na mehia.

No wee, ũkenagio nĩ ũhoro wa ma ũrĩa ũrĩ thĩinĩ wakwa mũno ; Kĩrute ngoro yakwa kũgĩa na ũũgĩ ũrĩa wa ma.

Thambia ũtherie biũ kuumana na mehia makwa ũkĩhũthĩra mũthobi, nĩguo there; Thambia, nĩguo njerũhe gũkĩra mbarabu.

Reke njigue mĩgambo ya gĩkeno na gũcanjamũka, Nĩguo mahĩndĩ marĩa wahehenjire makene.

Hitha ũthiu waku ũtige kũbaara mehia makwa, Na ũhuure mahĩtia makwa mothe.

Atĩrĩrĩ Kĩhoti, nyũmbĩra ngoro ĩtarĩ ucuke, Na ũrurumũkie thĩinĩ wakwa roho mũrũngĩrĩru.

Ndũkanyingate njehere mbere yaku; Na ndũkanjehererie roho waku mwamũre.

Njokeria gĩkeno kĩa ũhonokio waku; Arahũra thĩinĩ wakwa wendi wa gũgwathĩkagĩra naguo ũũndũragie.

Andũ arĩa mahĩtagia nĩ ngũmaruta njĩra ciaku, Nĩguo ehia magũcokerere.

Honokia kuuma harĩ mahĩtia ma ũiti wa thakame, wee Kĩhoti, o wee Kĩhoti wa ũhonokio wakwa, Nĩguo rũrĩmĩ rwakwa rũmenyithanagie ũhoro wa ũthingu waku rũrĩ na gĩkeno.

Yahweh, tumũra mĩromo yakwa, Nĩguo kanua gakwa gakũgoocithagie.

Nĩ gũkorũo igongona tirĩo wendaga, korũo nĩrĩo no ngũrutĩre; Igongona igima rĩa njino tirĩo rĩgũkenagia.

Magongona marĩa makenagia Kĩhoti nĩ roho mũthuthĩku; Ngoro ĩthuthĩkĩte na ĩkahehenjeka, wee Kĩhoti ndũngĩmĩira.

Hingĩria Zayuni ũndũ ũrĩa mwega nĩ ũndũ wa wega waku; Aka thingo cia Yahrushalayim.

Hĩndĩ ĩyo nĩ ũrĩkenagĩra magongona ma ũthingu, Magongona ma njino na magongona magima; Na ndegwa nĩ irĩrutagĩrũo kĩgongona-inĩ gĩaku.