Thaburi 55

Wee Kĩhoti, thikĩrĩria ihoya rĩakwa, Na ndũkage kũnjigua ngĩgũthaitha ũnjiguĩre tha.

Tega matũ ũthikĩrĩrie na ũnjokerie. Mĩtangĩko yakwa nĩ ĩratũma thĩnĩke, Na nĩ ndĩragiĩka

Tondũ wa ũrĩa thũ ĩroiga Na kũhatĩkwo nĩ mũndũ ũrĩa mwaganu. Nĩ gũkorũo nĩ mandehagĩra mathĩna maingĩ, Na makanjigĩra muku marĩ na marakara.

Ngoro yakwa ĩrĩ na ruo thĩinĩ wakwa, Na guoya wa gĩkuũ nĩ ũndooretie.

Nĩ nyitĩtwo nĩ guoya na ngainaina, Na nganyitwo nĩ kĩmako.

Njikaraga ngiugaga atĩrĩ: “Na arĩ korũo ndĩ na mathagu ta ndutura! Ingĩũmbũka thiĩ ngaikarage kũndũ kũrĩ na ũgitĩri.

Hĩ!, ingĩũra thiĩ kũndũ kũraya. Ingĩthiĩ gũikaraga werũ-inĩ. (Sela)

Ingĩhiũha thiĩ handũ ingĩĩgitia Handũ haraya na rũhuho rũrũ rũnene, haraihu na kĩhuhũkanio gĩkĩ.”

Wee Yahweh, tũma matukanĩrũo, na ũthararie mĩbango yao, Nĩ gũkorũo nĩ nyonete ũhinya na ngũĩ thĩinĩ wa itũũra.

Mathiũrũrũkaga thingo ciarĩo mũthenya na ũtukũ; Thĩinĩ warĩo kũrĩ na rũmena na ngũĩ.

Thĩinĩ warĩo kũrĩ na mwanangĩko; Ũhinyanĩrĩria na maheeni gũtirĩ hĩndĩ cieheraga kĩhaaro-inĩ kĩa mũingĩ itũũra-inĩ rĩu.

Nĩ gũkorũo ti thũ ĩranyũrũria; Korũo nĩyo no ngirĩrĩrie. Ti thũ ĩnjũkĩrĩire; Korũo nĩ thũ no ndĩĩhithe kuuma harĩ yo.

No nĩwe, wee mũndũ ũtariĩ o ta niĩ, Mũrata wakwa ũrĩa njũĩ wega.

Nĩ twakenagĩra ũrata mũnene ũrĩa twarĩ naguo; Twathiaga nyũmba-inĩ ya Kĩhoti twĩ hamwe na kĩrĩndĩ.

Maroniinwo nĩ mwanangĩko! Nĩ mathiĩ thĩinĩ wa Mbĩrĩra marĩ muoyo; Nĩ gũkorũo maũndũ moru makoragwo gatagatĩ-inĩ kao na thĩinĩ wao.

No niĩ-rĩ, ngũkaĩra Kĩhoti, Na Yahweh nĩ ekũũhonokia.

Hwaĩ-inĩ na rũcinĩ o na thaa thita, nĩ thĩnĩkaga na ngacaya, Nake nĩ aiguaga mũgambo wakwa.

Nĩ ekũũhonokia kuuma harĩ arĩa mararũa na niĩ na ahe thayũ, Nĩ gũkorũo nĩ ndĩrokĩrĩrũo nĩ andũ aingĩ.

Kĩhoti nĩ ekũigua na amokĩrĩre, O ũcio ũtũire aikarĩire gĩtĩ kĩa ũnene kuuma tene. (Sela) Nĩ mekũrega kũgarũrĩra, O acio matetigĩrĩte Kĩhoti.

Mũndũ ũcio aatharĩkĩire arĩa maarĩ na thayũ hamwe nake; Akĩagarara kĩrĩkanĩro gĩake.

Ciugo ciake nĩ nyoroku gũkĩra thiagĩ, No ngũĩ nĩcio irĩ ngoro-inĩ yake. Ciugo ciake nĩ nyoroku gũkĩra maguta, No itariĩ ta hiũ njomore cia njora.

Neyaga Yahweh mũrigo waku, Na nĩ arĩgũtũũragia muoyo. Gũtirĩ hĩndĩ akaareka mũndũ ũrĩa mũthingu agũe.

No wee Kĩhoti-rĩ, nĩ ũgaatũma matonye thĩinĩ wa irima rĩrĩa iriku biũ. Acio marĩ na mahĩtia ma ũiti wa thakame na aheenania matigaatũũra o na nuthu ya matukũ mao. No niĩ-rĩ, wee nĩwe ndĩrĩĩhokaga.