Thaburi 61

Atĩrĩrĩ Kĩhoti, igua kĩrĩro gĩakwa gĩa kũhoya ũteithio. Tega matũ ũigue ihoya rĩakwa.

Nĩ ndĩgũkayagĩra kuuma o ituri-inĩ cia thĩ Hĩndĩ ĩrĩa ngoro yakwa ĩrĩ na mĩtangĩko. Ndongoria ũndware rwaro-inĩ rwa ihiga rũraihu kũngĩra.

Nĩ gũkorũo wee nĩwe rĩũrĩro rĩakwa, Nyũmba ndaya na igũrũ na nũmu ĩrĩa ĩngitagĩra kuuma harĩ thũ.

Ngũtũũra ndĩ mũgeni hema-inĩ yaku tene na tene; Ndĩrĩũragĩra rungu rwa kĩĩruru kĩa mathagu maku. (Sela)

Nĩ gũkorũo wee Kĩhoti, nĩ ũiguĩte mĩĩhĩtwa yakwa. Nĩ ũheete igai rĩrĩa ũheaga arĩa metigĩrĩte rĩĩtwa rĩaku.

Nĩ ũkuongerera matukũ harĩ ũtũũro wa mũthamaki, Na mĩaka yake ĩgaakorũo ĩrĩ ya kuuma njiarũa nginya njiarũa.

Egũikarĩra gĩtĩ kĩa ũnene tene na tene mbere ya Kĩhoti; ũtugi waku o na wĩhokeku nĩguo imũgitagĩre.

Na niĩ ngũtũũra nyinaga nyĩmbo cia kũgooca rĩĩtwa rĩaku tene na tene, O ngĩhingagia mĩĩhĩtwa yakwa mũthenya o mũthenya.