Thaburi 62

Ti itherũ, niĩ njetagĩrĩra Kĩhoti o ngirĩte. Ũhonokio wakwa uumaga kũrĩ we.

Nĩwe rwaro rwakwa rwa ihiga na ũhonokio wakwa, rĩũrĩro rĩakwa irũmu; Gũtirĩ hĩndĩ ngenyenyeka mũno.

Nĩ nginya rĩ mũgũtũũra mũtharĩkagĩra mũndũ nĩguo mũmũũrage? Inyuothe mũrĩ ũgwati o ta rũthingo rũinamu, ta rũthingo rwa ihiga rũrĩ hakuhĩ kũgũa.

Tondũ maciiraga marĩ hamwe ũrĩa mekũmweheria ũnene-inĩ wake; Makenagĩra kwaria maheeni. Marathimanaga na tũnua twao, no thĩinĩ wao makoragwo makĩrumana. (Sela)

Ti itherũ, niĩ njetagĩrĩra Kĩhoti o ngirĩte Tondũ kĩĩrĩgĩrĩro gĩakwa kiumaga kũrĩ we.

Nĩwe rwaro rwakwa rwa ihiga na ũhonokio wakwa, rĩũrĩro rĩakwa irũmu; Gũtirĩ hĩndĩ ngenyenyeka.

Ũhonokio wakwa na riri wakwa ciĩhocetie harĩ Kĩhoti. Kĩhoti nĩwe rwaro rwakwa rwa ihiga, na rĩũrĩro rĩakwa.

Mwĩhokagei we hĩndĩ ciothe, inyuĩ andũ aya. Mũitũrũragĩrei ngoro cianyu. Kĩhoti nĩ rĩũrĩro ritũ. (Sela)

Ariũ a andũ mahaana ta mĩhũmũ, Ariũ a andũ nĩ a maheeni. Mangĩigĩrĩrũo ratiri-inĩ marĩ hamwe, nĩ ahũthũ gũkĩra mĩhũmũ.

Mũtikehokage ũtunyani Kana mwĩhokage ciĩrĩgĩrĩro cia maheeni cia ũici. Ũtonga wanyu ũngĩingĩha, mũtikaigage ngoro cianyu harĩ guo.

Kĩhoti nĩ arĩtie riita rĩmwe, maita merĩ nĩ njiguĩte ũndũ ũyũ: Atĩ hinya nĩ wa Kĩhoti.

O na ũtugi nĩ waku, wee Yahweh, Nĩ gũkorũo ũrĩhaga o mũndũ kũringana na ciĩko ciake.