Thaburi 64

Wũũi Kĩhoti, igua mũgambo wakwa ngĩgũthaitha. Gitĩra muoyo wakwa kuuma harĩ tharĩkĩro njũru cia thũ.

Hitha kuuma harĩ mĩbango ya hitho ya andũ arĩa aganu, Ũhithe kuuma harĩ kĩrĩndĩ kĩa andũ arĩa mekaga maũndũ moru.

Rũrĩmĩ rwao marũnooraga o ta rũhiũ rwa njora; Ciugo ciao ndũrũ-rĩ, macierekagĩria o ta mĩguĩ,

Nĩguo marĩ kũrĩa mehithaga marathe mũndũ ũrĩa ũtarĩ na mahĩtia; Mamũrathaga o na ihenya mategwĩtigĩra.

Mathingataga biũ muoroto wao mũũru; Na magaciira ũrĩa mekũhitha mĩtego yao. Moragia atĩrĩ: “Nũũ ũngĩmĩona?”

Macaragia njĩra njerũ cia gwĩka maũndũ moru; Mathugundaga na hitho mĩbango yao ya wara; Meciria marĩa makoragwo thĩinĩ wa ngoro ya o ũmwe wao matingĩtaũkĩka.

No Kĩhoti nĩ ekũmaratha; Nĩ megũthecwo nĩ mũguĩ o na ihenya.

Rũrĩmĩ rwao ene nĩ rũgũtũma magũe; Andũ arĩa othe marerorera nĩ mekũinia mĩtwe yao.

Nao andũ othe nĩ megwĩtigĩra, Na mamenyithanie maũndũ marĩa Kĩhoti ekĩte, Na nĩ mekũgĩa na ũtaũku wĩgiĩ ciĩko ciake.

Mũndũ ũrĩa mũthingu nĩ egũkenera Yahweh na orĩre harĩ we; Andũ arĩa othe arũngĩrĩru ngoro nĩ megũcanjamũka.