Thaburi 73
Kĩhoti nĩ mwega mũno harĩ Isiraeli, harĩ arĩa matarĩ na ũũru ngoro.
No niĩ-rĩ, magũrũ makwa maatigĩtie hanini kũũra njĩra; Makinya makwa maarĩ hakuhĩ gũtindirũka.
Nĩ gũkorũo nĩ ndaiguaga ũiru nĩ ũndũ wa arĩa etĩi Ndona thayũ wa arĩa aganu.
Tondũ matikuaga gĩkuũ kĩa ruo; Makoragwo na ũgima mwega wa mwĩrĩ.
Matitangĩkaga ta andũ arĩa angĩ, Kana makanyamarĩka ta andũ arĩa angĩ.
Nĩ ũndũ ũcio, mwĩtĩo nĩguo mũgathĩ wao; Naguo ũhinya ũmahumbagĩra ta nguo.
Ũgaacĩru wao ũtũmaga maitho mao moimĩre; Indo ciao ikĩrĩte ũrĩa ngoro ciao ingĩĩcirĩria.
Nĩ andũ aungumania na maragia na kĩnyũrũri makoiga maũndũ moru. Mehĩtaga marĩ na mwĩtĩo ũrĩa mekũhinyanĩrĩria.
Makĩaria-rĩ, maragia ta marĩ igũrũ matu-inĩ, Nacio nĩmĩ ciao ciaragia na mwĩtĩo thĩinĩ wa thĩ.
Nĩkĩo andũ ake mathiaga kũrĩ o, Na makanyua kuuma maĩ-inĩ mao maingĩ.
Moragia atĩrĩ: “El angĩmenya atĩa? Hihi Ũrĩa ũrĩ Igũrũ Mũno nĩ aramenya ũrĩa kũrekĩka?”
Acio nĩo andũ arĩa aganu, arĩa monaga maũndũ mega hĩndĩ ciothe. Maikaraga makĩongagĩrĩra ũtonga wao.
Ti itherũ ndũũrĩtie ngoro yakwa ĩtarĩ na ũcuke o tũhũ Na ngathambia moko makwa kuonania ndirĩ ũcuke o tũhũ.
Ndaikaraga ngĩtangĩkaga mũthenya mũgima; Ndarũngagwo rũcinĩ o rũcinĩ.
No korũo nĩ ndoigire maũndũ macio, Nĩ ingĩakunyanĩire andũ aku.
Rĩrĩa ndageririe gũtaũkĩrũo nĩ ũndũ ũcio, Ndaiguaga ũgĩthumbũra
O nginya rĩrĩa ndaingĩrire handũ harĩa hamũre na harĩ riri ha El, Na ngĩmenya ũhoro wa matukũ mao ma thutha-inĩ.
Ti itherũ ũmaigaga handũ hatenderũ. Ũtũmaga magũe makanangĩka.
Kaĩ nĩ manangĩkaga na ihenya-ĩ! Mũthia wao ũkinyaga o rĩmwe na mũthiro wao ũgakorũo ũrĩ mũũru mũno!
Ĩĩni Yahweh, o ta ũrĩa kĩroto kĩriganagĩra mũndũ okĩra, No taguo ũgaateanĩria ũnene wao rĩrĩa wee ũkaarahũka.
No ngoro yakwa yarĩ na marũrũ, Na thĩinĩ wakwa nĩ ndaiguaga ruo rũnene.
Nĩ ndagĩte wĩcirio na ndiarĩ na ũtaũku; Ndatariĩ o ta nyamũ ĩtarĩ wĩcirio maitho-inĩ maku.
Ĩndĩ rĩu ndĩ hamwe nawe hĩndĩ ciothe; Nĩ ũnyitĩte guoko gwakwa kwa ũrĩo.
Ũndongoragia na ũtaaro waku, Na thutha ũcio nĩ ũgũtũma ngĩe na riri.
Nũũ ũngĩ ndĩ nake kũu igũrũ? Ndĩ nawe-rĩ, gũtirĩ kĩndũ ingĩĩrirĩria gũkũ thĩ.
Mwĩrĩ wakwa na ngoro yakwa no ciage hinya, No Kĩhoti nĩwe rwaro rwa ihiga rwa ngoro yakwa na rwĩga rwakwa tene na tene.
Ti itherũ arĩa maikaraga haraihu nawe nĩ magaathira. Nĩ ũkaaniina mũndũ wothe ũgũtiganagĩria nĩ ũndũ wa kwaga wĩhokeku.
No niĩ-rĩ, gũkuhĩrĩria Kĩhoti nĩkuo kwega na niĩ. Yahweh Mwathi Ũrĩa Mũnene nĩwe nduĩte rĩũrĩro rĩakwa, Nĩgetha menyithanagie mawĩra maku mothe.