Thaburi 72

Rĩu Kĩhoti, menyithia mũthamaki matuĩro maku, Na ũhe mũriũ wa mũthamaki ũthingu waku.

Arotetagĩra andũ aku na ũthingu, Nao andũ aku arĩa matarĩ hinya amatetagĩre na kĩhooto.

Irĩma irorehagĩra andũ thayũ, Natuo tũrĩma tũrehage ũthingu.

Arogitagĩra arĩa matarĩ hinya gatagatĩ-inĩ ka andũ aku, Nĩ ahonokagie ciana cia athĩni, Na akahehenja mũtunyani.

Megũtũũra magwĩtigĩrĩte ihinda rĩothe rĩrĩa riũa rĩgũkorũo ho Na rĩrĩa rĩothe mweri ũgũtũũra, Nginya njiarũa na njiarũa.

Akaahaana ta mbura ĩrĩa yuragĩra nyeki ĩrĩa ĩrengetwo, Ta mbura ĩrĩa ĩtũmaga thĩ ĩgunye.

Matukũ-inĩ make arĩa athingu nĩ makaagaacĩra, Naguo thayũ nĩ ũkaaingĩha o nginya rĩrĩa mweri ũtagaakorũo ho.

Agaakorwo na wathani kuuma iria rĩmwe nginya rĩrĩa rĩngĩ Na kuuma Rũũĩ-inĩ nginya ituri cia thĩ.

Arĩa maikaraga werũ-inĩ nĩ makaainamĩrĩra mbere yake, Na thũ ciake nĩ igaacũna rũkũngũ.

Athamaki a Tarishishi na a icigĩrĩra nĩ makaarĩha igooti. Athamaki a Sheba na a Seba nĩ makaamũhe iheo.

Athamaki othe nĩ makaainamĩrĩra mbere yake, Na ndũrĩrĩ ciothe nĩ ikaamũtungatĩra.

Nĩ gũkorũo nĩ akaahonokia athĩni arĩa makayaga makĩhoya ũteithio, O na mũndũ ũrĩa ũtarĩ hinya hamwe na ũrĩa wothe ũtarĩ na wa kũmũteithia.

Andũ arĩa matarĩ hinya na arĩa athĩni nĩ akaamaiguĩra tha, Na nĩ akaahonokia mĩoyo ya arĩa athĩni.

Nĩ akaamahonokia matige kũhinyĩrĩrio na gwĩkwo maũndũ ma ũhinya, Na thakame yao nĩ ĩgaakorũo ĩrĩ ya bata mũno maitho-inĩ make.

Arotũũra na aheo thahabu ya Sheba. Arohoyagĩrũo nĩ andũ hĩndĩ ciothe, Na arathimagwo mũthenya wothe.

Nĩ gũgaakorũo na ngano nyingĩ thĩinĩ wa thĩ; Ĩgaakorũo ĩrĩ nyingĩ mũno irĩma igũrũ. Maciaro make makaaingĩha ta ma Lebanoni, Na thĩinĩ wa matũũra andũ magaacanũka ta mĩmera ĩrĩa ĩkũraga thĩinĩ wa thĩ.

Rĩĩtwa rĩake rĩrotũũra tene na tene, Na rĩtũũre rĩtheremaga ihinda rĩothe rĩrĩa riũa rĩgũkorũo ho. Andũ nĩ megwatĩre kĩrathimo kũgerera harĩ we; Ndũrĩrĩ ciothe iromwĩtaga mũndũ mũkenu.

Yahweh Kĩhoti arorathimwo, o we Kĩhoti wa Isiraeli, O we wiki wĩkaga maũndũ ma magegania.

Rĩĩtwa rĩake itũũgĩru rĩrathimwo tene na tene, Na riri wake ũroiyũra thĩinĩ wa thĩ yothe. Amein na Amein.

Ũcio nĩguo mũthia wa mahoya ma Daudi, mũrũ wa Jesii.