Thaburi 71

Yahweh, tondũ niĩ njũrĩire harĩ wee. Ndũkanareke njonorithio.

Honokia na ũũthare nĩ ũndũ wa ũthingu waku. Ndegera gũtũ gwaku na ũũhonokie.

Tuĩka rwaro rwakwa rwa ihiga rwa kwĩgitia Harĩa ingĩingĩra hingo ciothe. Athana nĩguo honokio, Nĩ gũkorũo wee nĩwe ndũmba yakwa ya ihiga na mwĩgitio wakwa.

Wee Kĩhoti wakwa, honokia kuuma harĩ guoko kwa ũrĩa mwaganu, Ũũhonokie kuuma harĩ guoko kwa mũhinyanĩrĩria ũrĩa wĩkaga maũndũ matarĩ ma kĩhooto.

Tondũ wee Yahweh Mwathi Ũrĩa Mũnene nĩwe kĩĩrĩgĩrĩro gĩakwa; Ndũire ngwĩhokete kuuma ndĩ o mũnyinyi.

Ũtũire wĩ mwĩhoko wakwa kuuma rĩrĩa ndaciarirũo; Wee nĩwe wandutire nda ya maitũ. Ndĩrĩkũgoocaga hĩndĩ ciothe.

Nduĩkĩte ta kĩama harĩ andũ aingĩ, No wee nĩwe rĩũrĩro rĩakwa irũmu.

Kanua gakwa kaiyũire rũgooco rwaku; Njaragia ũhoro wa riri waku mũthenya wothe.

Ndũkanandiganĩrie rĩrĩa ngaakũra; Ndũkanandige rĩrĩa ngaakorũo itarĩ na hinya.

Thũ ciakwa ciaragia ndeto cia kũnjũkĩrĩra, Na arĩa macaragia ũrĩa mekũnduta muoyo magaciira marĩ hamwe,

Makoiga: “Kĩhoti nĩ amũtiganĩirie. Mũteng’eriei mũmũnyite, tondũ ndarĩ na mũndũ wa kũmũhonokia.”

Wũũi Kĩhoti, ndũgaikare haraya na niĩ. Hiũha ũũke ũndeithie, wee Kĩhoti wakwa.

Arĩa maranjũkĩrĩra-rĩ, Maroconorithio na mathire. Arĩa mendaga nyone ũũru Marohumbwo nĩ thoni na gĩconoko.

No niĩ-rĩ, nĩ ngũthiĩ na mbere gweterera; Nĩ ngũkũgooca o na makĩria.

Kanua gakwa nĩ karĩaragia ũhoro wa ũthingu waku, Gakaria ũhoro wa ciĩko ciaku cia kũhonokania mũthenya wothe, O na gũtuĩka nĩ nyingĩ mũno ũndũ itangĩhota gũtaũkĩrũo.

Nĩ ngũthiĩ na menyithanie ũhoro wa ciĩko ciaku cia hinya, Wee Yahweh Mwathi Ũrĩa Mũnene; Nĩ ngũgweta ũthingu waku, o waku wiki.

ĩĩni Kĩhoti, ũtũire ũndutaga kuuma ndĩ o mũnyinyi, Na nginya rĩu thiaga o na mbere kũmenyithania mawĩra maku ma magegania.

Wee Kĩhoti, o na ndakũra na ngĩe mbuĩ, ndũkanandiganĩrie. Reke menyithie rũciaro rũrĩa rũroka ũhoro wa hinya waku Na menyithanie ũhoro wa ũhoti waku kũrĩ arĩa othe magooka thutha.

Ũthingu waku, wee Kĩhoti, ũkinyĩte o igũrũ; Nĩ wĩkĩte maũndũ manene; Wee Kĩhoti-rĩ, nũũ ũhaana tawe?

O na gũtuĩka nĩ ũtũmĩte ngorũo na mĩtangĩko na mathĩna maingĩ, Njĩkĩra hinya rĩngĩ; Nduta kuuma kũndũ kũrĩa kũriku mũno thĩinĩ wa thĩ.

Tũma ũnene wakwa wongerereke Ningĩ ũthiũrũrũkĩrie na ũnyũmĩrĩrie.

Na niĩ nĩ ngũkũgooca na kĩnanda kĩa ndigi Nĩ ũndũ wa wĩhokeku waku, wee Kĩhoti wakwa. Nĩ ngũina nyĩmbo ngũgooce ngĩhũũraga kĩnanda kĩa mũgeeto, Wee Ũrĩa Mwamũre wa Isiraeli.

Mĩromo yakwa nĩ ĩkwanĩrĩra ĩkenete ngĩkũinĩra nyĩmbo cia gũkũgooca, Nĩ gũkorũo nĩ ũhonoketie muoyo wakwa.

Rũrĩmĩ rwakwa rũrĩaragia ũhoro wa ũthingu waku mũthenya wothe, Tondũ arĩa mendaga nyone ũũru nĩ mekũigua thoni na maconorithio.