Thaburi 75

Nĩ tũragũcokeria ngatho wee Kĩhoti, nĩ tũragũcokeria ngatho; Rĩĩtwa rĩaku rĩrĩ hakuhĩ Na andũ nĩ maragia ũhoro wa mawĩra maku ma magegania.

Wee uugaga atĩrĩ: “Rĩrĩa ndatua ihinda rĩna, Nduanagĩra ciira na kĩhooto.

Rĩrĩa thĩ yatwekirio, hamwe na arĩa othe maikaraga thĩinĩ wayo, Nĩ niĩ ndatũmire itugĩ ciayo ciikare irĩ nũmu.” (Sela)

Njĩraga arĩa egani atĩrĩ, “Mũtikegane,” Nao arĩa aganu ngameera, “Mũtigatũũgĩrie hinya wanyu.

Mũtigatũũgĩrie hinya wanyu na igũrũ Kana mwarie na mwĩtĩo.

Tondũ ũtũũgĩru nduumaga Mwena wa irathĩro kana wa ithũĩro kana wa mũhuro.

Nĩ gũkorũo Kĩhoti nĩ Mũtuanĩri Ciira. Anyihagia mũndũ ũmwe agatũũgĩria ũrĩa ũngĩ.

Yahweh arĩ na gĩkombe guoko-inĩ gwake; Ndibei nĩ ĩraruta mũhũyũ na nĩ ĩtukanĩtio biũ. Hatarĩ nganja nĩ ekũmĩita, Na arĩa othe aganu thĩinĩ wa thĩ nĩ mekũmĩnyua, o nginya itaata rĩa mũico.”

No niĩ-rĩ, ngũtũũra menyithanagia ũndũ ũcio tene na tene; Nĩ ndĩrĩinaga nyĩmbo cia kũgooca Kĩhoti wa Jakubu.

Nĩ gũkorũo oigaga atĩrĩ: “Nĩ ngũniina hinya wothe wa arĩa aganu, No hinya wa arĩa athingu nĩ ũgũtũũgĩrio.”