Thaburi 86

Tega gũtũ gwaku, wee Yahweh na ũnjigue, Nĩ gũkorũo nĩ nyamarĩkĩte na ndĩ mũthĩni.

Gitĩra muoyo wakwa, tondũ niĩ nĩ ngwĩyamũrĩire. Honokia ndungata ĩno yaku ĩkwĩhokete, Tondũ wee nĩwe Kĩhoti wakwa.

Rĩu Yahweh, njiguĩra tha, Tondũ ngũkayagĩra mũthenya wothe.

Tũma ndungata yaku ĩkene, Tondũ wee Yahweh nĩwe ngayagĩra.

Nĩ gũkorũo wee Yahweh ũrĩ mwega na ũkoragwo wĩhaarĩirie kuohanĩra; Ũtugi waku nĩ mũingĩ harĩ arĩa othe magũkayagĩra.

Yahweh, thikĩrĩria ihoya rĩakwa; Na ũtegere gũtũ mathaithana makwa ma kũhoya ũteithio.

Wee nĩwe ngũkaĩra mũthenya ũrĩa ndĩ na mĩtangĩko, Tondũ nĩ ũkũnjigua.

Gũtirĩ ũngĩ ũhaana tawe harĩ ihoti iria ingĩ, wee Yahweh, Gũtirĩ mawĩra mangĩ matariĩ ta maku.

Ndũrĩrĩ ciothe iria wombire Nĩ igooka na cinamĩrĩre mbere yaku, wee Yahweh, Na nĩ ikaagooca rĩĩtwa rĩaku.

Tondũ wee wĩ mũnene na wĩkaga maũndũ ma magegania; Wee wiki nowe Kĩhoti.

Rĩu Yahweh, nduta ũhoro wĩgiĩ njĩra yaku. Niĩ ndĩrĩrũmagĩrĩra ũhoro waku wa ma. Gwatania ngoro yakwa ĩtuĩke o ya gwĩtigagĩra rĩĩtwa rĩaku.

Nĩ ndĩrakũgooca na ngoro yakwa yothe, wee Yahweh Kĩhoti wakwa, Na ngũtũũra ngumagia rĩĩtwa rĩaku tene na tene,

Tondũ ũtugi waku harĩ niĩ nĩ mũnene, Na nĩ ũhonoketie muoyo wakwa kuuma Mbĩrĩra-inĩ kũndũ kũriku mũno.

Takĩone wee Kĩhoti, andũ etĩi nĩ meyumĩrĩtie nĩguo manjũkĩrĩre; Gĩkundi kĩa andũ matarĩ tha nĩ kĩrenda kũnduta muoyo, Na matirũmbũyagia ũhoro waku.

No wee Yahweh wĩ El mũigua tha na mũcayanĩri, Ndũhiũhaga kũrakara na nĩ ũiyũirũo nĩ ũtugi ona ũhoro wa ma

Wĩhũgũre ũndore na ũnjiguĩre tha. Ndungata yaku-rĩ, mĩhe hinya waku, Na ũhonokie mũriũ wa ngombo yaku ya mũirĩtu.

Nyonia kĩmenyithia kĩa wega waku, Nĩgetha arĩa mathũire makĩone na maconorithio. Tondũ wee Yahweh, nĩwe ũndeithagia na ũkanyũmĩrĩria.